توكيو وليمپياداسىنىڭ كورەرمەنسىز وتەتىنىن بۇدان بۇرىن حابارلاعانبىز، ءتىپتى جاپونيالىقتار دا ويىنداردى ءوز كوزىمەن كورە المايتىن بولدى.
XXXII جازعى وليمپيادا ويىندارى توكيودا 23 شىلدەدە باستالادى. قازاقستان قۇراماسى 27 سپورت تۇرىنەن 97 ليسەنزيانى جەڭىپ الدى، دەپ حابارلايدى Almaty-akshamy.kz
دۇنيە جۇزىندە قالىپتاسقان ەپيداحۋالدىڭ ناشارلاۋىنا بايلانىستى بۇكىل الەم حالقى وليمپيادانى ونلاين-ترانسلياسيالاردان كورەدى. ءبىراق بيىل وليمپيادا ويىندارىنىڭ ترانسلياسياسى قازاقستاندىق تەلەارنالاردان كورسەتىلمەيتىن بولدى.
«توكيوداعى وليمپيادا ويىندارىنىڭ تىكەلەي ەفير قۇقىعى Dentsu Inc. كومپانياسىنا تيەسىلى. Qazaqstan، Qazsport جانە «حابار» رەسپۋبليكالىق تەلەارنالارى Dentsu Inc. كومپانياسىمەن 2019 جىلدان بەرى كەلىسسوزدەر جۇرگىزۋگە تىرىسقان. الايدا ۇزاققا سوزىلعان كەلىسسوزدەرگە قاراماستان، ەكى تاراپ كەلىسىمگە كەلە المادى. قۇقىق يەسى ويىنداردى ترانسلياسيالاۋعا ليسەنزيانىڭ باعاسىن 2016 جانە 2018 جىلدارداعى باعامەن سالىستىرعاندا 123%-عا ارتىق بەلگىلەگەن»، – دەلىنگەن «قازاقستان» ترك اق باسپا ءسوز قىزمەتىنىڭ حابارلاماسىندا.
بۇل اقپاراتتى الماتى قالاسى دەنە شىنىقتىرۋ جانە سپورت باسقارماسىنىڭ باسپا ءسوز قىزمەتىنىڭ باسشىسى دانيار كارىمجان ءوزىنىڭ فب پاراقشاسىندا جاريالاعان.