الماتىدا "سەرگەك" بەينەباقىلاۋ جۇيەسى جاڭا فۋنكسيونالمەن تولىقتى.
جاڭا جۇيە جول قوزعالىسى ەرەجەلەرىن ساقتاۋ دەڭگەيىن ارتتىرۋ ماقساتىندا پيلوتتىق رەجيمدە ىسكە قوسىلدى، دەپ حابارلايدى aqshamnews.kz Polisia.kz-كە سىلتەمە جاساپ.
قازىرگى ۋاقىتتا ول ساتبايەۆ كوشەسىنىڭ بويىمەن، دوستىق داڭعىلىنان ءۋاليحانوۆ كوشەسىنە دەيىنگى ۋچاسكەدە (وڭتۇستىك جانە سولتۇستىك جاقتا) تاجىريبە جۇزىندە جۇمىس ىستەپ تۇر. بۇل بەينەباقىلاۋ جۇيەلەرى ەندى كولىكتەردىڭ تۇراققا قويۋ ەرەجەلەرىن، ونىڭ ىشىندە ەكىنشى قاتارعا كولىك قويۋ سياقتى بۇزۋشىلىقتاردى دا تىركەيتىن بولادى.
الماتى قالاسىنىڭ اكىمشىلىك پوليسيا باسقارماسى جول قوزعالىسىنا قاتىسۋشىلارعا قازاقستان رەسپۋبليكاسىنىڭ جول قوزعالىسى ەرەجەلەرىنە (ق ر جقە) سايكەس كولىكتەردى دۇرىس قويۋ ءتارتىبىن ەسكەرتەدى. اتاپ ايتقاندا 85-تارماققا ساي، جول جيەگىنە پاراللەل ءبىر قاتارعا قويۋعا رۇقسات ەتىلەدى. ال 87 جانە 88-تارماقتارعا سايكەس، كولىكتى باسقا جۇرگىزۋشىلەردىڭ قوزعالىسىنا كەدەرگى كەلتىرەتىن جەرلەردە، ونىڭ ىشىندە كىرەبەرىستەر مەن شىعابەرىستەردى، سونداي-اق كەپتەلىس تۋدىرۋى مۇمكىن ورىنداردى جاۋىپ قويۋعا تىيىم سالىنادى.
سونىمەن قاتار ق ر اكىمشىلىك قۇقىق بۇزۋشىلىق تۋرالى كودەكسىنىڭ (اقبك) 597-بابىنىڭ 3-بولىگىنە سايكەس، جول قوزعالىسىنا كەدەرگى كەلتىرەتىن كولىك قويۋ ەرەجەسىن بۇزعانى ءۇشىن جۇرگىزۋشىگە 10 اەك مولشەرىندە ايىپپۇل سالىنادى. بۇل شامامەن 39 320 تەڭگەنى قۇرايدى. ەگەر ايىپپۇل 7 كۇن ىشىندە تولەنسە، جەڭىلدىك قاراستىرىلىپ، 5 اەك (19 660 تەڭگە) مولشەرىندە تولەنەدى. الماتى قالالىق پوليسيا دەپارتامەنتىنىڭ باسپا ءسوز قىزمەتى جۇرگىزۋشىلەردى جول ەرەجەلەرىن قاتاڭ ساقتاۋعا جانە قالاداعى كولىك قوزعالىسىن ءقاۋىپسىز ءارى ىڭعايلى ەتۋگە شاقىرادى.