شىندىعىندا ونىڭ مۇنداي قۇقىعى بولماعان.
الماتىدا تاكسي جۇرگىزۋشىسى جولاۋشىلاردى زاڭسىز تاسىمالداعان، دەپ حابارلايدى Almaty-akshamy.kz Polisia.kz-كە سىلتەمە جاساپ.
تۇركسىب اۋداندىق كوشى-قون قىزمەتىنىڭ قىزمەتكەرلەرى جولاۋشىلاردى زاڭسىز تاسىمالداعان تاكسي جۇرگىزۋشىسىن انىقتادى.
«جەرگىلىكتى ءىس-شارا بارىسىندا سەيفۋللين داڭعىلى مەن ايماۋىتوۆ كوشەسىنىڭ قيىلىسىندا تانىمال رەسۋرسقا تىركەلىپ، جولاۋشىلار تاسىمالىمەن اينالىسقان وزبەكستان رەسپۋبليكاسىنىڭ ازاماتى 27 جاستاعى م. ەسىمدى ازاماتتىڭ باسقارۋىنداعى Chevrolet كولىگى توقتاتىلدى. شىندىعىندا، ونىڭ مۇنداي قۇقىعى بولماعان. شەتەلدىك ازاماتقا قاتىستى ق ر اقبتك-نىڭ 517-بابى 5-بولىگى بويىنشا اكىمشىلىك قۇقىقبۇزۋشىلىق تۋرالى حاتتاما تولتىرىلدى. ءىس جۇرگىزۋ ماتەريالدارى شەشىم شىعارۋ ءۇشىن سوتقا جىبەرىلدى. سونداي-اق جۇمىس بەرۋشىگە قاتىستى اكىمشىلىك ىقپال ەتۋ شارالارى قولدانىلىپ، وعان ق ر اقبتك-نىڭ 519-بابى 1-بولىگىمەن حاتتاما تولتىرىلدى. سونىمەن قاتار الماتى قالاسى بويىنشا مەملەكەتتىك كىرىستەر دەپارتامەنتىنە جولداۋ ءۇشىن ق ر اقبتك-نىڭ 613-بابى 2-بولىگىنە سايكەس جەكە ماتەريال ءبولىندى. كولىك مامانداندىرىلعان ايىپپۇل تۇراعىنا قويىلدى»، – دەدى الماتى قالالىق پد كوشى-قون قىزمەتى باسقارماسىنىڭ باستىعى اسحات بۋتۋنچينوۆ. سونداي-اق اسحات بۋتۋنچينوۆ الماتىدا «نەلەگال» ءىس-شاراسىنىڭ اياقتالعانىن حابارلادى.
«سەگىز كۇن ىشىندە كوشى-قون زاڭناماسىن بۇزعانى ءۇشىن 1229 ادام اكىمشىلىك جاۋاپكەرشىلىككە تارتىلدى، ونىڭ 665ء-ى شەتەل ازاماتتارى. سوت شەشىمىمەن 70 شەتەلدىك ق ر اۋماعىنان شىعارىلدى. سونىمەن قاتار شەتەلدىكتەردىڭ ەلىمىزدە بولۋىنىڭ زاڭدىلىعىن قامتاماسىز ەتۋ شارالارىن قولدانباعانى ءۇشىن 531 وتانداسىمىز اكىمشىلىك جاۋاپكەرشىلىككە تارتىلدى. شەتەلدىك جۇمىس كۇشىن تارتۋ ەرەجەلەرىن بۇزعان 33 جۇمىس بەرۋشىگە ايىپپۇل سالىندى. قۇجاتسىز جۇرگەن 275 شەتەل ازاماتى جەكە باسىن انىقتاعانعا دەيىن پد-نىڭ قابىلداپ-تاراتۋ بولىمىنە ورنالاستىرىلدى»، – دەدى بۋتۋنچينوۆ.