«مارسقا ساپار» سيمفونياسىنىڭ الەمدىك پرەمەراسى كورسەتىلدى.
جامبىل اتىنداعى قازاق مەملەكەتتىك فيلارمونياسىندا جاھان جۇرتىنىڭ نازارىن اۋدارعان سيمفونيانىڭ تۇساۋكەسەرى ءوتتى. «مارسقا ساپار» دەپ اتالعان حالىقارالىق دەڭگەيدەگى مادەني جوبا تىڭ ادىستەردى تۇڭعىش رەت قولدانىپ، الەمدىك جاڭاشىلدىق ورناتتى. كوپشىلىك كوز تىككەن پرەمەرانىڭ قازاقستاننىڭ مادەني استاناسى الماتىدا ءوتۋى دە اتاپ وتەرلىك جايت، دەپ حابارلايدى Almaty-akshamy.kz Almaty.tv سىلتەمە جاساپ.
العاشىندا پرەمەرا بىرىككەن اراب امىرلىگىندە وتەدى دەپ جوسپارلانىپتى. وعان باستى سەبەپ – «مارسقا ساپار» مادەني جوباسىن بىرنەشە مەملەكەتتىڭ كومپوزيتورلارى بىرىگىپ جازعان ەدى. قازاقستان، اقش، ۇلىبريتانيا، تۋنيس، ءۇندىستان جانە بىرىككەن اراب امىرلىگى ونەرپازدارىنىڭ باسىن قوسقان كەشتىڭ كوركەمدىك جەتەكشىسى ءارى باس ديريجەرى – بەلگىلى سكريپكاشى، الماتى قالاسىنىڭ تۋماسى مارات بيسەنعالييەۆ. الەمگە ايگىلى ۆيرتۋوزدىڭ ارنايى كەلگەنىن ونەرسۇيەر كوپشىلىك تە قۋانا قابىلدادى. ءارى اتالعان سيمفونيا تۇساۋكەسەرىنىڭ ءدال الماتىدا ءوتۋى دە شاھاردىڭ شىرايى مەن الەمدىك ساحناداعى مارتەبەسىن اسقاقتاتا تۇسكەندەي.
«مىنا پرەمەرانىڭ اشىلۋى عانا ەمەس، مۋزىكالىق جانرلاردىڭ، مۋزىكالىق ەففەكتىلەردىڭ جاڭالىعى دەپ ايتساق بولادى. سەبەبى، مىنا جاقتا مۋزىكالىق جانر دەپ وتىرعانىم، ءتورت كومپوزيتور ءبىر سيمفونيانى جازدى دەگەننىڭ ءوزى بۇل ۇلكەن جاڭالىق مۋزىكا الەمىندە. ال ەكىنشى جاڭالىعىمىز، ءبىز العاشقى بولىپ الەم بويىنشا كۆادروەففەكت دەگەندى قولدانايىن دەپ جاتىرمىز»، – دەدى جامبىل اتىنداعى قازاق مەملەكەتتىك فيلارمونياسىنىڭ ديرەكتورى سەرىك نۇرمولدايەۆ.
ال الەمدىك ونەر الەمىندەگى ۆيرتۋوز ءدال وسى ءىس-شارانىڭ ءوزى تۋعان ارۋ الماتىدا وتكەنىنە قۋانىشتى. جاھان كومپوزيتورلارىنىڭ شىعارماشىلىعىنان شىققان دۇنيە بۇگىن مادەني استانانىڭ اسپانىندا قالىقتايدى دەيدى سكريپكاشى.
«ەگەر ءسىز بۇگىنگى سيمفونيانى الەۋمەتتىك جەلىدەن نەمەسە تەلەارنا ارقىلى كورەتىن بولساڭىز، ءبىزدىڭ الەم بويىنشا العاشقى بوپ قولدانعان ەففەكتىمىزدى بايقاي المايسىز. بۇل عاجايىپتى قۇلاقپەن ەستىپ، جۇرەكپەن سەزىنۋ كەرەك. سوندىقتان دا «مارستاعى ميسسيا» دەپ اتاپ وتىرمىز. بۇل، راسىندا، اسا عاجاپ دۇنيە بولادى»، – دەيدى ۆيرتۋوز-سكريپكاشى، ق ر ەڭبەك سىڭىرگەن قايراتكەرى مارات بيسەنعالييەۆ.
سانيتارلىق تالاپتار ەسكەرىلگەن كەشتە قوناقتاردىڭ اراقاشىقتىق ساقتاۋى كونسەرتتى قويۋشىلارعا دا اسا ءتيىمدى بولدى. سەبەبى، كۆادروەففەكت، ياعني اۋادا اۋەننىڭ قالىقتاۋى تىكەلەي زالداعى قۇرىلىمعا قاتىستى ەدى. ال باس ديريجەر مارات بيسەنعالييەۆتىڭ مۋزىكانى كورەرمەندەرگە قاراپ سۇيەمەلدەۋى دە سيمفونيالىق پرەمەراداعى ەرەكشەلىكتەردىڭ ءبىرى بولدى. ءار ونەرپاز ايرىقشا ۇلەس قوسقان مۋزىكالىق تۋىندىعا دايىندالۋ، ارينە، قيىنعا سوقپادى.
مۋزىكالىق باعدارلامانىڭ ەكىنشى بولىگىندە تىڭدارمانعا ايگىلى اعىلشىن كومپوزيتورى كارل دجەنكينستىڭ تۋىندىلارى ۇسىنىلدى. سونداي-اق، ۇلتتىق اسپاپتاردىڭ سۇيەمەلدەۋىمەن حالىق اندەرى دە ورىندالدى.
ايتا كەتەيىك، اتالمىش الەمدىك كەش تىكەلەي الماتى قالاسى اكىمدىگى، سونداي-اق، جامبىل اتىنداعى قازاق مەملەكەتتىك فيلارمونياسىنىڭ قولداۋىمەن ءوتىپ وتىر.