2025 جىل – ەلىمىزدە «جۇمىسشى ماماندىقتار جىلى» دەپ جاريالاندى.
بۇل باستاما تەحنيكالىق جانە كاسىپتىك ءبىلىم بەرۋدى دامىتۋعا، جاستاردى ەڭبەك نارىعىندا سۇرانىسقا يە ماماندىقتارعا باۋلۋعا باعىتتالعان. وسىنداي يگى ماقساتتاردى جۇزەگە اسىرۋ جولىندا الماتى جولاۋشىلار كولىگى جانە تەحنولوگيالار كوللەدجى 2025 جىلدىڭ 14 ءشى اقپانى كۇنءى الماتى قالاسى تۇركسىب اۋدانىنىڭ №195، №189، №78 جانە الاتاۋ اۋدانىنىڭ №164 مەكتەپتەرىنىڭ ۇستازدارى مەن وقۋشىلارىنا اشىق ەسىك كۇنىن ۇيىمداستىرىپ، جۇمىسشى ماماندىقتارىنىڭ ماڭىزدىلىعىن تاعى ءبىر مارتە دالەلدەدى.
قوعامنىڭ دامۋى مەن ەكونوميكانىڭ تۇراقتىلىعى بىلىكتى جۇمىسشىلارعا تىكەلەي بايلانىستى. ينجەنەرلەر مەن كونسترۋكتورلار قانشا مىقتى جوبا جاساسا دا، ونى ىسكە اسىراتىن – قولىندا كاسىبي قۇرالى بار شەبەر ماماندار. الماتى جولاۋشىلار كولىگى جانە تەحنولوگيالار كوللەدجىندە اۆتوكولىك جوندەۋ، دانەكەرلەۋشى، تىگىن ءوندىرىسى، شاشتاراز ونەرى، ەلەكتر جانە مەحانيكالىق جۇيەلەردى باسقارۋ سياقتى ماڭىزدى باعىتتار بويىنشا ءبىلىم بەرىلەدى. اشىق ەسىك كۇنىنە كەلگەن مەكتەپ وقۋشىلارى وسى ماماندىقتار جايلى جان-جاقتى ماعلۇمات الدى.
كوللەدج وقىتۋشىلارى وقۋ ءۇردىسى، تاجىريبەلىك ساباقتار، زاماناۋي تەحنيكالارمەن جابدىقتالعان زەرتحانالار تۋرالى باياندادى. ال، ءبىلىم الۋشىلار وزدەرى مەڭگەرىپ جاتقان كاسىپتەرىن ءىس جۇزىندە كورسەتىپ، ءتۇرلى شەبەرلىك سىنىپتارىن وتكىزدى.
سونىمەن قاتار، شىعارماشىلىق كوزقاراستى دامىتۋ جانە سۇرانىسقا يە ماماندىقتى تاڭداۋعا كومەكتەسۋ ماقساتىندا وقۋشىلار «گولۋبايا زۆەزدا كازاحستانا» كومپانياسىنا ەكسكۋرسياعا باردى. بۇل كومانيا-«Mercedes Benz» مارقاسىنىڭ رەسمي ديلەرى. وقۋشىلارعا اۆتوسەرۆيس جانە اۆتوموبيل يندۋسترياسى سالاسىنداعى كاسىبي قىزمەتپەن تانىسۋعا مۇمكىندىك بەرىلدى.
بۇگىندە جۇمىسشى ماماندىقتارىنا سۇرانىس ارتىپ كەلەدى. قازاقستاندىق جانە شەتەلدىك كاسىپورىندار تاجىريبەلى مەحانيكتەردى، تەحنيك-مامانداردى، دانەكەرلەۋشىلەردى، اۆتوسلەسارلاردى ىزدەپ، جوعارى جالاقى مەن تۇراقتى جۇمىسپەن قامتاماسىز ەتۋگە دايىن. كوللەدج ديرەكتورى ءىس-شارا بارىسىندا:
"ءبىز جاستارعا ساپالى ءبىلىم بەرىپ قانا قويماي، ولاردىڭ ەڭبەك نارىعىندا ءوز ورىندارىن تابۋىنا كومەكتەسەمىز. ءبىزدىڭ تۇلەكتەرىمىز – ەلىمىزدىڭ ەكونوميكاسىن دامىتۋعا ۇلەس قوساتىن بىلىكتى ماماندار،" – دەپ اتاپ ءوتتى.
اشىق ەسىك كۇنىنە كەلگەن جاستار جۇمىسشى ماماندىقتارىنىڭ تەك قاجەتتى عانا ەمەس، سونىمەن قاتار بەدەلدى ءارى تابىستى ەكەنىن ءتۇسىندى. ءوز قولىمەن ەل يگىلىگىنە ەڭبەك ەتۋ – ۇلكەن مارتەبە.
جۇمىسشى ماماندىقتارى – تەك بۇگىنگى عانا ەمەس، ەرتەڭگى كۇننىڭ دە كەپىلى. الماتى جولاۋشىلار كولىگى جانە تەحنولوگيالار كوللەدجىنىڭ باستاماسى – كاسىبي بىلىمگە ۇمتىلعان جاستارعا جول اشاتىن ماڭىزدى قادام. وسىنداي ءىس-شارالار ارقىلى ءبىز ەڭبەك ادامىنىڭ مارتەبەسىن كوتەرىپ، ەل ەكونوميكاسىنىڭ بەرىك ىرگەتاسىن قالايمىز.
"قايراتتى ەڭبەك – باقىتىڭنىڭ شىراعى" دەمەكشى، ءار جاس ءوز بولاشاعىن سەنىمدى قولمەن قالىپتاستىرا الادى. ال جۇمىسشى ماماندىعىن مەڭگەرۋ – سول بولاشاققا اپاراتىن بەرىك كوپىر.