الماتىدا قازاقستان رەسپۋبليكاسىنىڭ سپورت كۇنىنە ارنالعان سپورت فەستيۆالى ءوتىپ جاتىر.
ورتالىق ستاديوندا سپورت كۇنىنە ارنالعان اۋقىمدى ءىس-شارا ۇيىمداستىرىلدى. فەستيۆالگە قاتىسقان الماتى اكىمىنىڭ ورىنباسارى ازامات قالدىبەكوۆ جينالعان حالىقتى سپورت مەرەكەسىمەن قۇتتىقتادى.
- الماتى اكىمىنىڭ ىستىق ىقىلاسىن جەتكىزە وتىرىپ، سىزدەردى سپورت كۇنىمەن قۇتتىقتايمىن. بۇل - دەنساۋلىق، شىدامدىلىق جانە سەرگەكتىكتىڭ مەرەكەسى. حالىق دانالىعىندا “ءتانى ساۋدىڭ - جانى ساۋ” دەپ بەكەر ايتىلماعان. سپورتپەن شۇعىلدانۋ ادامنىڭ ءتانىن عانا ەمەس، رۋحىن دا شىنىقتىرادى. ەرىك-جىگەر، تاباندىلىق سىندى قاسيەتتەردى قالىپتاستىرادى. وسى قاعيدانى بەرىك ۇستانعان مەملەكەتىمىز باسەكە قابىلەتتى، دەنى ساۋ ۇرپاق ءوسىرۋ ءۇشىن بارلىق مۇمكىندىكتەردى جاساۋدا. بۇل ورايدا ەلىمىزدىڭ ءىرى سپورت ورتالىعىنا اينالعان الماتى قالاسىنىڭ مۇمكىنشىلىگى مول، - دەدى ازامات قالدىبەكوۆ.
فەستيۆالدىڭ باس ساحناسىندا ۆەدومستۆولىق ماراپاتتارمەن جانە الماتى اكىمىنىڭ العىس حاتىمەن ەلىمىزدە سپورتتىڭ دامۋىنا ۇلەس قوسقان جاتتىقتىرۋشىلار، سپورت مەكتەپتەرى مەن ۇيىمدارىنىڭ قىزمەتكەرلەرى، سونداي-اق سپورتشىلار ماراپاتتالدى.
ال ستاديون اينالاسى ءارتۇرلى سپورت تۇرلەرىنىڭ ايماقتارىنا ءبولىندى. وندا جاس سپورتشىلار ب ا ق سىنادى.
اتاپ ايتقاندا: جەڭىل اتلەتيكا بويىنشا بالالار قاشىقتىققا جۇگىرسە، ەكسترەمالدى اتلەتيكادان كەدەرگىلەر ارقىلى جۇگىرىپ جارىستى. ودان بولەك اشىق اسپان استىندا جايىلعان بوز كىلەمدە پالۋاندار قازاق كۇرەسى، سونداي-اق گرەك-ريم مەن ەركىن كۇرەستەن ءوزارا كۇشتىنى انىقتادى. سونىمەن قاتار ءبىر ايماقتا نيەت بىلدىرگەن ادامدار شاحمات پەن توعىزقۇمالاق ويناپ جاتسا، ستاديوننىڭ كەلەسى بولىگىندە كوماندالىق جارىستار: باسكەتبول 3ح3، فيدجيتال فۋتبولدان تۋرنير ۇيىمداستىرىلدى. كاراتە مەن تاەكۆوندودان وتكەن جالىندى جەكپە-جەكتەر دە جينالعان جۇرتشىلىقتىڭ نازارىنا ىلىكتى. ۇلكەن تەننيس ايماعىنداعى تارتىستى ويىندار دا كوپشىلىككە ۇناعانى ءسوزسىز.
قالانىڭ قاق ورتاسىنداعى سپورت فەستيۆالىنە 2016 جىلعى وليمپيادا چەمپيونى، سۋ سپورتى تۇرلەرى فەدەراسياسىنىڭ باس حاتشىسى دميتريي بالاندين دە قاتىستى. ول مۇنداي ءىس-شارالار وسكەلەڭ ۇرپاقتى سالاۋاتتى ءومىر سالتىنا باۋلىپ، بۇقارالىق سپورتتى دامىتۋ ءۇشىن ماڭىزدى ەكەنىن اتاپ ءوتتى.
- سپورت كۇنى - بۇل اتاۋلى داتالاردىڭ ءبىرى. ورتالىق ستاديون اينالاسىندا وسىنداي سپورت الاڭدارىنىڭ جاسالعانى وتە جاقسى بولدى. مۇندا تۇرعىندار بالالارىن ەرتىپ كەلىپ، كىشكەنتاي بۇلدىرشىندەر وزىنە ۇنايتىن سايىسقا قاتىسۋدا. سول ارقىلى بالالارىمىزدىڭ سپورتقا دەگەن قىزىعۋشىلىعى مەن ماحابباتى ويانادى. بولاشاقتا ولار بەلگىلى ءبىر سپورت تۇرىمەن كاسىبي تۇردە اينالىسىپ، ەلىمىزگە تالاي جۇلدەلەردى اكەلۋى مۇمكىن، - دەدى ول.
سونىمەن قاتار ريو وليمپياداسىنىڭ چەمپيونى ءوزىنىڭ كاسىبي سپورتقا قالاي كەلگەنىن ەسىنە الدى.
- بالا كەزىمدە مەن ءجۇزىپ ۇيرەنۋ ءۇشىن سپورتپەن اينالىسا باستادىم. ءسويتىپ ءجۇرىپ كاسىبي تۇردە قالاي اينالىسىپ كەتكەنىمدى بايقاماي قالدىم. ال ءقازىر سپورت ءومىرىمنىڭ اجىراماس بولىگى. مەنىڭ ايتارىم - سپورت كاسىپ ەمەس، ول ادامنىڭ ءومىر سالتى. مەن ءقازىر كاسىبي اتلەت بولماسام دا، سپورت مەنىڭ جانە وتباسىمنىڭ ءومىرىنىڭ ءاردايىم ماڭىزدى ورىن الادى، - دەدى دميتريي بالاندين.
ايتا كەتەيىك، فەستيۆال ايماعىنا كىرۋ بارلىق قالا تۇرعىندارى مەن قالا قوناقتارى ءۇشىن اشىق ءارى تەگىن.