جىل سايىن 28 ساۋىردە دۇنيەجۇزىلىك ەڭبەكتى قورعاۋ كۇنى اتاپ وتىلەدى.
ونىڭ ماقساتى – جۇمىسكەرلەردىڭ قۇقىقتارى، ولاردىڭ الەۋمەتتىك قورعالۋى مەن ەڭبەك قاۋىپسىزدىگىن ارتتىرۋ ماسەلەلەرىنە نازار اۋدارۋ. قازاقستاندا وندىرىستىك جاراقاتتانۋ دەڭگەيىن تومەندەتۋ بويىنشا جۇمىستار جوسپارلى تۇردە جۇرگىزىلۋدە. قابىلدانعان شارالاردىڭ ناتيجەسىندە سوڭعى 5 جىلدا وندىرىستە زارداپ شەككەندەردىڭ سانى 6،3% - عا، بۇرىنعىعا قاراعاندا قازا تاپقاندار سانى 2،9% - عا ازايدى، دەپ حابارلايدى aqshamnews.kz.
بيىلعى دۇنيەجۇزىلىك ەڭبەكتى قورعاۋ كۇنىنىڭ تاقىرىبى «ەڭبەك قاۋىپسىزدىگى مەن گيگيەناسىنا ريەۆوليۋسيالىق كوزقاراستار: جۇمىس ورىندارىنداعى جاساندى ينتەللەكت پەن سيفرلاندىرۋدىڭ ءرولى». الەمنىڭ بارلىق ايماعىندا ۇكىمەتتەر، كاسىپوداق ۇيىمدارى، جۇمىس بەرۋشىلەر بىرلەستىكتەرى جانە ەڭبەكتى قورعاۋ سالاسىنداعى تاجىريبە ماماندارى ءىس-شارالار ۇيىمداستىرادى، ولاردىڭ شەڭبەرىندە ەڭبەكتى قورعاۋ سالاسىن جاڭا تەحنولوگيالاردى ەنگىزۋ جانە سيفرلىق ترانسفورماسيالاۋ، ءقاۋىپسىز جانە سالاۋاتتى وندىرىستىك ورتا قۇرۋ ماسەلەلەرى قارالاتىن بولادى.
حالىقارالىق ەڭبەك ۇيىمىنىڭ دەرەكتەرى ەڭبەكتى قورعاۋ سالاسىنداعى اۋقىمدى پروبلەمالاردىڭ ساقتالۋىن ايعاقتايدى – الەمدە جىل سايىن 270 ملن-عا جۋىق جازاتايىم وقيعا جانە 2 ملن-نان استام ادامنىڭ ءومىرىن قيعان 160 ملن كاسىپتىك اۋرۋ تىركەلەدى.
قازاقستاندا جىل سايىن كاسىپورىنداردا 1400-دەن استام جازاتايىم وقيعاعا جول بەرىلەدى، ونىڭ 200-گە جۋىعى ادام شىعىنىمەن اياقتالادى.
ەكونوميكا سالالارى بولىنىسىندە زارداپ شەككەندەردىڭ ەڭ كوپ سانى تاۋ-كەن مەتاللۋرگيا كەشەنىنىڭ كاسىپورىندارىندا – 15،3%، قۇرىلىس سالاسىندا – 12% بايقالادى.
ەلىمىزدە 470 مىڭنان استام جۇمىسكەر زياندى جانە ءقاۋىپتى ەڭبەك جاعدايلارىندا جۇمىس ىستەيدى. 2024 جىلى اتتەستاتتاۋ ناتيجەلەرى بويىنشا 679 مىڭ جۇمىسكەر ەڭبەك جاعدايلارى زياندى جۇمىستا ىستەگەنى ءۇشىن ءتۇرلى وتەماقى الدى. بۇل ماقساتتارعا جۇمىس بەرۋشىلەر 297،4 ملرد تەڭگە ءبولدى، بۇل 2023 جىلمەن سالىستىرعاندا 16،6% - عا كوپ.
سالاۋاتتى جانە ءقاۋىپسىز ەڭبەك جاعدايلارىن ودان ءارى قامتاماسىز ەتۋ ءۇشىن ق ر ەڭبەك جانە حالىقتى الەۋمەتتىك قورعاۋ مينيسترلىگى (بۇدان ءارى – ەڭبەكمينى) شارالار كەشەنىن قابىلداۋدا.
2024 جىلدىڭ قورىتىندىسى بويىنشا قۇقىق قورعاۋ ورگاندارىنا جازاتايىم وقيعالار تۋرالى 1042 ماتەريال جىبەرىلدى، ولار بويىنشا 215 قىلمىستىق ءىس قوزعالدى. جۇمىس ورىندارىندا ەڭبەك جاعدايلارىنىڭ ناقتى جاي-كۇيىن باعالاۋ ماقساتىندا 7،7 مىڭنان استام وندىرىستىك وبەكتىلەردى اتتەستاتتاۋ جۇرگىزىلدى.
