الماتىنىڭ ناۋرىزباي اۋدانىندا ەكى جاڭا بەلسەندى ۇزاق ءومىر ءسۇرۋ ورتالىعى جۇمىس ىستەي باستادى
الماتىنىڭ ناۋرىزباي اۋدانىندا بەلسەندى ۇزاق ءومىر ءسۇرۋدىڭ ەكى جاڭا ورتالىعى رەسمي تۇردە اشىلىپ، اۋداننىڭ قارت تۇرعىندارى ءۇشىن جايلى جاعداي جاسالىپ كەلەدى، - دەپ حابارلايدى Aqshamnews.kz.
بۇعان دەيىن جۇمىس ىستەپ كەلە جاتقان ءۇش ورتالىق اۋدانداعى قارت ادامدادىڭ بەلسەندى، سالاۋاتتى جانە ءداستۇرلى ءومىر سالتىن ۇستانۋلارىنا سەپتىگىن تيگىزىپ وتىر. بۇل تۋرالى ناۋرىزباي اۋدانىنىڭ اكىمدىگى حابارلادى.
سوڭعى جىلدارى ناۋرىزباي اۋدانىندا زەينەتكەرلەر سانى 2014 جىلمەن سالىستىرعاندا 2،8 ەسەگە ءوستى. بۇگىندە اۋدانداعى قارت ادامدار سانى 15،2 مىڭنان اسادى. بەلسەندى ۇزاق ءومىر ءسۇرۋ ورتالىقتارى اعا بۋىننىڭ رۋحاني جانە مادەني تانىمىنا ىقپال ەتىپ، الەۋمەتتىك قولداۋ كورسەتىپ وتىر.
جاڭا ورتالىقتاردىڭ ءبىرى شۇعىلا شاعىناۋدانىندا ورنالاسقان (340/35، 13ء-شى كورپۋس). ورتالىقتا ارنايى جاسالعان باعدارلاما بويىنشا قارت ادامدار پسيحولوگيالىق جانە ءتۇرلى دارىستەن وتەدى. ەگدە جاندار سكانديناۆيالىق سەرۋەندەۋگە بىرگە شىعادى، حورەوگرافياعا، ءتۇرلى ترەنينگتەرگە قاتىسادى. تىلدىك كۋرستار، ۇستەل تەننيسى، دومبىرا، توعىزقۇمالاق ساباقتارى بار. اركىم قالاۋى بويىنشا ءتۇرلى ساباققا قاتىسىپ، بەلسەندىلىك تانىتا الادى.
ەكىنشى ورتالىق قالقامان-2 شاعىناۋدانى ءاشىموۆ كوشەسى، 253 مەكەنجايىندا ورنالاسقان. بۇل ورتالىقتىڭ باعدارلاماسى بويىنشا دەنە شىنىقتىرۋعا، شىعارماشىلىققا، الەۋمەتتىك قولداۋعا، مادەني مۇرانى ساقتاۋعا ەرەكشە نازار اۋدارىلادى. ۇسىنىلاتىن ساباقتاردىڭ اراسىندا يوگا، ايكۋنە، حورەوگرافيا، زاڭگەرلىك جانە پسيحولوگيالىق كومەك، IT-ساۋاتتىلىق، ەستە ساقتاۋدى نىعايتۋ، بي، كەسكىندەمە، قولونەر، ۆوكال، اكتەرلىك شەبەرلىك، ۇلتتىق تاعام دايىنداۋ، دومبىرا تارتۋ، ءتۇرلى مۋزىكالىق جانرلار بار. ۇلتتىق ءداستۇردى ساقتاۋعا جانە ولاردى وسكەلەڭ ۇرپاققا ناسيحاتتاۋعا ەرەكشە كوڭىل بولىنەدى.
«مەن ءۇشىن بەلسەندى ۇزاق ءومىر ءسۇرۋ ورتالىعى بۇل شابىت پەن شىعارماشىلىق وشاعى. مۇندا حورعا قاتىسىپ، ءان ايتامىن، وزىممەن پىكىرلەس ادامدارمەن كەزدەسىپ، وي بولىسەمىن. مۇنداي ورتالىقتاردىڭ ەگدە جاندارعا بەرەرى كوپ»، - دەدى مادەنيەت قايراتكەرى، اباي اتىنداعى وپەرا جانە بالەت تەاترىنىڭ بۇرىنعى ءسوليسى قانات قۇلىمجانوۆ.
ەرماحانوۆا كۇنسۇلۋ بەلسەندى ۇزاق ءومىر ءسۇرۋ ورتالىعىنداعى حور مەن شىعارماشىلىق ساباقتارعا تۇراقتى قاتىسىپ كەلەدى. ول دا حورعا قاتىسىپ، ءان ايتىپ، شەبەرلىك ساعاتتارىنا قاتىسىپ شابىت العانىن ايتتى. بۇل – ورتالىقتاعى قارتتار ءۇشىن اسا ماڭىزدى ەكەن العا تارتتى.
اۋدان اكىمدىگىندە اتاپ وتكەندەي، جاڭادان اشىلعان ەكى بەلسەندى ۇزاق ءومىر ءسۇرۋ ورتالىعى ەگدە جاستاعى جانداردىڭ بوس ۋاقىتىن ءتيىمدى وتكىزۋگە، ءومىر ءسۇرۋ ساپاسىن جاقسارتۋعا، دەنساۋلىعىن نىعايتۋعا ىقپال ەتەدى.
الماتىدا بۇگىندە مۇنداي 19 بەلسەندى ۇزاق ءومىر ءسۇرۋ ورتالىعى جۇمىس ىستەيدى.