الماتىنىڭ جەتىسۋ اۋدانىندا قانداي جوبالار ىسكە اسىرىلدى

جەتىسۋ اۋدانى بويىنشا 69 كوشەدە 102 شاقىرىم ارىق جەلىسى بار

الماتىنىڭ جەتىسۋ اۋدانىندا جاۋىن جاۋسا، سۋ الىپ كەتەتىن ايماقتارعا جوندەۋ جۇرگىزىلدى، دەپ حابارلايدى Almaty-akshamy.kz Almaty.tv-گە سىلتەمە جاساپ.

جەتىسۋ اۋدانىنداعى كازاكوۆ كوشەسىندە سالىنعان ويىن الاڭى الىستان كوز تارتادى. تەك ءقازىر اۋا-رايىنىڭ قولايسىزدىعىنا بايلانىستى وندا اسىر سالعان بالا جوق. دەگەنمەن، مۇنداي دەمالاتىن ورىندى حالىق كوپ كۇتتى. ونى سۇراپ، الماتى اكىمىمەن كەزدەسۋگە دە باردى. اراعا ءبىراز ۋاقىت سالىپ ءوتىنىش ورىندالدى. قولدانىسقا بەرىلگەن الاڭدى قوس مەردىگەر مەكەمە جاساعان. اۋماقتا اۆتوتۇراق بار. بولاشاقتا قاۋىپسىزدىك ماقساتىندا ءبىر جاقتى قوزعالىسقا عانا رۇقسات ەتەتىن جول بەلگىسى قويىلماق. جاياۋ جۇرگىنشىلەرگە اۋماق ىڭعايلى بولا تۇسپەك.

«ءيا، شىنىندا بۇرىن اۋماق كۇتىمسىز قالعان ورمان سەكىلدى ەدى. تەك اعاشتارى عانا بولاتىن. ءقازىر جاقىن ماڭدا بالاباقشا، بالالاردى مەكتەپكە دايىندايتىن جەكەمەنشىك ۇيىمدار جۇمىس ىستەيدى. مۇندا ءجيى كەلەمىز. ويىن الاڭىن كورگەندە قۋاندىق. ويتكەنى، بالالاردى سەرگىپ قالادى، ال ولار ساباق وقۋعا كەتكەندە اتا-انالارعا دەمالىپ الۋعا بولادى»، – دەدى قالا تۇرعىنى اسەم يسلامباكييەۆا.

«قازىرگى تاڭدا جۇمىستار تولىق اياقتالعان. جارىق بەرىلدى. ورىندىقتار، ويىن الاڭىنا جاڭاشا فورماتتاعى ماف دەيمىز عوي، شاعىن ارحيتەكتۋرالىق پىشىندەر قويىلدى. قاسىنا قوسىمشا، جەردىڭ تاپشىلىعىنا بايلانىستى جۇگىرۋ الاڭى قاراستىرىلدى. جاتتىعۋ الاڭى، ۆوركاۋت زاتتارى قويىلدى»، – دەدى جەتىسۋ اۋداندىق كوممۋنالدى شارۋاشىلىق ءبولىمىنىڭ باسشىسى نۇرداۋلەت قالداروۆ.

جەتىسۋ اۋدانىندا سۋ باسۋ ءقاۋپى بار ايماقتار بار. ماسەلەن، بريۋسوۆ كوشەسىنىڭ تۇرعىندارى جاۋىن جاۋعاندا بەلۋاردان سۋ كەشۋگە ءماجبۇرمىز دەپ شاعىمداندى. ال كوكتەم جاڭبىرلى بولسا، قيىن. ءدۇيىم ەل كەزدەسۋدە كۇرمەۋى كوپ كۇردەلى ماسەلەنى تەزىرەك شەشىپ بەرۋدى سۇراعان بولاتىن.

ماماندار ماسەلەنى ەنى ەكى ەسەگە كەڭەيتىلگەن ارىق شەشەتىنىن ايتتى. جاڭاشا سالىنعان سۋاعار قاتتى سۋدىڭ دا قارقىنىنا توتەپ بەرەتىن كورىنەدى. ءقازىر جۇمىستىڭ باسىم بولىگى اياقتالعان. ارىقتى تەمىر تورلارمەن جابۋ عانا قالىپتى. ولار ۋاقىتىلى قوقىستان تازارتىپ تۇرۋ ءۇشىن الىنبالى-سالىنبالى ەتىپ جاسالادى. جالپى سۋ باسۋ ءقاۋپىن بولدىرماۋ ءۇشىن اۋقىمدى شارا قولعا الىندى.

«باسقارمالارمەن بىرىگىپ، ايماقتا 4 كوللەكتوردا، سونىمەن قاتار 3 مەكەن جايدا 1 كانالدا كۇردەلى جوندەۋ جۇمىسى ءجۇرىپ جاتىر. بيىل تولىعىمەن اياقتايمىز. الداعى ۋاقىتتا سۋ باسۋ ماسەلەسىن اۋداندا تولىعىمەن شەشەلەدى»، – دەدى جەتىسۋ اۋداندىق كورىكتەندىرۋ ءبولىمىنىڭ باسشىسى قۋانىش سەيتىمبەتوۆ.

ايتا كەتەيىك، جەتىسۋ اۋدانى بويىنشا 69 كوشەدە 102 شاقىرىم ارىق جەلىسى بار. ءقازىر 47 مەكەن جايدا 7،4 شاقىرىم سۋاعار سالىندى.