سونداي-اق 100 ساعات ءماجبۇرلى جۇمىسقا تارتۋ جازاسى تاعايىندالدى.
الماتىدا قانتتى ارزان باعاعا ساتۋدى ۇسىنعان كاسىپكەر الاياق سوتتالدى، دەپ حابارلايدى Almaty-akshamy.kz
Zakon.kzء-تىڭ حابارلاۋىنشا، بوستاندىق اۋدانىنىڭ №2 اۋداندىق سوتىندا الاياقتىق (قك-نىڭ 190-بابى، 3-بولىگى، 4-تارماعى) بويىنشا كىنالى دەپ تانىلعان ا.-عا قاتىستى قىلمىستىق ءىس قارالدى.
سوتتا انىقتالعانداي، سوتتالۋشى ا. 2022 جىلدىڭ ءساۋىر ايىندا ساۋدا ورتالىعىنا كەلىپ، جابىرلەنۋشىلەرگە 17 قاپ قانتتى ارزان باعامەن ساتىپ الۋدى، سودان كەيىن ولارعا ساتىپ الۋشىلاردى تاۋىپ، ساتۋدى ۇسىنعان.
«سوتتالۋشىنىڭ پايداكۇنەمدىك نيەتىنەن بەيحابار جابىرلەنۋشىلەر بۇل ۇسىنىسپەن كەلىسىپ، اقشانى الاياقتىڭ ەسەپشوتىنا اۋدارعان. اقشانى الىپ، سوتتالۋشى قىلمىس ورنىنان بوي تاسالاپ، تەلەفونىن ءوشىرىپ، قىلمىستىق جولمەن الىنعان اقشانى ءوزىنىڭ جەكە قاجەتتىلىكتەرىنە جۇمساعان، سول ارقىلى جابىرلەنۋشىلەرگە جالپى سوماسى 235 مىڭ تەڭگە ماتەريالدىق زالال كەلتىرگەن»، - دەلىنگەن الماتى قالاسى بوستاندىق اۋدانىنىڭ №2 اۋداندىق سوتىنىڭ باسپا ءسوز قىزمەتى تاراتقان اقپاراتتا.
بۇل قىلمىس ءۇشىن قىلمىستىق كودەكستە ءۇش جىلدان جەتى جىلعا دەيىنگى مەرزىمگە باس بوستاندىعىن شەكتەۋ نەمەسە مۇلكى تاركىلەنىپ، سول مەرزىمگە باس بوستاندىعىنان ايىرۋ تۇرىندەگى جازا قاراستىرىلعان.
سوتتا پروكۋرور ايىپتالۋشىنى ءۇش جىلعا باس بوستاندىعىنان ايىرۋدى سۇرادى. سوتتالۋشى ءوز كىناسىن تولىق مويىنداپ، وكىندى.
«سوت ۇكىمىمەن ا. الاياقتىق جاساعانى ءۇشىن كىنالى دەپ تانىلىپ، وعان پروباسيالىق باقىلاۋ ورناتۋ ارقىلى 3،6 جىلعا باس بوستاندىعىن شەكتەۋ، سونداي-اق 100 ساعات ءماجبۇرلى جۇمىسقا تارتۋ جازاسى تاعايىندالدى. جابىرلەنۋشىلەردىڭ ازاماتتىق تالاپ ارىزى تولىق كولەمدە قاناعاتتاندىرىلدى»، دەپ مالىمدەدى الماتى قالاسى بوستاندىق اۋدانىنىڭ No2 اۋداندىق سوتىنىڭ باسپا ءسوز قىزمەتى.
سوت جازا تاعايىنداۋ كەزىندە كىنانى مويىنداۋ، وكىنۋ، اسىراۋىندا كامەلەتكە تولماعان بالانىڭ بولۋى سياقتى جەڭىلدەتەتىن ءمان-جايلاردى ەسكەردى.
ۇكىم زاڭدى كۇشىنە ەندى.