الماتى اكىمى دارحان ساتىبالدى قالاداعى جەتەكشى جوعارى وقۋ ورىندارىنىڭ رەكتورىمەن كەزدەستى. جاڭا وقۋ جىلىنا دايىندىق، جاستار تاربيەسى، جاتاقحاناداعى جاعداي، ەكولوگيالىق ءبىلىم بەرۋ جانە عىلىمدى دامىتۋ جايى تالقىلاندى.
بۇگىندە الماتىدا ەلىمىزدىڭ بارلىق جوعارى وقۋ ورنىنىڭ ۇشتەن ءبىرى شوعىرلانعان، وندا 200 مىڭنان استام ستۋدەنت وقيدى. بۇل قالانىڭ جوعارى زياتكەرلىك الەۋەتىن قالىپتاستىرادى ءارى قالا بيلىگىنىڭ جۇيەلى قولداۋىن قاجەت ەتەدى.
«ءبىز اكىمدىك تاراپىنان ستۋدەنتتەردىڭ جاتاقحانادا تۇرىپ وقۋىنا جاعداي جاساۋعا تىرىسامىز. ەڭ باستىسى، ءبارىمىز بىرگە – اكىمدىك، جوعارى وقۋ ورىندارى مەن قوعام جاستاردى تاربيەلەۋگە، ولاردىڭ بويىنا ەڭبەك مادەنيەتىن سىڭىرۋگە، جاۋاپكەرشىلىكتى، قالاعا دەگەن قۇرمەتتى قالىپتاستىرۋعا ءتيىسپىز»، - دەدى دارحان ساتىبالدى.
كەزدەسۋ بارىسىندا قالا باسشىسى اكىمدىك جانىنان عىلىم جانە تەحنولوگيالار جونىندەگى قالالىق كەڭەستىڭ قۇرىلعانىن ەسكە سالدى. كەڭەس قۇرامىنا ۋنيۆەرسيتەت وكىلدەرى كىرەدى.
«الماتىنىڭ عىلىم ارقىلى دامۋىنا ىقپال ەتەتىن يدەيالاردى ىسكە اسىرۋ - ءبىزدىڭ ورتاق مىندەتىمىز»، - دەدى اكىم.
الماتىنىڭ تۇركى مەملەكەتتەرى جاستارىنىڭ استاناسى مارتەبەسىنە ەرەكشە نازار اۋدارىلدى. جىل اياسىندا جوعارى وقۋ ورىندارىنىڭ قولداۋىمەن مادەني جانە ءبىلىم بەرۋ ءىس-شارالارى وتەدى.
«مۇنداي مارتەبەگە يە بولۋ جوعارى قۇرمەت پەن ۇلكەن جاۋاپكەرشىلىك. بۇل ميسسيانى ءبارىمىز بىرگە لايىقتى جۇزەگە اسىرىپ جاتقانىمىزعا سەنىمدىمىن»، - دەدى اكىم.
رەكتورلار ءبىلىم بەرۋدى جاڭعىرتۋدان باستاپ ەكولوگيالىق باستامالارعا قاتىسۋعا دەيىنگى ماسەلەلەر بويىنشا بايانداما جاساپ، وي-پىكىرىن ءبىلدىردى. ستۋدەنتتىك كامپۋستارداعى جاعدايدى جاقسارتۋ، ينجەنەرلىك جانە پەداگوگيكالىق ءبىلىم بەرۋدى دامىتۋ، جاستاردىڭ حالىقارالىق جانە قالالىق جوبالارعا قاتىسۋى جونىندە ۇسىنىستار ايتىلدى.
ستۋدەنتتەردىڭ ءومىر ءسۇرۋ شارتتارى جەكە بلوكتا تالقىلاندى. اكىم جاتاقحانالاردىڭ جاعدايىن تەكسەرۋدىڭ ءبىرىنشى كەزەڭى باستالعانىن، ەكىنشى كەزەڭ تامىز ايىنا جوسپارلانعانىن ايتتى. ءبىلىم بەرۋ جۇمىسىن ۇيىمداستىرۋ جانە ستۋدەنتتەردىڭ قالالىق باستامالارعا قاتىسۋى ماڭىزدى باعىت بولىپ تانىلدى.
اكىم ستۋدەنتتەرگە قولداۋ بىلدىرەتىن داعدارىس ورتالىعىن، سونداي-اق قالادا احۋالدىق ورتالىقتى ىسكە قوسۋ جوسپارلارى تۋرالى ايتتى. بۇل ورتالىقتار ستۋدەنتتەر وتىنىشىنە دەر كەزىندە نازار اۋدارىپ، الەۋمەتتىك قاتەردىڭ الدىن الادى.
«ستۋدەنتتەر قالا ومىرىنە ءاتۇستى ەمەس، جۇيەلى تۇردە - سەنبىلىكتەن باستاپ قوعامدىق باستامالارعا دەيىن قاتىسۋعا كەڭىنەن تارتىلۋى كەرەك. سول كەزدە جاۋاپتى ءارى بەلسەندى ۇرپاق قالىپتاستىرا الامىز»، - دەپ ءسوزىن تۇيىندەدى دارحان ساتىبالدى.