ءوسىم ەڭ الدىمەن بازالىق زەينەتاقىنىڭ ەڭ تومەنگى مولشەرىن الاتىن زەينەتكەرلەردەن باستالادى.
ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا بازالىق زەينەتاقى مولشەرى الداعى 5 جىل بويى بىرتىندەپ وسەتىنىن ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«زەينەتاقى جانە الەۋمەتتىك ساقتاندىرۋ جۇيەلەرىنىڭ مىندەتتىلىگى جەكە مەنشىك ساقتاندىرۋ كومپانيالارىندا تومەن دەڭگەيدە. بۇل رەتتە ءوزىن-وزى جۇمىسپەن قامتىعاندار عانا ەمەس، جالدامالى جۇمىسكەرلەردىڭ بەلگىلى ءبىر بولىگى دە قامتىلماعان كۇيىندە قالىپ وتىر.
ەگەر كىرىستىڭ جوعارعى شەكتەرىن ەسكەرمەسەك، وندا زەينەتاقى جارنالارى مەن الەۋمەتتىك اۋدارىمدار اۋدارىلاتىن كىرىستەردىڭ دەڭگەيلەرى دە ءار ءتۇرلى بولادى. زەينەتاقى جارنالارىنىڭ ورتاشا تابىسى ەكونوميكا بويىنشا ورتاشا ايلىق جالاقىدان 20%-عا تومەن.
ءىرى جۇمىس بەرۋشىلەر مەن زياندى وندىرىستەردىڭ قىزمەتكەرلەرى جوعارى ساقتاندىرۋ تاريفتەرىنە، ءومىردى ساقتاندىرۋ كومپانيالارىنان تولەنەتىن تولەمدەردىڭ تومەن مولشەرىنە جانە ساقتاندىرۋ كومپانيالارى قىزمەتىنىڭ اشىقتىعىنا نازار اۋدارادى. شارا قولدانباۋ بولاشاقتا جۇيەنىڭ سەنىمى مەن قارجىلىق تۇراقتىلىعى ماسەلەلەرىنە اكەلۋى مۇمكىن»، – دەدى تامارا دۇيسەنوۆا ۆەدومستۆونىڭ كەڭەيتىلگەن القا ماجىلىسىندە.
مينيستر زەينەتاقى مەن ساقتاندىرۋ تولەمدەرىنىڭ مولشەرىن ءبىرىڭعاي جيناقتاۋشى زەينەتاقى جۇيەسىنە قاتىسۋ وتىلىنە بايلانىستى كەزەڭ-كەزەڭىمەن ۇلعايتۋ جالعاساتىنىن ايتتى.
«زەينەتاقى جۇيەسىنە مەملەكەت باسشىسىنىڭ تاپسىرماسى بويىنشا ەنگىزىلگەن وزگەرىستەر ازاماتتارعا بۇرىنعى تابىستارىنىڭ كەمىندە 40% مولشەرىندە زەينەتاقىمەن قامتاماسىز ەتۋگە مۇمكىندىك بەرەدى. ءوسىم ەڭ الدىمەن بازالىق زەينەتاقىنىڭ ەڭ تومەنگى مولشەرىن الاتىن زەينەتكەرلەردەن باستالادى. 2023 جىلى زەينەتكەرلەردىڭ وسى ساناتى ءۇشىن تەك بازالىق زەينەتاقى مولشەرى 21%-عا دەيىن كوتەرىلدى. كەزەڭ-كەزەڭمەن ءوسۋ 5 جىل ىشىندە، ياعني 2023 جىلدان 2027 جىلعا دەيىن جۇرگىزىلەدى. بۇل وتكەن جىلعى ينفلياسيانى جانە ونىڭ كەيىنگى جىلدارعا ارنالعان بولجامدى ءدالىزىن جابۋعا مۇمكىندىك بەرەدى»، - دەدى تامارا دۇيسەنوۆا.
ءدال وسىنداي جۇمىس الەۋمەتتىك ساقتاندىرۋ جۇيەسىندە جۇرگىزىلمەك.
«بيىل جۇمىسىنان ايىرىلۋىنا بايلانىستى بەرىلەتىن الەۋمەتتىك تولەمدەر مولشەرى جوعالتقان تابىستىڭ 45%-نا دەيىن جەتكىزىلەدى»، – دەدى ۆەدومستۆو باسشىسى.