الماتىدا قازاقستان-شۆەيساريا تۋريزم جانە قوناق ءۇي بيزنەسى ينستيتۋتىندا شۆەيساريا باعدارلاماسى بويىنشا تۋريزم قىزمەتكەرلەرىن دايارلاۋ باستالدى. ستۋدەنتتەردى قابىلداۋ 2021 جىلدىڭ قىركۇيەگىندە باستالادى. قالا تۇرعىندارىن وقىتۋ جانە جۇمىسقا ورنالاستىرۋ ءۇشىن كونديتەرلەر مەن ناۋبايشىلاردى وقىتۋ ورتالىعى دا ىسكە قوسىلدى.
وقۋ مەيرامحانا-قوناق ءۇي كەشەنىنىڭ بازاسىندا شۆەيساريا باعدارلاماسىنىڭ ستۋدەنتتەرى عانا ەمەس، سونىمەن قاتار الماتى تەحنولوگيالىق ۋنيۆەرسيتەتى مەن كوللەدجىنىڭ مەيرامحانا ءىسى جانە قوناق ءۇي بيزنەسى باعدارلاماسى بويىنشا بارلىق وقۋشىلار تاجىريبەدەن وتەدى.
جوبا تۋريزم سالاسىنداعى بولاشاق ماماندار ءۇشىن جاڭا جاتتىعۋ بازاسىنا بولادى. مۇندا "اتامەكەن" ۇلتتىق كاسىپكەرلەر پالاتاسى، جۇمىسپەن قامتۋ ورتالىعى مەن كوللەدجدەر جاساسقان "جاڭا جۇمىس ورىندارىن قۇرۋ جانە جاڭا ماماندىقتارعا قايتا دايارلاۋ" كەلىسىمى شەڭبەرىندە دايارلاۋ مەن بىلىكتىلىكتى ارتتىرۋ ورتالىعىنىڭ ستۋدەنتتەرى ءبىلىم الادى.
قازاقستان-شۆەيساريا تۋريزم جانە قوناق ءۇي بيزنەسى ينستيتۋتىنىڭ ديرەكتورى عاليا وتەبەكوۆانىڭ ايتۋىنشا، ستۋدەنتتەردى قابىلداۋ 2021 جىلدىڭ قىركۇيەگىندە باستالادى. كەشەندە ءبىلىم بەرۋ مەيرامحاناسىندا 10 ءنومىرلى شاعىن قوناق ءۇي قاراستىرىلعان. ينۆەستيسيا كولەمى 750 ملن. تەڭگەنى قۇرايتىن 10 جۇمىس ورنى اشىلدى.
وقۋ مەيرامحانا-قوناق ءۇي كەشەنىنىڭ ماقساتى – تۋريزم، مەيرامحانا جانە قوناق ءۇي بيزنەسىن باسقارۋ سالاسىندا زاماناۋي ءبىلىم مەن پراكتيكالىق داعدىعا يە، قازاقستاندىق جانە شەتەلدىك نارىقتا باسەكەگە قابىلەتتى كاسىبي كادرلاردى ساپالى دايارلاۋ.
استانا كۇنى مەن قازاقستان تاۋەلسىزدىگىنىڭ 30 جىلدىعىن مەرەكەلەۋ اياسىندا الماتىدا كونديتەرلەر مەن ناۋبايشىلاردى وقىتۋ ورتالىعى اشىلدى. ءىس-شارانى مەدەۋ اۋدانى اكىمدىگى مەن RAHYM الەۋمەتتىك ءۇيى بىرلەسىپ ۇيىمداستىردى.
جاڭا وقۋ ورتالىعى 30 ورىندى قۇرايدى، ءارى قاراي 100 ورىنعا دەيىن كەڭەيتىلەدى. مۇندا از قامتىلعان جانە كوپ بالالى وتباسىلاردان شىققان قالا تۇرعىندارى، سونداي-اق مۇمكىندىگى شەكتەۋلى ادامدار ءبىلىم الادى. ساباقتار ماستەر-كلاسس فورماتىندا وتكىزىلەدى.
اسپازدىق سالاسىنداعى سۇرانىسقا يە ماماندىقتارعا وقىتۋ ءۇشىن تۇركيادان كاسىبي شەف-كونديتەر چەتين چالىشكان شاقىرىلدى. وقۋ ورتالىعىنىڭ تۇلەكتەرى جۇمىسقا ورنالاسۋ مۇمكىندىگىنە يە بولادى. جوبا الەۋمەتتىك كاسىپكەرلىكتى دامىتۋ اياسىندا جۇزەگە اسىرىلدى.