مەديسينا قىزمەتكەرىنە پرەميا تابىستالدى.
قازاننىڭ 19 كۇنى قازاق تاعامتانۋ اكادەمياسىنىڭ پرەزيدەنتى تورەگەلدى شارمانوۆ 92 جاسقا تولدى، دەپ حابارلايدى Almaty-akshamy.kz Almaty.tv سىلتەمە جاساپ.
مەملەكەت جانە قوعام قايراتكەرىن قۇتتىقتاۋعا الماتى قالاسى اكىمىنىڭ اتىنان ورىنباسارى اسەم ءنۇسىپوۆا ارنايى باردى. جينالعاندار اكادەميكتىڭ دەنساۋلىق ساقتاۋ سالاسىنىڭ دامۋىنا قوسقان ۇلەسى زور ەكەنىن ايتتى. تىڭ عىلىمي جاڭالىقتاردىڭ جارشىسى، ەلىمىزگە ەرەكشە ەڭبەگى سىڭگەن مەملەكەت قايراتكەرىن قۇتتىقتاۋعا زيالى قاۋىم وكىلدەرى، مەديسينا سالاسىنىڭ ۇزدىكتەرى جينالدى.
«تورەگەلدى شارمانوۆ اعامىز – ومىرگە دەگەن قۇشتارلىقتى ادامنىڭ دەنساۋلىعىن قۋاتتى ەتۋ ارقىلى ۇلتتىڭ ساپاسىن كوتەرۋگە وراسان ەڭبەك ءسىڭىرىپ جۇرگەن تۇلعا»، – دەدى «تورەگەلدى شارمانوۆ حالىقارالىق قورى» قامقورشىلىق كەڭەسىنىڭ ءتوراعاسى قۋانىش سۇلتانوۆ.
تورەگەلدى شارمانوۆتىڭ حالىقارالىق قورى بىلتىر قۇرىلعان بولاتىن. قۇرامىندا قازاقتىڭ بەتكەۇستارلارى ولجاس سۇلەيمەنوۆ، ءاسانالى ءاشىموۆ جانە مۇرات اۋەزوۆ بار. بۇگىن قور قىزمەتى اياسىندا ەڭبەگى كوپكە تيگەن مەديسينا قىزمەتكەرىنە پرەميا تابىستالدى. مۇنداعى ماقسات – تىڭ جاڭالىق اشقان جاس عالىمدار مەن دارىگەرلەردى قولداۋ. بولاشاقتا قوردىڭ جۇمىسىن جانداندىرۋ كوزدەلىپ وتىر.
«مەنىڭ ولاردىڭ الدىنا قوياتىنىم بۇرىن-سوڭدى بولماعان جاڭا تاسىلدەرمەن ەمدەپ، ونى دالەلدەپ، انىقتالعانىنا بايلانىستى لاۋرەات اتاعى بەرىلەدى. بىلتىر كورونوۆيرۋسقا قارسى كەرەمەت پروتوكول جاساعان ادامدار الدى. سىرت مەملەكەتتەن - 2 ادام، وزىمىزدەن - 2 ادام. بيىل دا سونداي ادامداردى تاڭداپ، مەنىڭ تۋعان كۇنىمدە سول پرەميانى تابىس ەتەمىن»، – دەدى قازاق تاعامتانۋ اكادەمياسىنىڭ پرەزيدەنتى تورەگەلدى شارمانوۆ.
