الماتىدا سوتتالعاندارعا مەديسينالىق كومەك كورسەتۋ ماسەلەسى تالقىلاندى

الماتى قالاسى بويىنشا قىلمىستىق-اتقارۋ جۇيەسى دەپارتامەنتى №72 مەكەمەسىندە سوتتالعانداردى ۇستاۋ رەجيمىن ءتيىستى قامتاماسىز ەتۋ، ولاردى دەنساۋلىق ساقتاۋ ورگاندارىنىڭ مەديسينالىق مەكەمەلەرىنە اپارۋ كەزىندە توتەنشە جاعدايلارعا جول بەرمەۋ ماقساتىندا مەديسينا ماماندارىنىڭ قاتىسۋىمەن دوڭگەلەك ۇستەل ءوتتى، – دەپ حابارلايدى Almaty -akshamy. kz Polisia. kz-كە سىلتەمە جاساپ.
دوڭگەلەك ۇستەلگە قاجد باسشىلىعى جانە الماتى قالاسى قوعامدىق دەنساۋلىق ساقتاۋ باسقارماسىنىڭ ءبولىم باسشىسى ل.يماگالييەۆا، №24 قالالىق ەمحانا باسشىسىنىڭ مىندەتىن اتقارۋشى م.الييەۆا، №4 قالالىق اۋرۋحانا باسشىسىنىڭ ورىنباسارى ن.بيكونۋروۆ، ورتالىق قالالىق كلينيكالىق اۋرۋحانا باسشىسىنىڭ ورىنباسارى ع.ءتىرماحانوۆ، №7 قالالىق كلينيكالىق اۋرۋحاناسىنىڭ نەيروحيرۋرگيالىق ءبولىمىنىڭ مەڭگەرۋشىسى ي.كۋرمايەۆ قاتىسىپ، اتالعان مەكەمەدە ۇستالاتىن سوتتالعاندارعا كومەك كورسەتۋ جانە ولارعا مەديسينالىق كومەك كورسەتۋ ءۇشىن رەسپۋبليكانىڭ باسقا وڭىرلەرىنە جىبەرۋ فاكتىلەرى تالقىلاندى. سونداي-اق بىلىكتى مەديسينا ماماندارى سوتتالعانداردى مەكەمە اۋماعىندا قاراۋ ءۇشىن دارىگەرلەردى شاقىرىپ، ناۋقاستاردى قالاداعى دەنساۋلىق ساقتاۋ ورگاندارىنىڭ مەديسينالىق مەكەمەلەرىنە اپارۋ سانىن ازايتۋ ماسەلەسىن دە تالقىلاپ، سوتتالعانداردى جازا وتەۋ ورىندارىندا ەمدەۋ تۋرالى ويلارىن ورتاعا سالدى. دەنساۋلىق ساقتاۋ ورىندارىندا سوتتالعاندارعا تىركەلگەن جەرى بويىنشا، ياعني قاج مەكەمەسىنىڭ ورنالاسقان جەرى بويىنشا مەديسينالىق كومەك كورسەتۋ، قالالىق اۋرۋحانالاردا سوتتالعاندارعا ارنايى پالاتالار قاراستىرۋ، ديسپانسەرلىك ەسەپتە تۇرعان ارنايى كونتينگەنتتەردىڭ ۋاقىتىلى مەديسينالىق تەكسەرىستەن ءوتۋى سياقتى ماسەلەلەر دە ماماندار تالقىلاۋىنان تىس قالعان جوق. دوڭگەلەك ۇستەل بارىسىندا وسىنداي ىسكەرلىك كەزدەسۋلەردى الداعى ۋاقىتتا دا ءجيى ۇيىمداستىرىپ، بىرىگىپ قىزمەت كورسەتۋ كەلىسىلدى.