الماتى وڭتۇستىك كورەياداعى ەڭ جوعارى رەيتينگكە يە جوبالاردىڭ ءبىرى «مەنىڭ كىشكەنتاي بويداق جىگىتىم» (SBS) تەلەشوۋىنىڭ ءتۇسىرىلىم الاڭىنا اينالدى. وڭتۇستىك كورەيادا ميلليونداعان كورەرمەنى بار باعدارلاما اپتا سايىن ەفيرگە شىعادى، - دەپ حابارلايدى aqshamnews.kz.
تۇسىرىلىمگە تانىمال كورەي اكتەرلەرى پە چون نام، لي سون مين، كيم سون گيۋن جانە كيم چون سۋ قاتىستى. باعدارلاما الماتى قالاسى مەن ءوڭىردىڭ نەگىزگى تۋريستىك نىساندارىندا، اتاپ ايتقاندا كوكتوبەدە، شىمبۇلاقتا، مەدەۋدە، كوك بازاردا، كولساي كولدەرىندە جانە وزگە دە كورنەكتى ورىندا ءتۇسىرىلدى.
الماتىعا ارنالعان شىعارىلىم 2026 جىلى اقپان ايىنىڭ باسىندا SBS تەلەارناسىنان ەفيرگە شىعارىلادى دەپ جوسپارلانعان.
«مەنى بۇل ءوڭىردىڭ كورەيادا كەزدەسپەيتىن كەڭ تىنىستى، توسىن تابيعي كورىنىستەرى ەرەكشە قىزىقتىردى. الماتى كورەيادان الىس بولماسا دا، مۇنداعى تابيعات مۇلدە بولەك اسەر قالدىرادى. بۇل اۋاسى تازا، قالا ءومىرى مەن تابيعات بىر-بىرىمەن تابيعي ۇيلەسىم تاۋىپ، استاسىپ جاتقان قالا. كورەيامەن سالىستىرعاندا، مۇنداعى تابيعات الدەقايدا اۋقىمدى ءارى تابيعي قالپى جاقسى ساقتالعانداي اسەر سىيلايدى»، – دەپ جوبانىڭ رەجيسسەر-وپەراتورى الماتىنىڭ وزىنە ەرەكشە اسەر ەتكەنىن جەتكىزدى.
الماتىدا ءتۇسىرىلىم توبىنا Almaty Tourism Bureau كومانداسى قولداۋ كورسەتىپ، ۇيىمداستىرۋ جۇمىستارىن قامتاماسىز ەتتى. جوبا حالىقارالىق دەڭگەيدەگى ماڭىزدى اقپاراتتىق وقيعاعا اينالىپ، شەتەلدىك اۋديتوريانىڭ الماتىنىڭ تۋريستىك الەۋەتىنە دەگەن قىزىعۋشىلىعىن ارتتىردى.