جوسپارلى ستوماتولوگيالىق كومەك 18 جاسقا دەيىنگى بالالار مەن جۇكتى ايەلدەرگە عانا كورسەتىلەدى.
الماتى قوعامدىق دەنساۋلىق ساقتاۋ باسقارماسىنىڭ ەمدەۋ-پروفيلاكتيكالىق قىزمەت ءبولىمى جەتەكشىسى ءلايلا يمانعالييەۆا ستوماتولوگيالىق كومەكتى پايدالانۋ جولدارىن ءتۇسىندىرىپ بەردى، دەپ حابارلايدى Almaty-akshamy.kz
امبۋلاتوريا دەڭگەيىندەگى جوسپارلى جانە شۇعىل ستوماتولوگيالىق كومەك مىندەتتى الەۋمەتتىك مەديسينالىق ساقتاندىرۋ پاكەتى ارقىلى قارجىلاندىرىلادى جانە ازاماتتاردىڭ جەكەلەگەن ساناتتارى ءۇشىن تەگىن كورسەتىلەدى.
ءلايلا يمانعالييەۆانىڭ ايتۋىنشا، جوسپارلى ستوماتولوگيالىق كومەك 18 جاسقا دەيىنگى بالالار مەن جۇكتى ايەلدەرگە عانا كورسەتىلەدى.
«ولار ءتىستى جانسىزداندىرۋ، حيميالىق پلومبا سالۋ، تەراپيەۆتىڭ قابىلداۋى، پۋلپيت پەن پەريدونتيتتى ەمدەۋ، فليۋوروز، گيپوپلازيا كەزىندە ءتىستىڭ اناتوميالىق ءپىشىنىن تولىق قالپىنا كەلتىرۋ، ءتىستى حيرۋرگيالىق جولمەن جۇلۋ ت.ب. قىزمەتتەردى تەگىن پايدالانا الادى. ءتىس دارىگەرىنىڭ قىزمەتىنە جۇگىنۋ ءۇشىن ستوماتولوگيالىق كلينيكاعا حابارلاسىپ، قابىلداۋعا جازىلعان دۇرىس»، - دەيدى ساراپشى.
ال، شۇعىل ستوماتولوگيالىق كومەك كەپىلدەندىرىلگەن تەگىن مەديسينالىق كومەك پاكەتى شەڭبەرىندە، حالىقتىڭ الەۋمەتتىك جاعىنان از قورعالعان ساناتتارىنا عانا كورسەتىلەدى. ولاردىڭ قاتارىندا 18 جاسقا دەيىنگى بالالار، جۇكتى ايەلدەر، ۇوس ارداگەرلەرى، بارلىق توپ مۇگەدەكتەرى، «التىن القا»، «كۇمىس القامەن» ماراپاتتالعان كوپ بالالى انالار، زەينەتكەرلەر، اتاۋلى الەۋمەتتىك كومەك الۋشىلار، جۇقپالى جانە الەۋمەتتىك ماڭىزى بار سىرقاتتارمەن اۋىراتىن ناۋقاستار، بالالىق شاقتان ءى توپ مۇگەدەگىن كۇتۋشىلەر بار.
ستوماتولوگيالىق كومەكتى ەمحانا ارقىلى عانا ەمەس، مەديسينالىق ساقتاندىرۋ جۇيەسىندە جۇمىس ىستەيتىن جەكە مەنشىك ءتىس كلينيكالارى ارقىلى دا پايدالانۋعا بولادى. ولاردىڭ تولىق ءتىزىمى: https://fms.kz/upload/iblock/a96/a96c885150d8167c0812d1292f7f28ab.xlsx
ەستەرىڭىزگە سالا كەتسەك، ستوماتولوگيالىق كومەككە قاتىستى بارلىق سۇراقتاردى مەديسينا ۇيىمى جانىنداعى پاسيەنتتەردى قولداۋ قىزمەتىنە جولداۋعا بولادى.