بازار قۇرىلتايشىسى 21 ساۋىردە اۋىسقان.
"بۇل جەر پايداكۇنەمدەر ءۇشىن ناعىز ماي شەلپەككە اينالدى". پرەزيدەنت ءدال وسىلاي دەپ سيپاتتاعان «التىن وردا» بازارىندا تاعى شۋ شىقتى، دەپ حابارلايدى Almaty-akshamy.kz Almaty.tv سىلتەمە جاساپ.
800-دەي كاسىپكەر قاراجات قۇيعان ساۋدا ورنى ءالى اشىلماعان. ودان بولەك، بازار اكىمشىلىگىنىڭ اياق استى اۋىسقانى ماسەلەنى ودان ءارى ۋشىقتىرعان كورىنەدى. «جاڭا نىسان اشىلعانشا تاۋارمەن ارى-بەرى كوشىپ، بەرەكەمىز كەتتى» دەگەن كاسىپكەرلەر قۇرىلىسى بىتپەگەن ساۋدا كەشەنىنەن ورىن ساتىپ العان. ولاردىڭ ايتۋىنشا، بازاردىڭ جاڭا اكىمشىلىگى اۋماعى 30 مىڭ شارشى مەتر بولاتىن نىسان ساۋداگەرلەرگە بەرىلمەيدى.
«امالسىزدان بار اقشامىزدى جيناپ، وسى جەردەن 12 مىڭ دوللاردان 2 ورىن الدىم. 20 مىڭ دوللاردى قولما-قول بەردىم، قالعان 4 مىڭىن ءبولىپ تولەۋىم كەرەك ەدى»، – دەدى ساۋداگەر گۇلبانۋ تاتىبايەۆا.
ەكى قاباتتى ساۋدا ورتالىعىنىڭ قۇرىلىسى 2 جىل بۇرىن باستالعان. ال وعان ساۋداگەرلەر بىرىگىپ جيناعان 4 ميلليارد تەڭگە جۇمسالعان.
«باس پروكۋراتۋرا تاراپىنان بىزدە 2 اي تەكسەرۋ بولدى. سوعان بايلانىستى جۇمىستىڭ رەجيمى شەگەرىلدى. وسى مامىردا ءبىتۋ كەرەك بولعان، ءبىراق وسىنداي سەبەپتەرمەن قۇرىلىس جۇمىسى توقتاپ قالدى»، – دەدى «التىن وردا» بازارى بۇرىنعى اكىمشىلىگىنىڭ وكىلى داۋلەتجان ديمەنبايەۆ.
بازاردىڭ بۇرىنعى اكىمشىلىك وكىلىنىڭ سوزىنشە، قۇرىلتايشى 21 ساۋىردە اۋىسقان. ال بازاردىڭ جاڭا باسشىلىعى قۇرىلىس جۇمىسىنىڭ 90 پايىزعا دەيىن اياقتالعانىن العا تارتىپ، ساۋدا كەشەنىنىڭ جۇمىسى جۋىردا باستالاتىنىن ايتتى. كاسىپكەرلەرگە ورىن بەرىلمەيدى دەگەن سىبىستى جوققا شىعاردى.
«بۇل - پروۆوكاسيا. ونداي نارسە بولمايدى. بۇل جەردە حالىقتىڭ ەش كىناسى جوق. حالىق تىرشىلىك ەتەم دەپ ساۋدا ورنىن الدى، ءبىز بەرەمىز. 1،5 ايدا اياقتاپ، كەشەندى اشامىز»، – دەدى «التىن وردا» بازارى اكىمشىلىگىنىڭ باسشىسى ەرمەك مارقابايەۆ.
پرەزيدەنت قاسىم-جومارت توقايەۆ «التىن وردا» بازارىنىڭ ماسەلەسىنە توقتالىپ، ءتارتىپ ورناتۋدى تاپسىرعان بولاتىن.