الەم چەمپيونى گولوۆكينمەن قاشان كەزدەسەتىنىن ايتتى

يۋبەنك پەن گولوۆكين 2016 جىلى كەزدەسۋى كەرەك ەدى.

ورتا سالماقتا WBA بەلبەۋىنىڭ ۋاقىتشا چەمپيونى كريس يۋبەنك (30-2، 22 كو) وسى سالماقتا IBF جانە IBO بەلبەۋلەرىنىڭ يەگەرى قازاقستاندىق گەنناديي گولوۆكينمەن (41-1-1، 36 KO) قاشان كەزدەسۋ وتكىزەتىنىن ايتتى، Almaty-akshamy.kz Aikyn.kz-كە سىلتەمە جاساپ.

وسىعان دەيىن بريتاندىق بوكسشى گولوۆكيننىڭ كومانداسى جەكپە-جەك وتكىزۋگە نيەت بىلدىرگەنى تۋرالى حابارلاعان بولاتىن. يۋبەنكتىڭ ايتۋىنشا، ول گولوۆكينمەن بۇرىننان بەرى كەزدەسۋدى ويلاستىرىپ جۇرگەن.

«مەن بۇرىننان بەرى گولوۆكيندى ويلاپ ءجۇرمىن. مەنىڭ ويىمشا جانكۇيەرلەر ءبىزدىڭ كەزدەسۋدى اسىعا كۇتىپ ءجۇر. ول (گولوۆكين رەد. تۇسىندىرمەسى) كەلەسى كەزدەسۋىن ريوتو مۋراتاعا قارسى وتكىزەدى. سول ءۇشىن ءبىزدىڭ كەزدەسۋىمىز بيىل وتپەيتىن شىعار. ءبىزدىڭ ايقاس سەگىز نە توعىز ايدان كەيىن وتەدى دەپ ويلايمىن. وسى كەزدەسۋدى ۇيىمداستىرۋ ءۇشىن بارلىعىن ىستەيمىز. WBA بەلبەۋىنىڭ ۋاقىتشا چەمپيونى رەتىندە گولوۆكيننىڭ ءبىرىنشى قارسىلاسى مەن بولۋىم كەرەك. سوندىقتان مەن دايىن بولۋىم كەرەك»، – دەپ كەلتىرەدى يۋبەنكتىڭ ءسوزىن Boxingscene.com پورتالى.

ايتا كەتەيىك، يۋبەنك پەن گولوۆكين 2016 جىلى كەزدەسۋى كەرەك ەدى. ءبىراق ول كەزدە بريتاندىق بوكسشى جەكپە-جەكتەن باس تارتتى.
گولوۆكين جەلتوقساننىڭ سوڭىندا ورتا سالماقتا WBA ۇيىمىنىڭ «سۋپەرچەمپيونى» ريوتو مۋراتامەن (16-2، 13 كو) كەزدەسۋ وتكىزۋى كەرەك.