الماتى قالاسى وڭىرلىك كوممۋنيكاسيالار قىزمەتىنىڭ الاڭىندا مەملەكەتتىك كىرىستەر دەپارتامەنتى باسشىلارىنىڭ قاتىسۋىمەن باسپا ءسوز كونفەرەنسياسى ءوتتى. بريفينگ بارىسىندا جاڭا سالىق كودەكسىندەگى نەگىزگى وزگەرىستەر تالقىلاندى. باستى جاڭالىقتاردىڭ ءبىرى – ەسەپتىلىكتى ۋاقىتىلى تاپسىرماعان جاعدايدا دەكلاراسيا اۆتوماتتى تۇردە نولدىك كورسەتكىشتەرمەن جابىلۋى، سالىقتىق رەجيمدەر بويىنشا ىزدەۋ جۇيەسىنىڭ ەنگىزىلۋى، ققس ەسەپتەۋ مەن وتەم ءتارتىبىنىڭ وزگەرۋى، سونداي-اق سالىق تولەۋشىلەرگە سەرۆيستىك سۇيەمەلدەۋ قىزمەتىنىڭ دامۋى. بۇل شارالاردىڭ بارلىعى سالىقتىق اكىمشىلەندىرۋدى جەڭىلدەتۋگە جانە ەسەپ بەرۋ كەزىندە قاتەلىكتەردى ازايتۋعا باعىتتالعان.
الماتى قالاسى بويىنشا مكد-نىڭ جەكە كاسىپكەرلەر مەن جەكە تۇلعالاردى اكىمشىلەندىرۋ باسقارماسىنىڭ باسشىسى نۋرلىبەك ۋسپانوۆتىڭ ايتۋىنشا، جالپىعا بىردەي بەلگىلەنگەن جانە ارنايى سالىق رەجيمدەرىنىڭ باستى ايىرماشىلىعى سالىق سالۋ ءتاسىلى مەن شىعىنداردى ەسەپكە الۋ تارتىبىندە جاتىر.
"جالپىعا بىردەي بەلگىلەنگەن رەجيم بويىنشا كاسىپكەر ءوز شىعىندارىن ەسەپتەپ، تەك سالىق سالىناتىن تابىسىنان عانا سالىق تولەيدى. ال وڭايلاتىلعان رەجيمدە سالىق جالپى تابىستان ەسەپتەلەدى"، – دەدى ول.
قوسىلعان قۇن سالىعىن ەسەپتەۋ مەن وتەم تارتىبىنە دە وزگەرىستەر ەنگىزىلدى. تىكەلەي سالىقتاردى اكىمشىلەندىرۋ باسقارماسىنىڭ باسشىسى دارىن ءيبراحيمنىڭ ايتۋىنشا، سالىق مولشەرلەمەسى شوت-فاكتۋرانىڭ جازىلعان ۋاقىتىنا بايلانىستى بولادى.
"ەگەر شوت-فاكتۋرا 2025 جىلى جازىلسا، مولشەرلەمە 12% قۇرايدى، ال 2026 جىلدان باستاپ – 16%. ققس وتەمگە الۋ سول وپەراسيا جاسالعان كۇنگى مولشەرلەمە بويىنشا جۇرگىزىلەدى. سونىمەن قاتار، 2026 جىلدان باستاپ ءبىرىڭعاي وتەم الۋ كۇنى ەنگىزىلەدى – بۇل تاۋار، جۇمىس نەمەسە قىزمەت الىنعان كۇن بولىپ سانالادى"، – دەپ اتاپ ءوتتى دارىن يبراحيم.
جاڭا ەرەجەلەرگە كوشۋ پروسەسىن جەڭىلدەتۋ ماقساتىندا مكد كەڭەس بەرۋ قىزمەتىن كەڭەيتۋدى جوسپارلاپ وتىر.
"سالىق كودەكسىندە "سەرۆيستىك توپ" ۇعىمى ەنگىزىلدى. ەندى سالىق تولەۋشىلەر تىركەۋدەن باستاپ، قىزمەتىن توقتاتقانعا دەيىن كەڭەس بەرۋ، ءتۇسىندىرۋ جانە ەسەپتىلىكتى تولتىرۋ كەزىندە كومەك كورسەتۋ تۇرىندەگى جان-جاقتى قولداۋ الادى "، – دەدى مەملەكەتتىك قىزمەتتەر باسقارماسىنىڭ باسشىسى باقىتگۇل سەيتوۆا.
