الماتى قالاسى، الماتى جانە جەتىسۋ وبلىستارى بويىنشا قاج دەپارتامەنتىنىڭ الماتى قالاسىنداعى №11 جانە زارەچنىي اۋىلىنداعى №14 مەكەمەلەرىندەگى جالپى ءبىلىم بەرەتىن مەكتەپتەردى ءبىتىرۋشى سوتتالعاندارى اراسىندا ۇلتتىق ءبىرىڭعاي تەستىلەۋدى تاپسىرۋدىڭ ءتارتىبى مەن جولدارىن ءتۇسىندىرۋ ماقساتىندا ارنايى ماماندارمەن كەزدەسۋ ۇيىمداستىرىلدى، دەپ حابارلايدى Almaty-akshamy.kz Polisia.kz-كە سىلتەمە جاساپ.
كەزدەسۋ بارىسىندا الماتى قالاسى بويىنشا ادام قۇقىقتارى جونىندەگى ۋاكىلدىڭ وكىلى م. مالدىبايەۆ، الماتى قالاسى بويىنشا ادام قۇقىقتارى جونىندەگى ۇلتتىق ورتالىقتىڭ باس مامانى ك. سيباعاتوۆا جانە ق ر عىلىم جانە جوعارى ءبىلىم مينيسترلىگى “ۇلتتىق تەستىلەۋ ورتالىعى” رمقك الماتى قالاسىنداعى فيليالى باسشىسىنىڭ مىندەتىن اتقارۋشى ن.م. الىبييەۆا سوتتالعاندارعا ءبىرىڭعاي ۇلتتىق تەستىلەۋدى تاپسىرۋ مەن جوعارى ءبىلىم الۋدىڭ جولدارىن ءتۇسىندىردى.
«بۇگىنگى تاڭدا №11 مەكەمەدەگى مەكتەپتىڭ 11-سىنىبىندا 11 سوتتالعان بالا وقىسا، №14 مەكەمەدەگى مەكتەپتىڭ 11-سىنىبىندا 12 سوتتالعان ءبىلىم الىپ جاتىر. ەگەر ولار ۇبت تاپسىرىپ، شەكتى بالل السا، جوعارى ءبىلىم الۋعا مۇمكىندىكتەرى بار. بۇل ورايدا اتالعان مەكەمەلەردىڭ اكىمشىلىگى ق. ساتپايەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتىنىڭ كاسىبي دامۋ جانە ساندىق تەحنولوگيالار ينستيتۋتىنىڭ ديرەكتورى ا.گ. سيمونوۆپەن كەزدەسىپ، اتالعان مەكەمەلەردەگى سوتتالعانداردى ونلاين-وقىتۋعا قول جەتكىزۋ ماسەلەلەرىن تالقىلاعان بولاتىن. قازىرگى تاڭدا كدجست ينستيتۋتى قازاقستانداعى جالعىز ونلاين وقىتاتىن جوعارى ءبىلىم ورنى»، – دەيدى قاجد سوتتالعاندار اراسىنداعى الەۋمەتتىك پسيحولوگيالىق تاربيە جۇمىسى ءبولىمىنىڭ باس مامانى ش.حۋساينوۆا.
سونىمەن قاتار ق ر عججبم “ۇلتتىق تەستىلەۋ ورتالىعى” رمقك الماتى قالاسى بويىنشا فيليالىنىڭ وكىلى ن.م. الىبييەۆا سوتتالعاندارعا ۇبت تاپسىرۋدىڭ ءتارتىبى تۋرالى سلايد كورسەتىپ، ولاردىڭ سۇراقتارىنا جاۋاپ بەردى.