الماتىدا قوعامدىق كولىكتى ەكولوگيالاندىرۋ جۇمىستارى اياسىندا تاعى ەكى باعىتتاعى اۆتوبۋستار جاڭارتىلدى.
№52 مارشرۋتتا ورتاشا ديزەلدى اۆتوبۋستاردىڭ ورنىنا «Foton» ماركالى سىيىمدىلىعى جوعارى گازبەن جۇرەتىن اۆتوبۋستار جۇرە باستادى. سونىمەن قاتار، اۆتوبۋستاردىڭ جولاۋشىلار تاسىمالىنا جوسپارلى شىعۋى جۇمىس كۇندەرى 16-دان 25 بىرلىككە دەيىن، دەمالىس كۇندەرى 14-تەن 20 بىرلىككە دەيىن ۇلعايتىلدى. سونىڭ ناتيجەسىندە جوسپارلى ارالىق جۇمىس كۇندەرى 11-دەن 9 مينۋتقا دەيىن جانە دەمالىس كۇندەرى 14-تەن 11 مينۋتقا دەيىن قىسقاردى.
سونداي-اق، قالا تۇرعىندارىنىڭ ءوتىنىشى بويىنشا №24 مارشرۋتقا «Yutong» ماركالى سىيىمدىلىعى جوعارى اۆتوبۋستار شىعارىلدى. «وجەت ش/ا -سولتۇستىك» – «ەكوبەكەت» قاتىناسىنداعى مارشرۋتتاعى جىلجىمالى قۇرامنىڭ سانى 12 بىرلىك، جوسپارلى قوزعالىس ارالىعى 15 مين.
ەستەرىڭىزگە سالا كەتەيىك، بىلتىر مەگاپوليس باسشىسى ەربولات دوسايەۆتىڭ تاپسىرماسىمەن اكىمدىك 600 اۆتوبۋس پەن 100 تروللەيبۋس ساتىپ الىپ، 22 جاڭا مارشرۋت، ونىڭ ىشىندە 10 قالا ماڭىنداعى باعىت ۇيىمداستىرىپ، 50-گە جۋىق ەلدى مەكەندى قامتىدى. بيىل تاعى 600 اۆتوبۋس، 100 تروللەيبۋس جانە ەلەكتر قۋاتىمەن جۇرەتىن 100 اۆتوبۋس ساتىپ الۋ جوسپارلانىپ وتىر.