الماتى پوليسياسى جول قوزعالىسىنا قاتىسۋشىلارعا ۇندەۋ جاسادى.
ويتكەنى قالادا ساموكاتتاردىڭ قاتىسۋىمەن بولاتىن جول-كولىك وقيعالارى جيىلەپ كەتتى. قالا تۇرعىندارىنىڭ جايلى جانە ءقاۋىپسىز ءومىر ءسۇرۋىنىڭ ماڭىزدى فاكتورى – جول قاۋىپسىزدىگى. الماتى پوليسياسى پروفيلاكتيكالىق ءىس-شارالاردى كۇشەيتتى، دەپ حابارلايدى Almaty-akshamy.kz.
ونىڭ باستى ماقساتى – وعان قاتىسۋشىلار اراسىندا جول قوزعالىسى قاۋىپسىزدىگى تالاپتارىنىڭ ساقتالۋىنا باقىلاۋدى كۇشەيتۋ جانە جول-كولىك وقيعالارىن ازايتۋ.
– قالا تۇرعىندارى اراسىندا بالامالى كولىك تۇرلەرى، سونىڭ ىشىندە ساموكاتتار ءالى دە سۇرانىستا. الماتى جولدارىندا ولاردىڭ 50 مىڭنان استامى بار، سايكەسىنشە جول-كولىك وقيعاسى دا كوبەيگەن. جىل باسىنان بەرى ساموكاتتاردىڭ قاتىسۋىمەن 38 جول-كولىك وقيعاسى تىركەلىپ، 42 ادام زارداپ شەكتى، ابىروي بولعاندا، قازا بولعاندار جوق. ىشكى ىستەر مينيسترلىگى قابىلداعان شارالار ساموكاتتاردى پايدالانۋ جاعدايىن ءبىرشاما تۇراقتاندىرۋعا مۇمكىندىك بەردى: جاس شەكتەۋلەرى بەلگىلەندى، قورعانىس قۇرالدارىن مىندەتتى تۇردە پايدالانۋعا جانە جولاۋشىلاردى تاسىمالداۋعا تالاپتار قويىلدى. الايدا قايعىلى وقيعالار ءادى دە جالعاسۋدا. ساموكات پايدالانۋشىلار جول قوزعالىسىنا قاتىسۋشىلاردىڭ وسال ساناتتارىنىڭ ءبىرى بولىپ تابىلادى، – دەدى الماتى قالالىق پد جەرگىلىكتى پوليسيا قىزمەتى باسقارماسىنىڭ باستىعى سەرىك شۋمايەۆ.
سپيكەردىڭ ايتۋىنشا بالامالى كولىك تۇرلەرىن جۇرگىزەتىن ادامداردىڭ قر-نىڭ جول قوزعالىسى ەرەجەلەرىن بۇزۋ دەرەكتەرىن انىقتاۋ بويىنشا دا جۇمىس كۇشەيتىلگەن. جىل باسىنان بەرى جولدىڭ ورتاسىندا ءجيى قوزعالاتىن، جەكە قورعانۋ قۇرالدارىنىڭ مىندەتتى بولۋى تالاپتارىن ەلەمەيتىن، كامەلەتكە تولماعانداردىڭ ساموكاتتارمەن جۇرۋىنە جول بەرگەن 7،5 مىڭنان استام ساموكات جۇرگىزۋشىلەرى اكىمشىلىك جاۋاپكەرشىلىككە تارتىلدى.
– مەن جول قوزعالىسىنا قاتىسۋشىلاردى جقە-نى قاتاڭ ساقتاۋعا شاقىرامىن. اتا-انالار ءوز بالاسىنىڭ قاۋىپسىزدىگى ءۇشىن تولىق جاۋاپكەرشىلىكتى سەزىنۋى كەرەك. قىلمىسقا نەمقۇرايلى قاراماڭىز، بالاڭىزدى قورعاڭىز، ءوزىڭىز ۇلگى بولىپ ولارعا زاڭدى قۇرمەتتەۋدى ۇيرەتىڭىز، – دەدى پولكوۆنيك شۋمايەۆ.