الماتىدا ساربازدار ۆولەيبول جارىسىن قىزدىردى

سپورتتىق باسەكەگە اسكەري قىزمەتشىلەر قاتىستى.

الماتى قالاسىندا قازاقستان رەسپۋبليكاسى ۇلتتىق ۇلانى «وڭتۇستىك» وڭىرلىك قولباسشىلىعىنا قاراستى اسكەري بولىمدەر اراسىندا ۆولەيبولدان چەمپيونات ءوتتى، دەپ حابارلايدى اlmaty-akshamy.kz.

سپورتتىق باسەكەگە الماتى، شىمكەنت، قىزىلوردا، تاراز جانە تالدىقورعان قالالارىنان كەلگەن توعىز كوماندا قاتىسىپ، ءوزارا ب ا ق سىنادى. ءار كوماندا قۇرامىندا التى اسكەري قىزمەتشىدەن بولدى.

جارىستىڭ شىمىلدىعىن تۇرگەن «وڭتۇستىك» وڭىرلىك قولباسشىلىعى قولباسشىسىنىڭ ورىنباسارى، پولكوۆنيك كونستانتين قۋاتوۆ العى سوزىندە ۆولەيبولدان وزدەرىنىڭ شەبەرلىگىن كورسەتۋ ءۇشىن ءار قالادان كەلگەن كوماندالاردى قۇتتىقتاپ، جەڭىس تۇعىرىنان كورىنۋلەرىن تىلەدى.

«جەكە قۇرامنىڭ سپورتپەن شۇعىلدانۋىنا مول مۇمكىندىكتەر جاسالۋدا. فيزيكالىق دەنە كۇشتەرىن شىنىقتىرۋ وتە ماڭىزدى»، - دەپ اتاپ ءوتتى.

 ويىن وتە قىزۋ تارتىستى ءوتتى. ءار كوماندا ۇيىمشىلدىقپەن ادەمى ويىن ورنەگىن كورسەتىپ، قارسىلاس كوماندالار ۆولەيبول سەتكاسىنا ۇپاي سالۋمەن بولدى. شارشى الاڭداعى تارتىستى ويىن 6506 اسكەري ءبولىمى مەن 5513 اسكەري بولىمدەرىنەن كەلگەن كوماندالار اراسىندا ءوربىدى.

العاشقى مينۋتتاردا شىمكەنت قالاسىنىڭ كومانداسى شابۋىلدارىن ۇدەتىپ جويقىن سوققىلار جاساپ، ەسەپتى ەسەلەپ الدى. ۇپاي سانىمەن ارتتا قالعانىن سەزگەن تارازدىق سپورتشىلار دا قاراپ قالماي، ويىن تىزگىنىن ءوز يەلىكتەرىنە العان ولار قارسىلاس كوماندانىڭ قاتەلىكتەرىن ۇتىمدى پايدالانىپ ۇپاي سانىن تەڭەستىرە ءبىلدى. ويىن اياقتالۋىنا بىرەر مينۋتتار قالعاندا قوس كوماندانىڭ ويىنشىلارى بايراقتى باسەكەدە بارىن سالدى. ناتيجەسىندە شيراق قيمىل تانىتقان تارازدىقتاردىڭ باعى جانىپ، مەرەيى ۇستەم بولدى.

تارتىستى وتكەن جارىستىڭ ناتيجەسى بويىنشا الدىنا جان سالماعان تاراز قالاسىنان كەلگەن 5513 اسكەري ءبولىمىنىڭ كومانداسى چەمپيون اتاندى. جۇلدەلى ەكىنشى ورىندى شىمكەنت قالاسىنىڭ 6506 اسكەري ءبولىمى يەلەندى. ال ءۇشىنشى ورىندى الماتى قالاسىنداعى 5571 اسكەري ءبولىمىنىڭ كومانداسى مىسە تۇتتى.

جەڭىمپازدار «وڭتۇستىك» وڭىرلىك قولباسشىلىعى قولباسشىسىنىڭ اتىنان كۋبوك، ديپلوم جانە باعالى سىيلىقتارمەن ماراپاتتالدى. سونىمەن قاتار ويىن بارىسىندا بەلسەندىلىگىمەن كوزگە تۇسكەن ەرمەك سۇرابالدينوۆ «ۇزدىك بايلانىستىرۋشى»، يگور لوپاتين «ۇزدىك ويىنشى»، جانابەك ماقشاتوۆ «ۇزدىك شابۋىلشى»، ەرنازار لەسبەكوۆ «ۇزدىك قورعاۋشى» نوميناسيالارىنا يە بولدى.