بۇگىن، الماتى قالاسىندا قازاقستاننىڭ حالىق قاھارمانى، اتى اڭىزعا اينالعان ۇشقىش-عارىشكەر تالعات امانگەلدى ۇلى مۇسابايەۆپەن قوشتاسۋ ءراسىمى ءوتتى. قارالى جيىن وفيسەرلەر ۇيىندە ۇيىمداستىرىلدى، دەپ حابارلايدى اqshamnews.kz ءتىلشىسى.
قوشتاسۋ راسىمىنە مارقۇمنىڭ وتباسى مەن تۋىستارى، ارىپتەستەرى مەن دوستارى، قوعام جانە مەملەكەتتىك مەكەمەلەر وكىلدەرى قاتىستى. قاتىسۋشىلار قاتارىندا ق ر مەملەكەتتىك كەڭەسشىسى ەرلان قارين، قازاقستاننىڭ تۇڭعىش عارىشكەرى توقتار اۋباكىروۆ، حالىق قاھارمانى، ۇشقىش-عارىشكەر ايدىن ايىمبەتوۆ، الماتى قالالىق ءماسليحاتىنىڭ ءتوراعاسى مەيىرجان وتىنشييەۆ، قورعانىس جانە اەروعارىش سالاسىنىڭ باسشىلارى بولدى.
ايتا كەتەيىك، مەملەكەت باسشىسى قاسىم-جومارت توقايەۆ تالعات مۇسابايەۆپەن قوشتاسۋ ءراسىمىن جوعارى دەڭگەيدە وتكىزۋگە ارنايى تاپسىرما بەرگەن.
سۋرەت: aqshamnews.kz/نۇربول ىنتىماق ۇلى
استانادان ارنايى كەلگەن قوناقتار ءسوز سويلەدى
مەملەكەتتىك كەڭەسشى ەرلان قارين قارالى جيىندا ءسوز سويلەپ، مارقۇمنىڭ تۋعان-تۋىستارىنا كوڭىل ايتتى:
"حالىق قاھارمانى تالعات مۇسابايەۆتىڭ قازاسىنا وراي بارشاڭىزعا قايعىرىپ كوڭىل ايتامىن. قارالى حابار جەتكەن بويدا مەملەكەت باسشىسى قاسىم-جومارت توقايەۆ قوشتاسۋ ءراسىمىن ۇيىمداستىرۋ تۋرالى تاپسىرما بەردى. بۇگىن استانادان قورعانىس مينيسترلىگى، اەروعارىش سالاسىنىڭ وكىلدەرى جانە حالىق قاھارماندارى توقتار اۋباكىروۆ پەن ايدىن ايىمبەتوۆ ارنايى كەلىپ وتىر. بۇل - مەملەكەت باسشىلىعىنىڭ تالعات مۇسابايەۆقا دەگەن ەرەكشە قۇرمەتىنىڭ بەلگىسى" دەدى ول.
سۋرەت: aqshamnews.kz/نۇربول ىنتىماق ۇلى
"مۇسابايەۆتىڭ ەسىمى ەل تاريحىندا ماڭگىگە جازىلدى"
عارىشكەر ءارى ارىپتەسى، حالىق قاھارمانى توقتار اۋباكىروۆ قوشتاسۋ سوزىندە تالعات مۇسابايەۆتىڭ عارىش سالاسىنا قوسقان ولشەۋسىز ۇلەسىن اتاپ ءوتتى:
"قاي جەردە جۇرسەك تە، قاي عارىش ايلاعىنان ۇشساق تا، قايدا كەتسەك تە، ءبىز ءارقاشان ءوز كاسىبىمىزگە، عارىشقا ادال بولدىق. ويتكەنى عارىش ءبىزدى بىرىكتىردى. تالعات امانگەلدى ۇلى، سەن قازاقستان ءۇشىن كوپ ءىس تىندىردىڭ. سەن ناعىز پاتريوت ەدىڭ. مۇنى مەن دە، بۇكىل حالىق تا كورىپ، كۋا بولدى. سەن ءبارىن تازا جۇرەكپەن، ادال نيەتپەن جاسادىڭ. ەڭ ماڭىزدىسى - سەندە ءاردايىم وزگەلەردە كەزدەسپەيتىن يدەيالار بولدى. سول يدەيالاردى ىسكە اسىرا الدىڭ. ساعان سوڭعى رەت قوش ايتىپ، وتباسىڭا، حالقىڭا مىنا نارسەنى جەتكىزگىم كەلەدى: قازاقستان سەنى ەشقاشان ۇمىتپايدى. سەنىڭ اتىڭ ەل تاريحىندا ماڭگىلىككە جازىلدى. جاتقان جەرىڭ جايلى بولسىن، قىمباتتى دوس!" دەدى توقتار اۋباكىروۆ.
سۋرەت: aqshamnews.kz/نۇربول ىنتىماق ۇلى
سوڭعى ساپار
قوشتاسۋ راسىمىنەن كەيىن 28 گۆاردياشى-پانفيلوۆشىلار اتىنداعى ساياباقتا قارالى ميتينگ ءوتتى. مارقۇم تالعات مۇسابايەۆتىڭ دەنەسى كەڭساي زيراتىنا جەرلەندى.
ەسكە سالايىق، حالىق قاھارمانى، ۇشقىش-عارىشكەر تالعات مۇسابايەۆ 4 تامىزدا ومىردەن وتكەن بولاتىن. ول - قازاقستاننىڭ عارىش سالاسىن الەمگە تانىتقان، ەلدىڭ دامۋىنا ۇلكەن ۇلەس قوسقان بىرەگەي تۇلعا ەدى. مۇسابايەۆ ارتىندا وشپەس ءىز، ۇرپاققا ونەگە قالدىردى.