سالتاناتتى شارا الماتى قالاسى ناۋرىزباي اۋدانىنداعى №157 ورتا مەكتەپتە ءوتتى.
وعان الماتى قالالىق پوليسيا دەپارتامەنتىنىڭ باسشىلىعى، “جاس ساقشى” پوليسيا سىنىبىنىڭ وقۋشىلارى، جوعارى سىنىپ وقۋشىلارى، مۇعالىمدەر، پوليسيا قىزمەتكەرلەرى، ءىىو ارداگەرلەرى قاتىستى، دەپ حابارلايدى aqshamnews.kz Polisia.kz-كە سىلتەمە جاساپ.
“جاس ساقشى” پوليسيا سىنىپتارىن قۇرۋ – ىشكى ىستەر مينيسترلىگىنىڭ باسىم جوباسى جانە ەڭ الدىمەن پاتريوتيزم مەن وتانعا دەگەن سۇيىسپەنشىلىكتى تاربيەلەۋگە، مەكتەپ ورتاسىندا قۇقىق بۇزۋشىلىقتىڭ الدىن الۋعا جانە ماماندىق تاڭداۋدا كومەك كورسەتۋگە باعىتتالعان. بۇل باستاما ءىىم ءۇشىن پوليسيانىڭ كاسىبي وزەگىن ساقتاۋدىڭ، ۇرپاقتار ساباقتاستىعىن قامتاماسىز ەتۋدىڭ، ۋاقىت وتە كەلە قالىپتاسقان وزىق داستۇرلەردى ناسيحاتتاۋدىڭ ەرەكشە ماڭىزدىلىعىن كورسەتەدى.
– مەملەكەت باسشىسى ەلىمىزدىڭ بولاشاعى جاستاردىڭ قولىندا ەكەنىن اتاپ ءوتتى. قۇرمەتتى وقۋشىلار! جاڭا جۇيەگە تەز جانە وڭاي بەيىمدەلۋلەرىڭىزگە تىلەكتەسپىن. شىڭداردى باعىندىرىڭىزدار، اقىلدى جانە رۋحى مىقتى بولىڭىزدار. قۇقىق قورعاۋ سالاسىنداعى جاڭا بىلىمدەر قۇقىقتىق ساۋاتتىلىق دەڭگەيىن ارتتىرۋعا جانە وسكەلەڭ ۇرپاقتىڭ مىنەز-قۇلىق مادەنيەتىن قالىپتاستىرۋعا، سونداي-اق بالالاردىڭ بويىندا وتانعا دەگەن سۇيىسپەنشىلىك پەن پاتريوتتىق رۋحتى تاربيەلەۋگە ىقپال ەتەدى. سىزدەردىڭ الەمدى جاقسارتۋعا دەگەن كۇشتەرىڭىز بەن ۇمتىلىستارىڭىز ءبىزدىڭ ورتاق ماقساتتارىمىزعا جەتۋگە كومەكتەسەتىنىنە سەنىمدىمىن. جاڭا وقۋ جىلى بارشاڭىزدى جاڭا جەتىستىكتەرگە جەتەلەي بەرسىن، – دەدى، الماتى قالالىق پوليسيا دەپارتامەنتىنىڭ باستىعى ارىستانعاني زاپپاروۆ.
قازاقستان رەسپۋبليكاسى ىشكى ىستەر مينيسترلىگى بيىلعى جىلدى “ەرلىك جانە پاتريوتتىق جىلى” دەپ جاريالادى. جاستار اراسىندا قاھارماندىق پەن ەرجۇرەكتىلىكتى دارىپتەۋ ماقساتىندا الماتى قالاسىنداعى 27 ورتا مەكتەپ پەن 1 كوللەدجدە قىزمەتتە قازا تاپقان الماتى قالالىق پوليسيا دەپارتامەنتىنىڭ 29 قىزمەتكەرىنىڭ قۇرمەتىنە “داڭق كابينەتتەرى” اشىلدى.