ق ر بعم جۇرگىزگەن قايتا تەكسەرۋ جۇمىستارىنىڭ ناتيجەسىندە قالامىزدا ورنالاسقان شەت تىلدەر جانە ىسكەرلىك كارەرا ۋنيۆەرسيتەتى ليسەنزياسىنان ايىرىلۋ الدىندا تۇر.
ءبىلىم جانە عىلىم سالاسىنداعى ساپانى قامتاماسىز ەتۋ كوميتەتى شەت تىلدەر جانە ىسكەرلىك كارەرا ۋنيۆەرسيتەتى ليسەنزياسىنىڭ قولدانىلۋىن توقتاتتى، دەپ حابارلايدى Almaty-akshamy.kz ق ر بعم باسپا ءسوز قىزمەتىنە سىلتەمە جاساپ.
«ءبىز ەلىمىزدە ءبىلىم بەرۋ ساپاسى مەن كادرلار دايارلاۋدى جاقسارتۋ ءۇشىن جوعارى وقۋ ورىندارىندا تەكسەرۋلەر جۇرگىزەمىز. ەگەر ۋنيۆەرسيتەتتەر قاجەتتى تالاپتارعا ساي بولماسا، وندا ەرتەڭ ءبىلىمى مەن بىلىكتىلىگى تومەن، ەڭبەك نارىعىنا جۇمىس بەرۋشىلەردىڭ سۇرانىستارىنا سايكەس كەلمەيتىن ماماندار شىعادى. بۇل رەتتە جوعارى وقۋ ورىندارىنا بۇزۋشىلىقتاردى جويۋعا ۋاقىت بەرەمىز، الايدا ولار كەمشىلىكتەرمەن جۇمىس جۇرگىزبەيدى. وسىعان بايلانىستى كەيىنىرەك قاتاڭ شارالار قولدانۋعا تۋرا كەلەدى. ۋنيۆەرسيتەتتەردىڭ وقۋ جاعدايلارىن، ءبىلىم بەرۋ باعدارلامالارىن جانە تۇتاستاي العاندا، ستۋدەنتتەردى بەلگىلى ءبىر ماماندىقتارعا وقىتۋعا دەگەن كوزقاراسىن جاقسارتۋى ءۇشىن بۇل وتە ماڭىزدى. ايتپەسە، جوعارى وقۋ ورىندارى ساپالى ءبىلىم ەمەس، تەك ديپلومدار بەرەتىن بولادى. مىسالى، شەت تىلدەر جانە ىسكەرلىك كارەرا ۋنيۆەرسيتەتىندە ءبىلىم بەرۋ ساپاسىن قامتاماسىز ەتۋدىڭ ىشكى جۇيەسى قالىپتاسپاعان. ءبىلىم بەرۋ باعدارلامالارىن، جەكە وقۋ جوسپارلارىن تالداۋ بەلگىلى ءبىر پاندەر بويىنشا كرەديتتەردى يگەرۋدە ۇلكەن ايىرماشىلىقتاردى كورسەتتى. تيىسىنشە، ءبىلىم الۋشىلار پاندەردى تولىق كولەمدە مەڭگەرمەيدى. وقىتۋ ناتيجەلەرى بويىنشا ستۋدەنتتەردىڭ 90%-ى شەكتى دەڭگەيدەن وتە المادى. وقۋ پروسەسىندە ءتىپتى ەڭ تومەنگى بەلگىلەنگەن تالاپتارعا سايكەس كەلمەيتىن ەسكىرگەن كومپيۋتەرلەر قولدانىلادى. بەيىندىك ماگيستراتۋرا تۇلەگىنە عىلىمي-پەداگوگيكالىق باعىتتاعى ماگيستر دارەجەسىن بەرۋ بويىنشا بۇزۋشىلىقتار دا انىقتالدى. مەملەكەتتىك اتتەستاتتاۋ كوميسسياسىنىڭ شەشىمىمەن ءبىر جىلدىق ماگيستراتۋرا تۇلەگىنە ەكى جىلدىق ماگيستر دارەجەسى بەرىلدى. بۇلار جوعارى وقۋ ورنىندا انىقتالعان بۇزۋشىلىقتاردىڭ از عانا بولىگى»، – دەپ اتاپ ءوتتى ق ر بعم ءبىلىم جانە عىلىم سالاسىنداعى ساپانى قامتاماسىز ەتۋ كوميتەتىنىڭ باسقارما باسشىسى ەلۆيرا ساپاربەكوۆا.
بۇدان ءارى باس ليسەنزيادان ايىرۋ جانە جوعارى وقۋ ورنىن جابۋ بويىنشا جۇمىس جۇرگىزىلەتىن بولادى. زاڭناماعا سايكەس، ليسەنزيانىڭ قولدانىلۋى توقتاتىلا تۇرعان جاعدايدا ستۋدەنتتەر ۋنيۆەرسيتەتتىڭ انىقتالعان بۇزۋشىلىقتاردى جويۋىن كۇتپەي-اق، باسقا جوعارى وقۋ ورىندارىنا اۋىسا الادى.