فورس-ماجورلىق جاعدايلار تۋرالى كۋالىك الۋعا بولادى
الماتى قالاسىنىڭ كاسىپكەرلەر پالاتاسىنىڭ ديرەكتورى ايتۋار قوشمامبەتوۆ وڭىرلىك كوممۋنيكاسيالار قىزمەتى الاڭىندا زارداپ شەككەن بيزنەسمەندەردىڭ قايسىسى كەلتىرىلگەن زالالدى وتەي الادى، نەسيەلەر مەن سالىقتار بويىنشا كەيىنگە قالدىرىلا ما، جوق پا، سونى ايتىپ بەردى، دەپ حابارلايدى Almaty-akshamy.kz.
قوشمامبەتوۆتىڭ ايتۋىنشا، زارداپ شەككەن شاعىن جانە ورتا بيزنەس كاسىپكەرلەرى زالالدى وتەۋگە ۇمىتتەنە الادى. «شەشىم ءاربىر ناقتى جاعدايدا ازىرلەنىپ جاتقان ۇكىمەتتىك قاعيدالار نەگىزىندە قۇرىلعان كوميسسيالاردىڭ قاراعان قورىتىندىلارى نەگىزىندە قابىلداناتىن بولادى»، - دەپ اتاپ ءوتتى سپيكەر.
ول الماتى قالاسىنىڭ كاسىپكەرلەر پالاتاسىنا جىبەك جولى كوشەسى، 135 (امانگەلدى ك-سىنىڭ قيىلىسى) 2ء-شى بلوك، 8ء-شى قابات مەكەن-جايى بويىنشا حابارلاسىپ، فورس-ماجورلىق جاعدايلار تۋرالى كۋالىك الۋعا بولاتىنىن اتاپ ءوتتى.
نەسيەلەر مەن سالىقتىق تولەمدەر بويىنشا مەرزىمدى ۇزارتۋعا قاتىستى ايتۋار قوشمامبەتوۆ مىنانى ءتۇسىندىردى: «سالىقتىق تولەمدەر بويىنشا ماسەلە قازىرگى ۋاقىتتا ق ر ۇكىمەتى دەڭگەيىندە قاراستىرىلۋدا. بۇدان باسقا، قارجى نارىعىن رەتتەۋ جانە دامىتۋ اگەنتتىگى 2022 جىلعى 10 قاڭتارداعى بۇيرىقپەن توتەنشە جاعدايدى ەنگىزۋ ناتيجەسىندە زارداپ شەككەن جەكە جانە زاڭدى تۇلعالاردى قولداۋ شارالارىن بەكىتتى. قۇجاتقا سايكەس كرەديتتىك ۇيىمدار تج كەزىندە ونىڭ قارجىلىق جاي-كۇيىنىڭ ناشارلاۋىنىڭ نەمەسە كەلتىرىلگەن زالالدىڭ وبەكتيۆتى سەبەپتەرى بولعان كەزدە قارىز الۋشىنىڭ بانكتىك قارىز نەمەسە ميكروكرەديت شارتتارى بويىنشا نەگىزگى بورىش پەن سىياقى بويىنشا تولەمدەردى توقتاتا تۇرادى».
كاسىپكەر وبەكتىنىڭ بوس تۇرىپ قالۋى كەزىندە قىزمەتكەرلەردىڭ جالاقىسى بويىنشا شىعىنداردى زالال سوماسىنا قوسۋعا بولا ما دەگەن سۇراققا سپيكەر شىعىستاردىڭ وسى بابى بيزنەستىڭ توقتاپ تۇرۋىنا بايلانىستى، مىسالى، تەز بۇزىلاتىن ونىمدەر ءۇشىن شىعىندار جانە جالعا الۋ شىعىستارى سياقتى زالال رەتىندە ەسەپتەلمەيتىنىن اتاپ ءوتتى. جالداۋ اقىسى ماسەلەلەرى بويىنشا داۋلاردى رەتتەۋ ءۇشىن كاسىپكەرلەرگە اۋداندىق كوميسسياعا ءوز بەتىنشە ءوتىنىش بەرۋ ۇسىنىلادى، ول زالال انىقتالعاننان كەيىن شەشىم قابىلداپ، قورىتىندى بەرەدى.