پرەزيدەنت اقش سەناتى ۇلتتىق قاۋىپسىزدىك جانە ۇكىمەت ىستەرى جونىندەگى كوميتەتىنىڭ ءتوراعاسى گەري پيتەرستى قابىلدادى
مەملەكەت باسشىسى سەناتورعا ءىلتيپات بىلدىرە وتىرىپ، ونىڭ ساپارى ەكىجاقتى ىنتىماقتاستىق ماسەلەلەرى بويىنشا جان-جاقتى پىكىر الماسۋعا جاقسى مۇمكىندىك ەكەنىن اتاپ ءوتتى، دەپ حابارلايدى Almaty-akshamy.kz.
– امەريكا قۇراما شتاتتارى جاھاندىق قاۋىپسىزدىكتى نىعايتۋ، يادرولىق قارۋدى تاراتپاۋ، ەكونوميكالىق تۇراقتىلىقتى قامتاماسىز ەتۋ جانە دەموكراتيالىق قۇندىلىقتاردى ىلگەرىلەتۋ ىسىندە ءاردايىم ءبىزدىڭ ەلىمىزدىڭ ستراتەگيالىق سەرىكتەسى سانالعان. ءبىز كوپ نارسەگە قول جەتكىزدىك ويلايمىن. ايتسە دە ەكى ەلدىڭ مۇددەسىنە ساي كەلەتىن سالالارداعى ءوزارا ىنتىماقتاستىعىمىزدى نىعايتۋ ءۇشىن العا قاراي جىلجۋىمىز كەرەك، – دەدى پرەزيدەنت.
اڭگىمەلەسۋ بارىسىندا قاسىم-جومارت توقايەۆ بيىل قىركۇيەك ايىندا بۇۇ باس اسسامبلەياسى الاڭىندا «س5+1» فورماتىندا وتەتىن اقش پەن ورتالىق ازيا مەملەكەتتەرى باسشىلارىنىڭ العاشقى سامميتىنە شاقىرعانى ءۇشىن پرەزيدەنت دجو بايدەنگە ريزاشىلىعىن ءبىلدىردى.
گەري پيتەرس امەريكا قۇراما شتاتتارى مەن قازاقستان اراسىنداعى قارىم-قاتىناسقا قاتىستى نەگىزگى ماسەلەلەردى تالقىلاۋ مۇمكىندىگى ءۇشىن قاسىم-جومارت توقايەۆقا العىس ايتتى.
– ورتالىق ازيا – الەمنىڭ ماڭىزدى بولىگى، ال قازاقستان – ورتالىق ازيا وڭىرىندەگى نەگىزگى مەملەكەتتەردىڭ ءبىرى. سوندىقتان ءبىز الداعى ۋاقىتتا ىنتىماقتاسا جۇمىس ىستەۋگە مۇمكىندىگىمىز بار ەكەنىنە كوز جەتكىزگىمىز كەلەدى. بۇل پىكىرىمدى پرەزيدەنت بايدەن دە قۇپتايدى دەپ ويلايمىن. ول سىزبەن تاياۋ ۋاقىتتا نيۋ-يوركتە كەزدەسۋگە نيەتتى. بۇل كەزدەسۋ ءبىزدىڭ قارىم-قاتىناسىمىزدى نىعايتۋعا وڭ ىقپال ەتەدى دەپ ويلايمىن، – دەدى اقش سەناتورى.
كەزدەسۋ بارىسىندا سونداي-اق حالىقارالىق جانە وڭىرلىك كۇن تارتىبىندەگى وزەكتى ماسەلەلەر تالقىلاندى.