قازىرگى ۋاقىتتا الماتى قالاسىندا 200 مىڭعا جۋىق ادام ورتالىق سۋمەن جابدىقتاۋ جۇيەسىنە تۇراقتى قوسىلماعان.
16 قاراشادا مەملەكەت باسشىسى قالا جۇرتشىلىعىمەن كەزدەسۋ وتكىزىپ، الماتىنىڭ ءاربىر ازاماتى ءۇشىن قولايلى ورتانى دامىتۋ جونىندە ءبىرقاتار تاپسىرمالار بەردى، دەپ حابارلايدى Almaty-akshamy.kz.
«تۇرعىنداردى ءبىرىنشى كەزەكتە قالانىڭ باتىس بولىگىندەگى حالىقتى اۋىز سۋمەن قامتاماسىز ەتۋ ماقساتىندا 2023 جىلدىڭ ماۋسىم ايىندا قارعالى وزەنىندە سۋ جيناۋ قۇرىلعىسىن سالۋ جۇمىستارىن اياقتاۋ جانە اقساي وزەنىندەگى سۋ جيناۋ قۇرىلعىسىنىڭ قۇرىلىس-مونتاجداۋ جۇمىستارىن ودان ءارى جۇرگىزۋ ءۇشىن كەلەسى جىلى 8،6 ملرد. تەڭگە قاراستىرىلعان»، - دەدى قالا اكىمى ەربولات دوسايەۆ.
4،4 ملرد. تەڭگەگە "نيجنيايا پياتيلەتكا"، "شۋاقتى"، "جاس قانات"، "كامەنسكوە پلاتو"، "كەڭساي" جانە ت.ب. شاعىناۋدانداردا سۋمەن قامتۋ جانە سۋ بۇرۋ جەلىلەرىنىڭ قۇرىلىسى جالعاساتىن بولادى.
"شاڭىراق-1،2"، "وجەت" شاعىناۋداندارىندا، قازىبايەۆ-رىسقۇلوۆ-تاتىبەكوۆ-رايىمبەك كوشەلەرىنىڭ بولىگىندە جانە ت.ب. 2023 جىلدىڭ سوڭىنا دەيىن 3،2 ملرد. تەڭگەگە ينجەنەرلىك جەلىلەردىڭ قۇرىلىسى اياقتالادى.
سونىمەن بىرگە، يۋبيلەينىيدان "كولساي" شاعىناۋدانىنا دەيىن، "العاباس" جانە "ماياك"، "شاپاعات" شاعىناۋداندارىندا، المەرەك اۋىلىندا 10،8 ملرد. تەڭگەگە سۋمەن جابدىقتاۋدىڭ ماگيسترالدى جانە تاراتۋشى جەلىلەرىنىڭ جاڭا قۇرىلىسى باستالادى، 170 مىڭعا جۋىق تۇرعىن قامتىلادى.
"كەمەل"، "المەرەك"، "كولحوزشى"، "شۋاقتى" شاعىناۋداندارىندا، پاللادين كوشەسىندە 4،6 ملرد. تەڭگە سوماسىنا ەلەكترمەن جابدىقتاۋ جەلىلەرى مەن «الماگۇل»، «تۇزدىباستاۋ» 2 پودستانسياسىنىڭ قۇرىلىسى اياقتالادى. بۇل 540 مىڭ تۇتىنۋشىنى ۇزدىكسىز ەلەكترمەن قامتاماسىز ەتۋگە مۇمكىندىك بەرەدى.
كەلەسى جىلى المالى جانە جەتىسۋ اۋداندارىنداعى ("اينابۇلاق" شاعىناۋدانى) جىلۋ جەلىلەرىن رەكونسترۋكسيالاۋ باستالادى. بۇل ماقساتتارعا بيۋدجەتتەن 1،6 ملرد. تەڭگە ءبولىندى. 1،5 ملرد. تەڭگەگە قازىبەك بي كوشەسىندەگى ابدۋليندەر مەن ءۋاليحانوۆ كوشەلەرىنىڭ اراسىنداعى جانە "قۇلاگەر" شاعىناۋدانىنىڭ 113 مىڭنان استام تۇرعىنى ءۇشىن جەلىلەردى رەكونسترۋكسيالاۋدى اياقتايمىز.
بوستاندىق، ناۋرىزباي اۋداندارىنداعى 450 مىڭ تۇتىنۋشىنى جىلۋمەن قامتاماسىز ەتۋ ماقساتىندا «وڭتۇستىك اۋداندىق قازاندىق» جانە «پرەمەرا-2» قازاندىعىن رەكونسترۋكسيالاۋدى اياقتاۋعا 530 ملن. استام تەڭگە قاراستىرىلعان.