ءقازىر سوتقا دەيىنگى تەرگەۋ باستالدى.
الماتىدا 55 مىڭنان اسا ەلەكتروندى تەمەكى زاڭسىز ساتىلعان، دەپ حابارلايدى Almaty-akshamy.kz
قارجىلىق مونيتورينگ اگەنتتىگىنىڭ مالىمەتىنشە، ۆەدومستۆونىڭ الماتى قالالىق دەپارتامەنتى پروكۋراتۋرانىڭ ۇيلەستىرۋىمەن ەلەكتروندى تەمەكىنى (ۆەيپ) زاڭسىز كوتەرمە ساۋدالاۋ قىزمەتىنىڭ جولىن كەسكەن. جەدەل-ىزدەستىرۋ ءىس-شارالارى بارىسىندا قالادا ەلەكتروندى تەمەكىنى زاڭسىز كوتەرمە ساتقان ساۋدا جانە قويما ءۇي-جايلارى انىقتالدى.
«ءتىنتۋ كەزىندە جالپى سوماسى 80 ملن تەڭگەدەن اساتىن 55 مىڭنان اسا ەلەكتروندى تەمەكى تابىلىپ، تاركىلەندى. ءقازىر سوتقا دەيىنگى تەرگەۋ باستالدى»، دەدى قما رەسمي وكىلى ءادىل ءابىلوۆ.
ق ر قپك 201-بابىنىڭ تالاپتارىنا سايكەس، وزگە مالىمەتتەر جاريا ەتۋگە جاتپايدى.
سونداي-اق اگەنتتىك وكىلى ۆەيپتەردى قولدانۋ جاسوسپىرىمدەردىڭ دامۋىنا كەرى اسەرىن تيگىزەتىنىن، ەستە ساقتاۋ، زەيىندى شوعىرلاندىرۋ، ءوزىن-وزى باقىلاۋ جانە وقۋ قابىلەتىنە زياندى اسەر ەتەتىنىن ەسكە سالدى. اتا-انالاردان بالالاردىڭ مىنەز-قۇلقىنا، دەنساۋلىعىنا جانە ونىڭ نە ساتىپ الاتىنىنا نازار اۋدارۋدى سۇرادى.