الماتىداعى سايران ماڭىندا جوعارى ءۆولتتى جەلىدە جارىلىس بولدى: زارداپ شەككەندەر جوق، دەپ حابارلايدى Aqshamnews.kz ءتىلشىسى.
قالا اكىمدىگىنىڭ مالىمەتىنشە، 17 قاراشادا ساعات 08:53-دە وتەگەن باتىر كوشەسىندەگى «سۇڭقار» مەدورتالىعىنىڭ اۆتوتۇراعىندا جوعارى ءۆولتتى ەلەكتر جەلىسى جارىلعان.
وقيعا ورنىنا ءورت ءسوندىرۋ قىزمەتى، پوليسيا جانە جەدەل جاردەم 09:01-دە جەتكەن.
«زارداپ شەككەندەر جوق. يزولياسيالىق ماتەريالدىڭ سىنىقتارى مەدورتالىقتىڭ تەرەزەلەرىن جانە ءبىر جەڭىل اۆتوكولىكتى زاقىمدالعان. اجك-نىڭ اۆاريالىق قىزمەتى جولدا كەلە جاتىر»، – دەپ حابارلادى اكىمدىك.
جارىلىس سالدارىنان اۋەزوۆ اۋدانىنداعى 5، 8، 9، 10-شاعىناۋداندار جانە سايران اۋماعىندا جارىق سونگەن. 09:50-گە قاراي 10-شاعىناۋداننان باسقا بارلىق اۋماققا ەلەكتر ەنەرگياسى قايتا قوسىلعان.
ايتا كەتەيىك، بۇگىن تاڭەرتەڭ سايران كولىنىڭ ماڭىندا جارىلىس داۋىسى ەستىلگەنى تۋرالى تۇرعىندار الەۋمەتتىك جەلىلەردە جازعان ەدى. سول ساتتە كوپتەگەن ۇيلەردە جارىق وشكەن.
الماتى قالاسىنىڭ تجد دەرەگىنشە، 08:53-دە وتەگەن باتىر كوشەسىندە ترانسفورماتوردىڭ جانعانى تۋرالى حابارلاما تