الماتىدا تاۋ باۋرايلارىن ءورت شالدى

ءتىلسىز جاۋ ءسوندىرىلدى.

5 قىركۇيەكتە 16 ساعات: 05 مينۋتتا ءورت سوندىرۋشىلەر دۋمان شاعىن اۋدانى امان بوكتەر كوشەسىندەگى 46ء-ۇيدىڭ باعىتىنا قاراي جىبەرىلدى. كەلگەن بويدا ەكى تاۋدىڭ باۋرايىندا قۋراعان ءشوپتىڭ ورتەنگەنىن انىقتادى، دەپ حابارلايدى Almaty-akshamy.kz. 

الماتى قالاسى تجد باسپا ءسوز قىزمەتىنىڭ مالىمەتىنشە، وقيعا ورنىنا دەرەۋ توتەنشە جاعدايلار دەپارتامەنتى قۇرامىنداعى تابيعي ورتتەردى ءسوندىرۋ جيىنتىق جاساعىنان 38 ادام، 8 بىرلىك تەحنيكا جانە الماتى وبلىسى تجد-دان 7 ادام، 2 بىرلىك تەحنيكا جۇمىلدىرىلعان.
ەكى جانۋ وشاعى (1 گا جانە 1،5 گا) ورىن الدى. سولتۇستىك اۋماعىندا رەزەڭكە جابىندىلار ورنالاسقان جەكە تۇرعىن ءۇي سەكتورىنا ءورتتىڭ ءوتۋ ءقاۋپى تۋىندادى، ولاردى قورعاۋعا ءورت وقپاندارى جىبەرىلدى. ءورتتى ءسوندىرۋ جۇمىستارى بەتكەيلەردەگى بيىكتىكتىڭ وزگەرۋىمەن، جوعارى تەمپەراتۋرامەن كۇردەلەندى. ءورت ءسوندىرۋ ءۇشىن «ەرماك» اسپالى ءورت سوندىرگىشتەر، شانستى قۇرالدار (شارتىلداقتار، كۇرەكتەر) قولدانىلدى. ساعات 17:06-دا قالا تاراپىنان وقشاۋلاۋعا قول جەتكىزىلدى.

«تاۋلى-ورماندى جەرلەردە ءورت ءقاۋپىنىڭ جوعارى بولۋىنا بايلانىستى قالا تۇرعىندارى مەن قوناقتارىن اشىق وتتى پايدالانۋدان، وت جاعۋدان، تەمەكى شەگۋدەن جانە قۇرعاق ءشوپ پەن ورىلعان ءشوپتى ورتەۋدەن باس تارتۋدى سۇرايمىز»، -دەيدى الماتى قالاسى تجد.

اۋىر زارداپتار تۋىنداعان جاعدايدا كىنالى ادامدار قىلمىستىق جاۋاپكەرشىلىككە تارتىلۋى مۇمكىن ەكەندىگىن دە جەتكىزدى.