10-12 قازان ارالىعىندا الماتى قالاسىندا جول-كولىك وقيعالارىنىڭ، جولاۋشىلار تاسىمالى سالاسىنداعى قۇقىق بۇزۋشىلىقتاردىڭ جولىن كەسۋ جانە ولاردىڭ الدىن الۋ ماقساتىندا "تاسىمالداۋشى" جەدەل-پروفيلاكتيكالىق ءىس-شارا وتكىزىلەدى، - دەپ حابارلايدى Aqshamnews.kz.
ءىس-شارانىڭ باستى ماقساتى – زاڭسىز تاسىمالداۋشىلاردى انىقتاۋ، جولدارداعى قاۋىپسىزدىك پەن زاڭدىلىقتى قامتاماسىز ەتۋ، سونداي-اق تاكسي مەن قالاارالىق تاسىمال قىزمەتتەرىن پايدالاناتىن ازاماتتاردىڭ قۇقىقتارىن قورعاۋ. شاراعا كولىك پروكۋراتۋراسى، كولىك باقىلاۋ ينسپەكسياسى، مەملەكەتتىك كىرىستەر ورگاندارى جانە "قازاۆتوجول ۇك" اق وكىلدەرى تارتىلعان. بىرلەسكەن ءموبيلدى توپتار قالا كوشەلەرىندە جانە قالادان شىعابەرىستەردە رەيدتىك ءىس-شارالار وتكىزىپ، اۆتوكولىكتەردىڭ تەحنيكالىق جاي-كۇيىن جانە رۇقسات قۇجاتتارىنىڭ بولۋىن تەكسەرۋدە.
- نەگىزگى نازار جولاۋشىلار تاسىمالىنا اۋدارىلۋدا. تەحنيكالىق اقاۋى بار نەمەسە قايتا جابدىقتالعان كولىكتەردىڭ پايدالانىلۋىنا جول بەرمەۋ، سونداي-اق زاڭسىز تاسىمالداۋشىلاردى انىقتاۋ ماڭىزدى. ازاماتتاردىڭ قاۋىپسىزدىگى مەن زاڭنىڭ ساقتالۋى – ءبىزدىڭ باستى باسىمدىعىمىز، – دەدى الماتى قالاسى پد جەرگىلىكتى پوليسيا قىزمەتى باسقارماسى باستىعىنىڭ ورىنباسارى تيمۋر نوعايبايەۆ.
پوليسيا زاڭسىز تاسىمالداۋشىلاردىڭ قىزمەتىن پايدالانۋدىڭ جول-كولىك وقيعالارى ءقاۋپىن ارتتىراتىنىن جانە جولاۋشىلاردىڭ ءومىرى مەن دەنساۋلىعىنا ءقاۋىپ توندىرەتىنىن ەسكە سالادى. "تاسىمالداۋشى" جەدەل-پروفيلاكتيكالىق ءىس-شاراسى مەملەكەت باسشىسى جاريالاعان "زاڭ جانە ءتارتىپ" قاعيداتىن ىسكە اسىرۋ جانە "پروفيلاكتيكا جىلى" اياسىندا وتكىزىلىپ جاتىر.