الماتى قالاسىنداعى ءابىلحان قاستەيەۆ اتىنداعى ق ر مەملەكەتتىك ونەر مۋزەيىندە بەلگىلى ساۋلەتكەر-سۋرەتشى مولجىگىت بەرىك ۇزاقباي ۇلىنىڭ «ۇشقان ۇيا» اتتى جەكە شىعارماشىلىق كورمەسىنىڭ اشىلۋ سالتاناتى ءوتتى.
سالتاناتتى شارادا اتالعان مۋزەي ديرەكتورىنىڭ ورىنباسارى ا.حوجامۋراتوۆا، ونەرتانۋشى ب.بارمانقۇلوۆا، قازاقستان سۋرەتشىلەر وداعىنىڭ ءتوراعاسى ءو.جۇبانيازوۆ، ت.ب ارىپتەستەرى كورمە يەسىنە ىزگى لەبىزدەرىن ارنادى.
ەستە جوق ەسكى زامانداردان بەرى ادامزاتپەن بىرگە جاساپ كەلە جاتقان ەجەلگى ونەردى باعالايتىن جانداردىڭ نازارىنا سۋرەتشىنىڭ 80-نەن استام كەسكىندەمەلىك، گرافيكالىق تۋىندىلارىمەن قاتار، ساۋلەت ونەرىندەگى نىساندار جوبالارى بەينەلەنگەن بىرنەشە پلانشەتتەر ۇسىنىلادى.
بەرىك مولجىگىتتىڭ نەگىزگى كاسىبى ساۋلەتكەر، ءبىراق كەسكىندەمە مەن گرافيكا ونىڭ ومىرىنە گارمونيا اكەلەتىن، ەموسيالار مەن سەزىمدەرگە ەرىك بەرەتىن جان دۇنيەسىنىڭ ءبىر بولىگى بولدى. مىسالى، يماندىلىق يىرىمدەرىنە تولى "قاعبا"، "ءتاۋاپ ەتۋ"، "ناماز" كارتينالارى ىشكى رۋحاني الەمىنەن حابار بەرسە، «بالالىق»، «ۇشقان ۇيا»، «اجەمنىڭ بەينەسى» تۋىندىلارى – سۋرەتشىنىڭ كوكەيىندە قالعان بالالىق شاقتىڭ بال كۇندەرى، ساعىنعان ساعىم جىلدارىنىڭ ەستەلىكتەرى. كورمەنىڭ «ۇشقان ۇيا» دەپ اتالۋى دا سودان بولسا كەرەك.
ن.ۆ. گوگول اتىنداعى الماتى كوركەمسۋرەت ۋچيليششەسىن، كەيىن لەنينگرادتاعى كسرو كوركەمونەر اكادەمياسىنىڭ ي.ە. رەپين اتىنداعى كەسكىندەمە، ءمۇسىن جانە ساۋلەت ونەرى ينستيتۋتىن ءتامامداعان ب.مولجىگىت 40 جىلعا جۋىق ساۋلەت-جوبالاۋ سالاسىندا قازاقستاننىڭ قالالارىنداعى كوپتەگەن اسەم عيماراتتار جوباسىنىڭ اۆتورى بولىپ تابىلادى. ولاردىڭ ىشىندە الماتى اۋەجايىنداعى جولاۋشىلارعا ارنالعان جاڭا تەرمينال، تاراز قالاسىنداعى سپورت سارايى، استاناداعى «كەرۋەن» ويىن-ساۋىق كەشەنى، "دۋمان" ىقشاماۋدانىنداعى 1000 ورىندىق مەكتەپ، قازۇۋ اۋماعىنداعى ءبىلىم ساعاتى، تاعى باسقا نىساندار بار.
مولجىگىت بەرىك ۇزاقباي ۇلى – قازاقستاننىڭ كۇرمەتتى ساۋلەتشىسى، قازاقستان رەسپۋبليكاسىنىڭ ساۋلەتشىلەر جانە سۋرەتشىلەر وداعىنىڭ مۇشەسى، بولگاريا ساۋلەتشىلەر وداعى «التىن كاپيتەل»، XII دۇنيەجۇزىلىك ساۋلەتشىلەر تريەننالەسى «INTERARCH‑2012» «التىن مەدال» ماراپاتىنىڭ يەگەرى.
كورمە 2022 جىلدىڭ 20 قاڭتارىنا دەيىن جالعاسادى.