قالانىڭ ءبىرشاما بولىگىن سۋدىڭ باسۋىنا سەبەپ بولعان 11 مامىر كۇنگى 33،8 مم كولەمدە جاۋعان جاۋىن-شاشىن بۇل ماسەلەنىڭ وزەكتىلىگىن تاعى ءبىر رەت دالەلدەدى.
الماتىدا جاۋىن كەزىندە سۋ باسىپ قالاتىن ورىنداردى بولدىرماۋعا باعىتتالعان ارىق جۇيەسى مەن سۋ شارۋاشىلىعى نىساندارىن مودەرنيزاسيالاۋدىڭ جوسپارى ازىرلەندى، دەپ حابارلايدى Almaty-akshamy.kz
اتاپ ايتقاندا، ارىق جەلىلەرىن ۇلىقبەك جانە ساين كوشەلەرىنىڭ قيىلىسىندا ورنالاسقان كوللەكتورعا شۇعىل قوسىلۋ بويىنشا جۇمىستار جۇرگىزىلۋدە، بۇل ءوز كەزەگىندە ارىق جەلىسىن سۋ وتكىزۋ قابىلەتتىلىگىن ۇلعايتىپ، تومەنگى اۋماقتارعا كەتەتىن سۋ اعىنىن ازايتۋعا مۇمكىندىك بەرەدى.
ارىق جۇيەسىن جاڭعىرتۋ جۇمىستارى ۇنەمى سۋ باساتىن تولە بي، ياسساۋي، مومىش ۇلى كوشەلەرى مەن رايىمبەك باتىر داڭعىلىندا دا جۇرگىزىلىپ جاتىر.
ەسكە سالساق، بۇرىندارى قالا اكىمى ەربولات دوسايەۆتىڭ تاپسىرماسىمەن سۋ باسۋ ماسەلەسىن شەشۋ ماقساتىندا سۋ شارۋاشىلىعى نىساندارى تەحنيكالىق جاي-كۇيىنە تالداۋ جۇرگىزىلدى. بۇل جۇمىستىڭ بارىسىندا قالا اۋماعىندا ۇنەمى سۋ باساتىن 56 ايماق انىقتالدى. سونىمەن قاتار پروبلەمالىق اۋماقتارداعى سۋ باسۋ ماسەلەسىن شەشۋ ءۇشىن جۇمىس ىستەپ تۇرعان ارىق جەلىلەرى مەن كوللەكتورلاردى وتكىزۋ قابىلەتىن ۇلعايتا وتىرىپ قايتا جاڭارتۋ جانە ءبىرىڭعاي جەلىگە قوسۋدى ۇيىمداستىرۋ قاجەتتىلىگى انىقتالدى.
قالا اۋماعىندا جاڭبىر جانە ەرىگەن قار سۋلارىن بۇرۋعا ارنالعان 16 كوللەكتور بار. زەرتتەۋ كورسەتكەندەي، ولار يەسىز جانە قىزمەت كورسەتىلمەگەن، قوقىستالعان، بىتەلگەن نەمەسە بۇزىلعان بولىپ تابىلادى. كوللەكتورلاردىڭ جالپى سانىنىڭ 12ء-سى ارىق جەلىلەرىنە قوسىلماعان. الاتاۋ اۋدانىندا 2013 جىلدان 2018 جىلعا دەيىن سالىنعان 4 كوللەكتور عانا ارىق جەلىلەرىمەن قوسىلعان جانە جۇمىس ىستەيدى.
بيىلعى جىلى جالپى ۇزىندىعى 376 كم بولاتىن قالانىڭ ارىق جەلىسىن سالۋ جانە مودەرنيزاسيالاۋ بويىنشا جوبا ازىرلەندى (باتىس بولىگى - الاتاۋ، ناۋرىزباي، اۋەزوۆ اۋداندارى، ورتالىق بولىگى - جەتىسۋ، بوستاندىق، المالى اۋداندارى، شىعىس بولىگى - مەدەۋ، تۇركسىب اۋداندارى).
جوبادا قولدانىستاعى ارىق جەلىلەرىن رەكونسترۋكسيالاۋ، جاڭا ارىقتاردىڭ نۇكتەلى قۇرىلىسىن جۇرگىزۋ قاراستىرىلعان.الايدا وسى جەلىلەردى جاسىل جەلەكتەردى سۋارۋعا پايدالانۋ كوزدەلمەگەن، جاڭبىر جانە ەرىگەن سۋلاردى قولدانىستاعى كوللەكتورلارعا بۇرۋ ەسكەرىلمەگەن، بۇل جەكەلەگەن اۋماقتاردىڭ سۋدىڭ استىنا قالۋىنا اكەپ سوعادى.
سوندىقتان قولدانىستاعى ارىق جەلىلەرى مەن كوللەكتورلاردىڭ وتكىزۋ قابىلەتىن ۇلعايتا وتىرىپ، ولاردى رەكونسترۋكسيالاۋ جانە قۇرىلىس جۇمىستارىن توقتاتپاي ءبىرىڭعاي جەلىگە قوسۋدى ۇيىمداستىرۋدى ەسكەرە وتىرىپ، جوباعا تۇزەتۋ ەنگىزىلەدى. بۇل جاسىل جەلەكتەردى سۋارۋعا جانە سۋ باسۋ ءقاۋپىنىڭ الدىن الۋعا مۇمكىندىك بەرەدى.
بۇگىندە كۇنى قالانىڭ باتىس بولىگىندە ۇزىندىعى 119 كم ارىق جەلىلەرىن سالۋ جانە رەكونسترۋكسيالاۋ بويىنشا قۇرىلىس-مونتاج جۇمىستارى جۇرگىزىلۋدە، ورىندالۋ مەرزىمى - 2021-2023 جىلدار.