قالامىزداعى 343 مىڭ سۋبەكتىنىڭ 277 مىڭى عانا جۇمىس ىستەيدى.
بۇل تۋرالى الماتى قالاسى كاسىپكەرلەر پالاتاسىنىڭ ديرەكتورى ايتۋار قوشمامبەتوۆ وڭىرلىك كوممۋنيكاسيالار قىزمەتى بريفينگىندە ايتتى، دەپ حابارلايدى Almaty-akshamy.kz
ۇلتتىق پالاتانىڭ مىندەتى – بيزنەستىڭ قۇقىقتارى مەن مۇددەلەرىن قورعاۋ، بيزنەس جۇمىسى ءۇشىن زاڭنامالىق جانە باسقا دا رەتتەۋشى باستامالاردى قالىپتاستىرۋ ۇدەرىسىنە كاسىپكەرلەردى كەڭىنەن قامتۋدى جانە تارتۋدى قامتاماسىز ەتۋ.
مەملەكەت باسشىسى قاسىم-جومارت توقايەۆ ايتقانداي: «قازاقستاندا بيزنەستى ايماقتىق قانا ەمەس، سونىمەن قاتار جاھاندىق دەڭگەيدە دامىتۋ ءۇشىن زور مۇمكىندىكتەر بار». ءبىز ءۇشىن ينۆەستيسيانى ۇلعايتۋ جانە بيزنەس ورتانى جاقسارتۋ وتە ماڭىزدى. بۇل باعىتتا جوسپارلى جۇمىستار جۇرگىزىلۋدە. وسى جۇمىستىڭ نەگىزگى ناتيجەلەرىن ايتا كەتەيىن.
«ۇلتتىق ستاتيستيكا بيۋروسىنىڭ مالىمەتى بويىنشا، تىركەلگەن شوك سۋبەكتىلەرىنىڭ سانى بويىنشا الماتى كوش باستاپ تۇر. «مەگاپوليستە 343 مىڭ سۋبەكتى بولسا، ونىڭ 277 مىڭى عانا جۇمىس ىستەيدى. وتكەن جىلمەن سالىستىرعاندا ءوسىم 30 پايىزدى قۇراعان»، - دەدى ايتۋار قوشمامبەتوۆ.
وكق سپيكەرىنىڭ ايتۋىنشا، جالپى 2022 جىل وتاندىق بيزنەس ءۇشىن، اسىرەسە الماتىلىق كاسىپكەرلەر ءۇشىن وڭاي بولعان جوق. الماتىدا جىل باسىندا ورىن العان قاڭتار وقيعاسى ۇمىتىلعان جوق، ونىڭ كاسىپكەرلەرگە تيگىزگەن اسەرى ءالى دە بار.
«جاعداي قالىپقا كەلتىرىلگەننەن كەيىن ءبىز جەدەل جەلى اشىپ، بيزنەستىڭ قالاي جانە قانداي كولەمدە زارداپ شەككەنى تۋرالى اقپارات جيناۋدى باستادىق. 2000-نان استام قوڭىراۋ كەلىپ ءتۇستى. الماتىدا زارداپ شەككەن 2 مىڭعا جۋىق كاسىپكەرلىك سۋبەكتىسى انىقتالدى. ولاردىڭ ەسەپتەۋلەرى بويىنشا جالپى شىعىن كولەمى 94،8 ملرد تەڭگەدەن اسقان»، - دەپ جالعاستىردى ا.قوشمامبەتوۆ.
بيىلعى جىلى «اتامەكەن» ۇكپ باستاماسىمەن مەملەكەت باسشىسى جاپپاي تارتىپسىزدىكتەر مەن مورادەرلىكتەن شاعىن جانە ورتا بيزنەسكە كەلتىرىلگەن زالالدى وتەۋ باستاماسىن قولداپ، ناتيجەسىندە بيزنەس قاۋىمداستىقتىڭ ۇسىنىستارىن ەسكەرەتىن مەحانيزم ازىرلەندى.
ءوتىپ بارا جاتقان جىلدىڭ ىشىندە كەلتىرىلگەن زالالدى وتەۋ جونىندەگى كوميسسيانىڭ 40 وتىرىسى وتكىزىلىپ، «InfoKazakhstan» پورتالىنا تۇسكەن بارلىق وتىنىشتەر قارالدى.
16 ميلليارد 189 ميلليون تەڭگەگە 1640 ءوتىنىم قولداۋ تاپتى. ونىڭ ىشىندە «جاڭا الاتاۋ» قورىنان – 1 294،8 ملن تەڭگەگە 636 ءوتىنىش، بيۋدجەت قاراجاتى ەسەبىنەن – 14 ملرد 894 ملن تەڭگەگە 1 004 ءوتىنىش.
الماتىدا قاڭتار وقيعاسىنا بايلانىستى زارداپ شەككەن شوب سۋبەكتىلەرىنە كومەك كورسەتۋگە دايىن ەرىكتىلەر رەەسترى قۇرىلدى، 1000 ادامعا دەيىن اۋديتورياسى بار «kushimiz_birlikte» Instagram پاراقشاسى اشىلدى. Instagram جەلىسىندەگى «kushimiz_birlikte» پاراقشاسى ارقىلى قاڭتار وقيعاسىنان زارداپ شەككەن شوب 9 كاسىپكەرگە كومەك كورسەتىلدى.
جالپى العاندا، قاڭتار وقيعاسىنان 67 ءىرى بيزنەس سۋبەكتىسى زارداپ شەكتى، ونىڭ 62ء-سى الماتىعا تيەسىلى.