جاسىل جەلەكتەن جارىق كورىنەدى: الماتىدا اعاشتارمەن كومكەرىلگەن كوشەلەردى جارىقتاندىرۋ جولى تابىلدى
الماتىدا بيىكتىگى 4 مەتر بولاتىن جاڭا كرونشتەيندەر ورناتۋ باستالدى. بۇل شامداردى اعاشتان جوعارى ورنالاستىرىپ، كوشە بويىن تولىق جارىقپەن قامتاماسىز ەتۋگە مۇمكىندىك بەرەدى. بۇل تۋرالى «الماتى قالا جارىق» مكك باسشىسى يگور مىسيك مالىمدەدى، دەپ حابارلايدى aqshamnews.kz
«الماتى وتە جاسىل قالا، مۇنداعى اعاشتاردىڭ كوپتىگى – قالانىڭ ەكوجۇيەسىنىڭ ءبىر بولىگى. كوپتەگەن جاسىل ايماقتاعى اعاشتار جارىق شامدارىن كولەڭكەلەپ قويادى. ءبىز باسقا مەكەمەلەرمەن بىرلەسىپ، اعاشتاردى سانيتارلىق تۇرعىدان رەتتەپ، ەندى 4 مەترلىك جاڭا كرونشتەيندەر ورناتىپ جاتىرمىز. بۇل بيىل ەنگىزىلگەن جاڭالىقتىڭ ءبىرى»، – دەدى ول.
تىرەكتەردىڭ بيىكتىگى حالىقارالىق ستاندارتقا ساي تاڭدالادى: جولدار ءۇشىن 7-دەن 12 مەترگە دەيىن، ال ساياباقتار مەن سكۆەرلەر ءۇشىن 3-تەن 7 مەترگە دەيىن.
سونىمەن قاتار، تروتۋاردى جارىقتاندىرۋدىڭ جاڭا جۇيەسى ەنگىزىلۋدە. المالى اۋدانىندا عانا 300-دەن استام كرونشتەين مەن ءدال سونشا شام ورناتىلعان. قالانىڭ اكىمى ەربولات دوسايەۆتىڭ باستاماسىمەن جاياۋ جۇرگىنشىلەر وتكەلدەرىنە تۇنگى جارىق ورناتۋ جۇمىستارى باستالدى.
«كرونشتەيندەر جولدىڭ ۇستىنە ورناتىلىپ، تىكەلەي جولدىڭ ورتاسىنا قاراي باعىتتالادى جانە جارىقتى مول بەرەدى. بۇل شامداردى اعاشتاردىڭ جاپىراعى كولەڭكەلەمەيدى، وسىلايشا جولدىڭ جارىق ساپاسى ارتادى. ءقازىر مۇنداي كرونشتەيندەر الماتى ورتالىعىنداعى بىرنەشە كوشەگە قويىلدى، الداعى ۋاقىتتا ولاردى باسقا اۋدانعا دا ورناتامىز»، – دەدى يگور مىسيك.
ايتا كەتەيىك، 2024 جىلى الماتىدا 25 مىڭنان استام شام اۋىستىرىلىپ، 250 شاقىرىمنان استام كابەل تارتىلدى، 1800 تىرەك ورناتىلدى. 5000-نان استام ەسكى شامدار ەنەرگيا ۇنەمدەيتىن جارىقديودتى (LED) شامدارعا اۋىستىرىلدى. بۇل شامدار جارىعىراق، ۇزاق قىزمەت ەتەدى جانە الدەقايدا ۇنەمدى. مۇنىڭ ءبارى 2024 جىلدىڭ قاڭتارىنان باستاپ جارىقتاندىرۋدى قالپىنا كەلتىرۋ بويىنشا اتقارىلىپ جاتقان كەشەندى جۇمىستىڭ ءبىر بولىگى. بۇل جۇمىستار «الماتى قالا جارىق» مكك-عا وتكەننەن كەيىن قولعا الىنعان، سەبەبى بۇرىنعى جەكەمەنشىك كونسورسيۋممەن كەلىسىمشارت بۇزىلعان بولاتىن.