171 جۇرگىزۋشى ۇستالىپ، اكىمشىلىك جاۋاپكەرشىلىككە تارتىلدى.
الماتىدا «قورعاۋ سەرگەك» باعدارلاماسىنىڭ كومەگىمەن جالعان ءنومىرلى كولىكتەردىڭ جۇرگىزۋشىلەرى انىقتالىپ، ۇستالۋدا، دەپ حابارلايدى Almaty-akshamy.kz قازاقپاراتقا سىلتەمە جاساپ.
«الماتىدا «قورعاۋ سەرگەك» جۇيەسى 2021 جىلدىڭ قاراشا ايىنان باستاپ پيلوتتىق رەجيمدە قولدانىلىپ كەلەدى. ونىڭ كومەگىمەن جىل باسىنان بەرى جالعان مەملەكەتتىك نومىرمەن جۇرگەن (ق ر اقبك-نىڭ 590-بابى 3،4 بولىگى) 171 جۇرگىزۋشى ۇستالىپ، اكىمشىلىك جاۋاپكەرشىلىككە تارتىلدى. كولىكتەر ايىپپۇل تۇراعىنا قويىلدى. سونىمەن قاتار، وتكەن تاۋلىكتە ارنايى جارىق-دىبىس جانە داۋىستى سيگنالداردى زاڭسىز پايدالانعان ەكى كولىك جۇرگىزۋشىسى، 7 ماس جۇرگىزۋشى كولىكتى باسقارۋدان شەتتەتىلدى»، - دەدى الماتى قالالىق پوليسيا دەپارتامەنتىنىڭ جەرگىلىكتى پوليسيا قىزمەتى باسقارماسىنىڭ باستىعى، پوليسيا پولكوۆنيگى ماناپ ساتتاروۆ.
ونىڭ ايتۋىنشا، قازىرگى ۋاقىتتا الماتىدا جالعان مەملەكەتتىك نومىرمەن جۇرەتىن، كولىككە ارنايى بەلگى بەرۋ قۇرىلعىلارىن ورناتقان جانە كولىكتى ماس كۇيدە جۇرگىزگەن ادامداردى انىقتاپ، جاۋاپقا تارتۋ جۇمىستارى جالعاسۋدا.
«وتكەن تاۋلىكتە قالا جولدارىنداعى «قورعاۋ سەرگەك» جۇيەسى جالعان ءنومىر پايدالانعان 11 جۇرگىزۋشىنى انىقتادى. ولار جالپى سوماسى 12 ميلليون 680 تەڭگەنى قۇرايتىن 790 قۇقىقبۇزۋشىلىق جاساعان. بۇل كولىكتەر ارنايى ايىپپۇل تۇراعىنا ورنالاستىرىلدى»، - دەدى ماناپ ساتتاروۆ.
ايتا كەتەيىك، ايىپپۇل سالىنعاندار اراسىندا 1992 جىلى تۋعان ا.ەسىمدى ازامات بار. وعان جول قوزعالىسى ەرەجەسىن 92 مارتە بۇزعانى ءۇشىن 1 ملن 541 مىڭ تەڭگە كولەمىندە ايىپپۇل سالىنعان.