الماتىدا ءىرى سينتەتيكالىق ەسىرتكىمەن 33 جاستاعى ادام ۇستالدى، دەپ حابارلايدى Almaty-akshamy.kz Inform.kz-كە سىلتەمە جاساپ.
باسپا ءسوز قىزمەتى تاراتقان مالىمەتتەر بويىنشا، ەسىرتكىنى دايىنداۋشى 33 جاستاعى س. ەسىمدى ازامات بولىپ شىقتى. ءتارتىپ ساقشىلارى ونىڭ «مەرسەدەس» ماركىلى كولىگىن دوستىق داڭعىلى مەن وماروۆا كوشەسىنىڭ قيىلىسىندا توقتاتتى. ونىڭ ءوزىن جانە كولىگىن ءتىنتۋ كەزىندە كولىگىنەن يزولەنتاعا ورالعان 85 بۋم تابىلدى.
ۇستالعان ازامات تابىلعان زاتتاردى الماتى قالاسى مەن الماتى وبلىسىنا ساۋدالاۋ ءۇشىن ساقتاپ قويعان، «مەفەدرون» جانە «ماريحۋانا» ەسىرتكىسى ەكەنىن ايتتى.
تەرگەۋ بارىسىندا ءمالىم بولعانىنداي، كۇدىكتى سينتەتيكالىق ءشوپتى ءوزى جاساعان. وسى ماقساتتا ول الماتى وبلىسى تۇزدىباستاۋ اۋىلىندا جەر ءۇيدى جالعا العان.
ءتىنتۋ كەزىندە جالعا الىنعان تۇرعىن ۇيدەن زەرتحانالىق جابدىقتار، شىنى توستاعاندار مەن كريستالدى زاتتار سالىنعان مەتالل قاڭىلتىرلار، كانيسترگە قۇىلعان ءتۇرلى سۇيىقتىقتار جانە ۇنتاق حيميالىق زاتتار، ۇنتاق زاتتار سالىنعان پوليەتيلەن قاپتار، ەلەكتروندى تارازىلار، ماگنيتتىك ارالاستىرعىش جانە 300 قاپشىقتار تابىلىپ، جانە تاركىلەندى.
ساراپتاما قورىتىندىسىنا سايكەس، تاركىلەنگەن زاتتاردىڭ ىشىنەن «مەفەدرون» ەسىرتكىسى انىقتالدى جانە ونىڭ سالماعى 15 كەلى 200 گراممدى قۇرادى.
«جاۋاپ الۋ كەزىندە ەسىرتكى جاساۋشى لابورانت پەن كۋرەر بولىپ جۇمىس ىستەگەن جانە وسى جۇمىسى ءۇشىن جاقسى جالاقى العانىن ايتتى. «جۇمىس بەرۋشى» زەرتحاناعا قاجەت باسپانانى دا جالعا الىپ بەرگەن. اتالعان دەرەك بويىنشا مەدەۋ اۋداندىق پوليسيا باسقارماسى سوتقا دەيىنگى تەرگەۋ امالدارىن جۇرگىزىپ جاتىر. قىلمىستىق ءىس ق ر قك-نىڭ 297-بابى 3-بولىگى بويىنشا تىركەلدى. كۇدىكتى قاماۋعا الىندى»،-دەلىنگەن حابارلامادا.