قاراعاندىدا بالالاردىڭ جاپپاي ۋلانۋىنىڭ سەبەبىن انىقتاۋ ءۇشىن اناليز الىنىپ، الدىن الا ناتيجەسى بەلگىلى بولدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«دارىگەرلەر بالالاردىڭ جاعدايىن تەكسەرۋ بارىسىندا تاعى 2 بالا ءىشى اۋىرعانىن ايتتى. ولار اۋرۋحاناعا جەتكىزىلدى، مامانداردىڭ باقىلاۋىندا. بالالار ۋلانۋىنىڭ اۋىرلىعى ينتوكسيكاسيا جانە تىنىس الۋدىڭ جەتكىلىكسىزدىگىمەن بايلانىستى. وسى ورايدا زارداپ شەككەن كەيبىر بالالاردىڭ جاعدايى وتە اۋىر بولىپ تۇر. دارىگەرلەر اۋرۋ سالدارىمەن كۇرەسىپ جاتىر»، - دەدى دەنساۋلىق ساقتاۋ ءمينيسترى اجار عينيات قاراعاندى وڭىرلىك كوممۋنيكاسيالار قىزمەتى الاڭىندا وتكەن باسپا ءسوز ءماسليحاتىندا.
ءمينيستردىڭ مالىمدەۋىنشە، ءقازىر بۇكىل قاجەت تالداۋلار الىنىپ جاتىر.
«الدىن الا بولجام بويىنشا، تاعام توكسيكوينفەكسياسى دياگنوزى كۇمان تۋدىرادى. وسىعان دەيىنگى باقىلاۋ بارىسى كورسەتكەندەي ىشەك ينفەكسياسىنا ۇقسامايدى. ول بويىنشا الدىن الا اناليز ناتيجەسى تەرىس. ءقازىر اناليزدەر ناقتىلانىپ جاتىر»، - دەيدى ۆەدومستۆو باسشىسى.