بۇزۋشىلىقتاردىڭ الدىن الۋ جانە بولدىرماۋ ماقساتىندا ەلىمىزدىڭ 3262 كاسىپورنى ەڭبەك قاۋىپسىزدىگى جانە ەڭبەكتى قورعاۋ ستاندارتتارىن ەنگىزدى.
2019 جىلدان باستاپ نولدىك جاراقات تۇجىرىمداماسى – Vision Zero بەلسەندى تۇردە جۇرگىزىلۋدە. بۇگىنگى تاڭدا وعان رەسپۋبليكانىڭ 605 كاسىپورنى قوسىلدى.
قازاقستاننىڭ 318 كاسىپورنى قۇرىلىس سالاسىنىڭ مەردىگەرلىك ۇيىمدارىندا ءقاۋىپسىز ەڭبەك جاعدايلارىن قامتاماسىز ەتۋ ءۇشىن باقىلاۋدىڭ تىكەلەي مودەلىن ەنگىزدى.
زياندى ەڭبەك جاعدايلارىندا جۇمىس ىستەيتىن جۇمىسكەرلەردى الەۋمەتتىك قورعاۋدىڭ قوسىمشا تەتىكتەرىن ەنگىزۋ شەڭبەرىندە 2024 جىلعى 1 قاڭتاردان باستاپ قازاقستاندا ارناۋلى الەۋمەتتىك تولەم ەنگىزىلدى. بۇل تولەمدەرگە كەمىندە 7 جىل مىندەتتى كاسىپتىك زەينەتاقى جارنالارى اۋدارىلعان 55 جاسقا تولعان جۇمىسكەرلەر قۇقىلى. وسى مۇمكىندىكتى پايدالانا وتىرىپ، 14 مىڭنان استام جۇمىسكەر زياندى ەڭبەك جاعدايلارىنداعى جۇمىسىن توقتاتىپ، ارناۋلى الەۋمەتتىك تولەمدەر الۋدا.
قازاقستاندا 2030 جىلعا دەيىنگى ءقاۋىپسىز ەڭبەك تۇجىرىمداماسى (بۇدان ءارى – تۇجىرىمداما) ىسكە اسىرىلۋدا، ول: ەڭبەكتى قورعاۋ جونىندەگى شارالاردى قارجىلاندىرۋدا جاڭا تاسىلدەردى قولدانۋ، جۇمىسكەرلەردىڭ جازاتايىم وقيعالاردان مىندەتتى ساقتاندىرۋ جۇيەسىنە قاتىسۋىن جانداندىرۋ؛ وقىتۋ ساپاسىن ارتتىرۋ جانە ەڭبەكتى قورعاۋ جونىندەگى ءبىلىمدى تەكسەرۋ ەسەبىنەن ەڭبەك جاعدايلارىن جاقسارتۋدى جانە وندىرىستىك جاراقاتتانۋ مەن كاسىپتىك اۋرۋلار دەڭگەيىن تومەندەتۋدى كوزدەيدى ءبىلىمدى تاۋەلسىز باعالاۋدى ەنگىزۋ ارقىلى ەڭبەك ەتۋ؛ قوعامدىق باقىلاۋدىڭ ءرولىن كۇشەيتۋ.
تۇجىرىمدامانى ىسكە اسىرۋ شەڭبەرىندە كاسىپورىنداردىڭ سيفرلىق كارتاسى جانە ەڭبەك تاۋەكەلدەرىنىڭ سيفرلىق كارتاسى ىسكە قوسىلدى، بۇل ناقتى ۋاقىت رەجيمىندە ەڭبەك قاۋىپسىزدىگى مەن ەڭبەكتى قورعاۋدى قامتاماسىز ەتۋگە، سونداي-اق كاسىپورىندارداعى ەڭبەك قاتىناستارىنا بايلانىستى تاۋەكەلدەردى باقىلاۋعا جانە الدىن الۋ شارالارىن قابىلداۋعا مۇمكىندىك بەرەدى.
2025 جىلدىڭ 28-30 مامىرىنا جوسپارلانعان ەڭبەكتى قورعاۋ جانە ونەركاسىپتىك قاۋىپسىزدىك جونىندەگى ءداستۇرلى كونفەرەنسيا مەن كورمە حالىقارالىق ەڭبەكتى قورعاۋ كۇنىنە ورايلاستىرىلعان. بۇل وزەكتى سىن-تەگەۋرىندەردى تالقىلاۋ جانە ءقاۋىپسىز ەڭبەك جاعدايلارىن قامتاماسىز ەتۋ سالاسىنداعى شەشىمدەردى ىزدەۋ ءۇشىن جەتەكشى مامانداردى، مەملەكەتتىك ورگانداردىڭ، بيزنەستىڭ جانە حالىقارالىق ۇيىمداردىڭ وكىلدەرىن بىرىكتىرەتىن ماڭىزدى سالالىق ءىس-شارا.