الماتى قالاسى تجد تۇرعىنداردى جىلىتۋ ماۋسىمىندا ءورت قاۋىپسىزدىگى ەرەجەلەرىن ساقتاۋعا شاقىرادى
الماتى قالاسى توتەنشە جاعدايلار دەپارتامەنتى جىلىتۋ ماۋسىمى كەزەڭىندە قالا تۇرعىندارىنىڭ ءورت قاۋىپسىزدىگىن قامتاماسىز ەتۋ ماقساتىندا كەشەندى شارالار قابىلداۋدا. بۇل تۋرالى اقپارات وڭىرلىك كوممۋنيكاسيالار قىزمەتىنىڭ الاڭىندا بەلگىلى بولدى.
تجد مەملەكەتتىك ءورت باقىلاۋ باسقارماسى باستىعىنىڭ ورىنباسارى ەركەبۇلان جۇماتايەۆتىڭ ايتۋىنشا، 8 قازاندا باستالعان جىلىتۋ ماۋسىمىمەن قاتار قالادا ءورتتىڭ الدىن الۋ جانە تۇرعىندار ءۇشىن تاۋەكەلدەردى ازايتۋ باعىتىندا بەلسەندى پروفيلاكتيكالىق جۇمىس جۇرگىزىلۋدە.
«وقيعالاردىڭ سانىن ازايتۋ ماقساتىندا تۇرعىن ۇيلەردەگى ءورت قاۋىپسىزدىگى بويىنشا پروفيلاكتيكالىق جۇمىستاردى جۇزەگە اسىرۋدىڭ ءبىرىڭعاي جوسپارى ازىرلەنگەن. قازىرگى تاڭدا تجد ەسەبىندە 151 مىڭنان استام جەكە تۇرعىن ءۇي بار. ونىڭ ىشىندە قاتتى وتىنمەن جىلىتىلادى دەپ ەسەپكە الىنعان 1 450 ءۇي جانە قاڭقالى-قامىستى ەسكى ۇلگىدەگى 5 605 ءۇي ەرەكشە باقىلاۋعا الىنعان»، – دەدى ەركەبۇلان جۇماتايەۆ.
15 تامىزدان باستاپ تجد تاراپىنان كەڭ اۋقىمدى ورتكە قارسى ءاقپاراتتىق-تۇسىندىرۋ ناۋقانى جۇرگىزىلۋدە. اسىرەسە الەۋمەتتىك جاعىنان وسال وتباسىلارعا ەرەكشە نازار اۋدارىلۋدا – ولاردىڭ 689 ءۇيى مەن الەۋمەتتىك تۇرعىدان بەيىمدەلمەگەن ءومىر سالتىن ۇستاناتىن 4 مىڭنان استام ادامنىڭ ۇيلەرى پروفيلاكتيكالىق تەكسەرۋمەن قامتىلعان.
«2018 جىلدان بەرى قالا جانە اۋدان اكىمدىكتەرىنىڭ قولداۋىمەن جەكە تۇرعىن ۇيلەرگە 1 453 كومىرتەك توتىعىنىڭ داچيكتەرى ورناتىلدى. تەك بيىلعى ماۋسىمدا قوسىمشا 642 داچيك ساتىپ الىندى. بۇل قۇرىلعىلار كومىرقىشقىل گازىمەن ۋلانۋدىڭ الدىن الۋعا كومەكتەسەدى»، – دەپ اتاپ ءوتتى سپيكەر.
25 قىركۇيەكتەن باستاپ مەگاپوليستە ءورت قاۋىپسىزدىگى ايلىعى ۇيىمداستىرىلدى. ونىڭ اياسىندا جەكە تۇرعىن ۇيلەر مەن كوپپاتەرلى ۇيلەردىڭ تۇرعىندارىمەن كەزدەسۋلەر، ءتۇسىندىرۋ جۇمىستارى جۇرگىزىلىپ، ءورت قاۋىپسىزدىگى تالاپتارى بويىنشا جادىنامالار مەن بۋكلەتتەر تاراتىلۋدا.
حالىقتى كەڭىنەن قامتۋ ءۇشىن زاماناۋي تەحنولوگيالار قولدانىلۋدا:
* نۇسقاۋلىقتار مەن ۇسىنىستارعا قول جەتكىزۋگە ارنالعان QR-كودتار ازىرلەندى؛
* LED-ەكرانداردا وقىتۋ بەينەروليكتەرى كورسەتىلۋدە؛
* 7،6 ميلليوننان استام ابونەنتتى قامتىعان SMS-حابارلامالار جىبەرىلدى.
جىلىتۋ ماۋسىمىنا دايىندىق باستالعالى بەرى تەلە جانە راديو سيۋجەتتەردى، باسپا جانە ونلاين باسىلىمداردى قامتيتىن 1 168 اقپاراتتىق ماتەريال ازىرلەندى.
ءسوز سوڭىندا تجد ماماندارى تۇرعىنداردى ءورت قاۋىپسىزدىگىنىڭ قاراپايىم ەرەجەلەرىن ساقتاۋعا شاقىردى:
* جىلىتۋ ماۋسىمىندا ءتۇتىن مۇرجالارىن ءار ەكى اي سايىن كۇيەدەن تازالاڭىز؛
* پەشتى شامادان تىس قىزدىرماڭىز جانە وعان جاقىن جانعىش زاتتاردى قويماڭىز؛
* گازبەن جىلىتۋ پەشتەرىن پايدالانۋ نۇسقاۋلىعىن قاتاڭ ساقتاڭىز؛
* پەش، گاز باعاناسى، پليتا، كەروسين جانە ەلەكتر قۇرالدارىن قاراۋسىز قالدىرماڭىز، باقىلاۋدى بالالارعا تاپسىرماڭىز؛
* پەش ۇستىنە كيىم-كەشەك، اياق كيىم جانە باسقا دا جانعىش زاتتاردى ىلمەڭىز؛
* سىرىڭكە مەن وت جاعاتىن قۇرالداردى بالالاردىڭ قولى جەتپەيتىن جەردە ساقتاڭىز.