جۇمىس ساپارى بارىسىندا الماتى اكىمى باقىتجان ساعىنتايەۆ ناۋرىزباي اۋدانىنىڭ №36 ەمحاناسىندا بولدى، ونىڭ بازاسىندا زاماناۋي قۇرىلعىلارمەن جابدىقتالعان جاڭا دياگنوستيكالىق ورتالىق اشىلدى، دەپ حابارلايدى اlmaty-akshamy.kz.
باقىتجان ساعىنتايەۆ مەديسينا قىزمەتكەرلەرىن الداعى تاۋەلسىزدىك كۇنىمەن قۇتتىقتادى. الماتى اكىمى "جاڭا الماتى" شاعىناۋداندارىندا زاماناۋي كت-ورتالىقتارىن اشۋ جەدەل ارالاسۋدى تالاپ ەتەتىن شۇعىل اۋرۋلار كەزىندە پاتولوگيالاردى دياگنوستيكالاۋ جانە ەرتە انىقتاۋ بويىنشا حالىققا قادامدىق قولجەتىمدىلىكتى قامتاماسىز ەتەتىنىن اتاپ ءوتتى.
64 تىلىمدەگى كومپيۋتەرلىك توموگراف جوعارى جىلدامدىقپەن سكانەرلەۋدى ورىندايدى. اپپاراتتىڭ جۇمىس ىستەۋى كت-زەرتتەۋلەرىن باسقا ەمدەۋ ۇيىمدارىنا جىبەرۋ قاجەتتىلىگىن ايتارلىقتاي تومەندەتەدى.
«جاڭا توموگراف، ارينە، پاندەميا كەزىندە ءبىز ءۇشىن قيىن ۋاقىتتا زەرتتەۋ كەزەكتەرىن ەداۋىر جەڭىلدەتەدى. اپپاراتتىڭ قۋاتتىلىعى كۇنىنە 40-قا جۋىق ادامنىڭ تەكسەرۋدەن ءوتۋىن قامتاماسىز ەتۋگە مۇمكىندىك بەرەدى، بۇل ءبىزدىڭ تۇرعىندارعا مەديسينالىق كومەك كورسەتۋ ساپاسىن جاقسارتادى»، - دەدى ناۋرىزباي اۋدانىنىڭ مەديسينالىق ۇيىمدارىنىڭ باسشىسى گۇلجانات تىلەگەن.
№36 ەمحانا جانىنداعى كت ورتالىعى تەك ناۋرىزباي اۋدانىنىڭ عانا ەمەس، اۋەزوۆ، الاتاۋ اۋداندارىنىڭ، سونداي-اق الماتى وبلىسىنىڭ قاراساي اۋدانىنىڭ تۇرعىندارىنا دا قىزمەت كورسەتەتىن بولادى.
حابارلانعانداي، بۇگىندە الماتى قالاسىنىڭ دەنساۋلىق ساقتاۋ نىساندارىن جابدىقتاۋ كورسەتكىشى 91،5%-عا جەتتى. انەستەزيولوگيا، رەانيماسيا جانە قارقىندى تەراپيا بولىمشەلەرىنىڭ جابدىقتالۋى 100%-عا دەيىن جەتكىزىلدى. جەدەل مەديسينالىق جاردەم جۇمىسى جاقساردى. ءۇش جاڭا قوسالقى ستانسيا سالىندى. بريگادالار سانى ەكى ەسەگە ارتتى. اۆتوپارك 70% جاڭارتىلدى.
تۇڭعىش پرەزيدەنت – ەلباسى ن. نازاربايەۆتىڭ تاپسىرماسى بويىنشا اعىمداعى جانە ىقتيمال ەپيدەميولوگيالىق قاتەرلەرگە دەن قويۋ بويىنشا ەلدىڭ عىلىمي-مەديسينالىق الەۋەتىن شوعىرلاندىرۋ ماقساتىندا الماتىدا ينفەكسيالىق اۋرۋلاردىڭ كوپبەيىندى عىلىمي-زەرتتەۋ ورتالىعىنىڭ قۇرىلىسى باستالدى.
اعىمداعى جىلى ءۇش ەمحانانىڭ، 9 وتباسىلىق-دارىگەرلىك امبۋلاتوريانىڭ قۇرىلىسى باستالدى. بالالارعا شۇعىل كومەك كورسەتۋ ورتالىعىنىڭ جانە №2 قبكا قوسىمشا كورپۋستارىنىڭ قۇرىلىسى، پاللياتيۆتىك كومەك ورتالىعى بار جاڭا ونكولوگيالىق ورتالىقتىڭ جانە مەدەۋ اۋدانىندا كوپبەيىندى ستاسيونار سالىنۋدا.
250 توسەكتىك بالالاردى وڭالتۋ ورتالىعىن جانە 50 توسەكتىك ەرتە ارالاسۋ ورتالىعىن ورنالاستىرۋ ءۇشىن بۇرىنعى الماتى تەمىرجول اۋرۋحاناسىن قايتا جاڭارتۋ جانە كۇردەلى جوندەۋ جوسپارلانۋدا.