مكد الماتىنىڭ ءتۇسىندىرۋ جۇمىستارى جانە بايلانىس ورتالىعى باسقارماسىنىڭ باسشىسى ايجان بەكەيەۆا سالىق تولەۋشىلەرگە ىڭعايلى بولۋ ءۇشىن كەڭەس الۋ جولدارىنىڭ كوبەيگەنىن اتاپ ءوتتى.
"بارلىق مەملەكەتتىك كىرىستەر باسقارمالارىندا كەڭەس بەرۋ ورتالىقتارى جۇمىس ىستەيدى. سونىمەن قاتار ءبىز الەۋمەتتىك جەلىلەر ارقىلى دا بەلسەندى بايلانىستامىز، تىكەلەي ەفيرلەر وتكىزىپ، ازاماتتاردىڭ سۇراقتارىنا جاۋاپ بەرەمىز"، – دەدى ول.
جاقىن ۋاقىتتا مەملەكەتتىك كىرىستەر كوميتەتىنىڭ سايتىندا سالىق رەجيمدەرى بويىنشا ىزدەۋ جۇيەسى ىسكە قوسىلادى. بۇل قۇرال كاسىپكەرلەرگە ءوز سەرىكتەستەرىن تەكسەرىپ، ولاردى شەگەرىمگە قوسپاس بۇرىن سەنىمدى بولۋعا مۇمكىندىك بەرەدى.
"مۇنداي سەرۆيس قازىرگى تاڭدا ققس تولەۋشىلەر بويىنشا جۇمىس ىستەيدى، ەندى ونىڭ انالوگى سالىق رەجيمدەرى ءۇشىن دە پايدا بولادى"، – دەدى باقىتگۇل سەيتوۆا.
سالىق ەسەپتىلىگى دە جاڭارتىلماق. ەگەر سالىق تولەۋشى دەكلاراسيانى ۋاقىتىندا تاپسىرماسا، جۇيە اۆتوماتتى تۇردە نولدىك كورسەتكىشتەرمەن ەسەپتى قالىپتاستىرادى. بۇل رەتتە مەرزىمىنەن كەش تاپسىرعانى ءۇشىن اكىمشىلىك جاۋاپكەرشىلىك الىنىپ تاستالادى.
"ەگەر ەسەپ كەيىنىرەك قاعاز تۇرىندە – پوشتا نەمەسە حقكو ارقىلى تاپسىرىلسا، جۇيە نولدىك دەكلاراسيانى جاڭاسىمەن الماستىرادى. الايدا ءبىر جىل بويى ەسەپ تاپسىرماعان تۇلعالار „بەلسەندى ەمەس سالىق تولەۋشىلەر“ مارتەبەسىندە قالادى"، – دەپ ءتۇسىندىردى باقىتگۇل سەيتوۆا.
سونداي-اق كولىك، جەر جانە مۇلىك سالىعى بويىنشا اۆانستىق جانە اعىمداعى تولەمدەردى ەسەپتەۋ الىنىپ تاستالادى. ال اكسيز جانە حابارلاما نەگىزىندەگى قوسىمشا ەسەپ تۇرلەرى جاڭا "حابارلاما بويىنشا سالىق ەسەپتىلىگى" فورماسىمەن بىرىكتىرىلەدى.
سونىمەن قاتار سالىق تولەۋشىلەرگە وزدەرىنىڭ قىزمەت تۇرلەرىن راستايتىن وكەد كودتارىن تەكسەرىپ، جاڭارتۋعا كەڭەس بەرىلدى.
"مىسالى، كەيبىر شاعىن دۇكەندەر ءوز قىزمەتىن دۇرىس ەمەس كودپەن – لارەك نەمەسە كيوسك ساۋداسى رەتىندە كورسەتىپ ءجۇر. مۇنداي سايكەسسىزدىكتەردى بولدىرماۋ ءۇشىن كاسىپكەرلەرگە „eLicense“ پورتالى نەمەسە حقكو ارقىلى قەدك (وكەد)-تەرىن وزەكتەندىرۋدى ۇسىنامىز"، – دەدى باقىتگۇل سەيتوۆا.
الماتى قالاسى بويىنشا مەملەكەتتىك كىرىستەر دەپارتامەنتىنىڭ وكىلدەرى جاڭا سيفرلىق سەرۆيستەر مەن ەسەپتىلىكتى اۆتوماتتاندىرۋ جۇيەسى سالىق سالۋ ۇدەرىسىن ايقىن، ىڭعايلى جانە بارلىق سالىق تولەۋشىلەر ءۇشىن تۇسىنىكتى ەتەتىنىنە سەنىمدى.