54 جەدەل-تەرگەۋ توبى قۇرىلدى
مەگاپوليستە تەرروريستىك ارەكەتتەر بارىسىندا كاسىپكەرلەرگە كەلتىرىلگەن زالالدى انىقتاۋ جونىندەگى قالالىق كوميسسيا جۇمىسىن جالعاستىرۋدا، دەپ حابارلايدى Almaty-akshamy.kz.
وڭىرلىك كوممۋنيكاسيالار قىزمەتىنىڭ بريفينگىندە الماتى پوليسيا دەپارتامەنتى تەرگەۋ باسقارماسى باسشىسىنىڭ ورىنباسارى ەرعالي يبرايموۆ اتاپ وتكەندەي، تەرگەۋ ارەكەتتەرىن جۇرگىزگەنگە دەيىن بۇزاقى ارەكەتتەر مەن بۇلىنگەن مۇلىكتىڭ ىزدەرىن تازالاماۋ كەرەك، ەڭ الدىمەن پوليسيا شاقىرۋ كەرەك. ونىڭ ايتۋىنشا، 54 جەدەل-تەرگەۋ توبى قۇرىلدى. باسقا وڭىرلەردەن 37 تەرگەۋشى مەن 51 كريميناليست كومەككە تارتىلدى. سونداي-اق، پوليسيا قىزمەتكەرلەرى ساۋدا ورتالىقتارىندا – ءواد، موسكۆا جانە پرومەنادتا وتىنىشتەردى قابىلدايدى.
ەرعالي يبرايموۆ بەينەباقىلاۋ كامەرالارىنان، رەسيۆەرلەردەن، سەرۆەرلەردەن جانە ت.ب. جازبالاردى قاتتى ديسكىگە نەمەسە فلەش-كارتاعا قايتا جازۋدى جانە وسى جازبالاردى قۇقىق قورعاۋ ورگاندارىنىڭ وكىلدەرىنە بەرۋدى وتە سۇرايدى.
«ەگەر كاسىپكەر تەرگەۋشىنىڭ كەلۋىن كۇتپەسە جانە تازارتۋ جانە قالپىنا كەلتىرۋ جۇمىستارىن جۇرگىزسە، قارجىلىق قۇجاتتاردان باسقا، كەلتىرىلگەن زالالدى وتەۋ تۋرالى ماسەلەنى قاراۋ ءۇشىن نەگىز بولاتىن فوتو جانە ۆيدەو مالىمەتتەرىن ۇسىنۋ قاجەت»، - دەدى ول.
پوليسيا وقيعا بولعان جەردى تەكسەرگەننەن كەيىن حاتتامامەن تانىسىپ، قاجەت بولعان جاعدايدا تولىقتىرۋلار جاساپ، تەرگەۋشىنىڭ مالىمەتتەرىن، تىركەۋ ءنومىرىن سۇراپ، تەرگەۋشىدەن جابىرلەنۋشى رەتىندە تانۋ تۋرالى قاۋلى الۋ كەرەك.
«قارجىلىق قۇجاتتاردىڭ راستالعان كوشىرمەلەرىن، بۇلىنگەن نەمەسە ۇرلانعان مۇلىكتىڭ ءتىزىلىمىن تەرگەۋ ورگاندارىنا ۇسىنۋ قاجەت. بۇدان باسقا، پوليسيا قىزمەتكەرلەرىنەن الىنعان قۇجاتتارمەن، سونداي-اق ءۇي - جايعا، جابدىققا، ونىمگە قۇقىق بەلگىلەيتىن قۇجاتتارمەن (جۇكقۇجاتتار، شوت-فاكتۋرالار، كىرىس اكتىلەرى جانە ت.ب.) اۋداندىق اكىمدىكتەگى ءتيىستى كوميسسياعا جۇگىنۋ قاجەت»، - دەپ حابارلادى يبراگيموۆ.
جوعارىدا كورسەتىلگەن قۇجاتتارى جوق كاسىپكەرلەر ءۇشىن قازىرگى ۋاقىتتا زالالدى باعالاۋ تەتىگى ازىرلەنىپ جاتقانى اتاپ ءوتىلدى.
تەرگەۋ امالدارى جۇرگىزىلگەننەن كەيىن زاقىمدالعان وبەكتىدە جوندەۋ جۇمىستارىن جۇرگىزۋگە جانە قىزمەتتى قايتا باستاۋعا بولادى.