شۆەيساريا تاريحي كەزدەسۋدە كامەرۋننان باسىم ءتۇستى

قوس قۇرامانىڭ تاجىريبەسى مەن شەبەرلىك دەڭگەيى قاتارلاس

قاتاردا ءوتىپ جاتقان فۋتبولدان 2022 جىلعى الەم چەمپيوناتىنىڭ بەسىنشى ويىن كۇنىندە G توبىندا شۆەيساريا كامەرۋننان باسىم ءتۇستى، دەپ حابارلايدى Almaty-akshamy.kz قازاقپاراتقا سىلتەمە جاساپ.

اتالعان توپتاعى العاشقى كەزدەسۋ شۆەيساريا مەن كامەرۋن قۇرامالارى اراسىندا ءوتتى.

ەل-ۆاكرا قالاسىنداعى 44 325 مىڭ جانكۇيەرگە ارنالعان «ەل-دجانۋب» ستاديونىندا بولعان ويىندا ارگەنتينالىق فاكۋندو تەلو باس تورەشى قىزمەتىن اتقاردى.

قوس قۇرامانىڭ تاجىريبەسى مەن شەبەرلىك دەڭگەيى قاتارلاس. سوندىقتان ويىننىڭ تارتىستى ءوربيتىنى بەلگىلى ەدى.

تورەشى ىسقىرىعى ەستىلگەن ساتتەن فۋتبولشىلار جاسىل الاڭ تورىندە تايتالاسقا ءتۇستى. ءبىرىنشى كەزەڭدە تابلوداعى ەسەپكە وزگەرىس ەنگەن جوق.

ەكىنشى كەزەڭ باستالعان ساتتە شۆەيساريالىق فۋتبولشىلار العا قاراي ۇمتىلدى. بۇل ارەكەتى ناتيجەسىز بولعان جوق.

ويىننىڭ 48-مينۋتىندا بريل ەمبولو اتالعان قۇرامانى العا شىعاردى. وعان كامەرۋندىق قۇراما جاۋاپ بەرۋگە تىرىستى.

ايتا كەتسەك، ەكى قۇراما ءوز تاريحىندا تۇڭعىش مارتە كەزدەسىپ وتىر. سول تاريحي ويىندا شۆەيساريا قارسىلاسىنان 1:0 ەسەبىمەن باسىم ءتۇستى.

ەسكە سالساق، اتالعان توپتاعى برازيليا مەن سەربيا كەزدەسۋى ەلوردا ۋاقىتىمەن 01:00-دە باستالىپ، «Qazaqstan» جانە «Qazsport» تەلەارنالارىنان تىكەلەي ەفيردە كورسەتىلەدى.

سونداي-اق، بۇگىن، 24 قاراشادا 19:00-دە ۋرۋگۆاي مەن وڭتۇستىك كورەيا كەزدەسۋى «Qazsport»، پورتۋگاليا مەن گانا ويىنى 22.00-دە «Qazaqstan» تەلەارناسىنان تىكەلەي ەفيردە كورسەتىلەدى.