ۆەرنيساجدا «تاۋ»، «گۇلدەر»، «اسپان دەنەلەرى» جانە باسقا دا توپتامالاردان قۇرالعان تۋىندىلار قويىلادى، دەپ حابارلايدى aqshamnews.kz.
كورمەنىڭ مازمۇندىق وزەگىن اۆتوردىڭ «انتيلابيرينت» اتتى كارتينالار سەرياسى قۇرايدى. «انتيلابيرينت» –اۆتوردىڭ ءوزى ويلاپ تاپقان، بۇرىن-سوڭدى بولماعان ۇعىم. بۇل – ءاربىر جول مىندەتتى تۇردە ماقساتقا اپاراتىن، لابيرينتكە قاراما-قايشى تۇجىرىمداما.
جازيرا جانابايەۆا – ەۋرازيالىق شىعارماشىلىق گيلدياسىنىڭ مۇشەسى، كاسىبي سۋرەتشى. ونىڭ شىعارمالارى ەۋروپا مۋزەيلەرىندە جانە الەمنىڭ ءتۇرلى ەلدەرىندەگى جەكە كوللەكسيالاردا ساقتاۋلى. سونداي-اق، تۋىندىلارى حالىقارالىق بايقاۋلار مەن كورمەلەردە قازىلار القاسى تاراپىنان جوعارى باعالانعان.
بيىل جازيرا يسپاندىق «TARTget Painting Prize 2025» بەلدى سۋرەت كونكۋرسىنىڭ ءفيناليستى اتاندى. ال 2025 جىلدىڭ مامىر ايىندا لوندوندا وتەتىن Woman’s Essence Show 2025 كورمەسىندە St.Art Gallery گالەرەياسىندا توپتىق كورمەگە قاتىسىپ، Woman’s Art Award جۇلدەسىنە يە بولماق. بۇل كورمەنىڭ كۋراتورى – ۆەنەسياندىق بيەننالەنىڭ ۇلتتىق پاۆيلوندارىنىڭ كۋراتورى جانە ميلاننىڭ برەرا سۋرەت اكادەمياسىنىڭ پروفەسسورى ۆيۆيانا ۆاننۋچچي.
اۆتور «كوركەم تەكستيل» ماماندىعى بويىنشا اكادەميالىق ءبىلىم العان. ونىڭ سۇيىكتى تەحنيكالارى – جىبەككە سۋرەت سالۋ جانە قولمەن توقىما توقۋ. سونىمەن قاتار، جازيرا جانابايەۆا الماتىداعى ەڭ كونە بەينەلەۋ ونەرى ستۋديالارىنىڭ ءبىرى – «سينيايا چەرەپاحا» ستۋدياسىنىڭ باسشىسى بولىپ 20 جىلدان استام قىزمەت اتقارىپ كەلەدى. ق ر ورتالىق مۋزەيىندە «سينيايا چەرەپاحا» ارت-ستۋدياسىنىڭ كوپتەگەن كورمەلەرى ۇلكەن تابىسپەن ۇيىمداستىرىلىپ، وعان 150-دەن استام بالا قاتىستى.
سۋرەتشىنىڭ مانيفەستى: «مەن ۇلتتىق قولدانبالى ونەر داستۇرلەرىن ساقتاۋدى عانا ەمەس، ولاردى جاڭعىرتۋدى دا ماقسات ەتەمىن. مەنىڭ ماقساتىم - گوبەلەن، باتيك، كيىز سياقتى ونەر تۇرلەرىن قازىرگى زامانعى ارت-ديسكۋرسقا ەنگىزۋ. بارلىق جۇمىستارىما تەك ەكولوگيالىق تازا ماتەريالداردى – جىبەك پەن ءجۇندى قولدانامىن. سوڭعى 15 جىلدا شىعارماشىلىق تاجىريبەم ماندالا ونەرىمەن تولىقتى. ءداستۇرلى ماندالا – بۇل ورتالىقتان باستالاتىن دوڭگەلەك سۋرەت، ول رۋحاني تاجىريبەلەردە، ارت-تەراپيادا جانە ونەردە قولدانىلادى. مەن باعدارلامالاۋشى ماندالالارمەن جۇمىس ىستەيمىن. ماندالا جاساۋدىڭ بارىسىندا مەديتاسيا، ءتۇس پسيحولوگياسى، ويۋ-ورنەكتەردىڭ سيمۆوليكاسى، تۇستەردىڭ ءتىلىن، قازاق تايپالارىنىڭ كونە تاڭبالارىن جانە نۋمەرولوگيانى قولدانامىن. ماندالا كەڭىستىگىندە مەن سانادان تىس كۇيگە قول جەتكىزىپ، ءتىرى شىعارماشىلىق پروسەسسىنە سەنىم ارتۋعا مۇمكىندىك الامىن، الەۋمەتتىك، گەندەرلىك نەمەسە كاسىبي شارتتاردان تاۋەلسىز بولامىن. ماندالا – بۇل شىعارماشىلىق مەديتاسيا. دوڭگەلەك. ابسوليۋت. تولىقتىق. بوساتۋ. وزىڭمەن جانە الەممەن ءبىرتۇتاس بولۋ مۇمكىندىگى. ماندالا – بۇل الەمگە جىبەرىلگەن حابارلاما، مانيفەست».
اۆتوردىڭ كەلەسى جەكە كورمەسى مامىر ايىندا لوندوندا ەۋرازيالىق شىعارماشىلىق گيلدياسىنىڭ ارت-فەستيۆالى اياسىندا وتەدى.
جازيرا جانابايەۆا 15 جىلدان استام ۋاقىتتان بەرى ماندالا ونەرىمەن اينالىسىپ كەلەدى. ونىڭ كورمەسىندە ءومىر فيلوسوفياسىن، ساكرالدى ءسيمۆوليزمدى بەينەلەيتىن، ادامنىڭ رۋحاني كۇيى مەن جان دۇنيەسىن ايقىندايتىن، سونداي-اق ۇزاق ءومىر سۇرۋگە، كۇش-قۋاتتى ارتتىرۋعا جانە ۇرپاقتىڭ بولاشاعىن قورعاۋ ءۇشىن باعىتتالعان 20-عا جۋىق تۋىندى ۇسىنىلادى.
كورمە 2025 ج. 1 مامىرىنا دەيىن جالعاسادى.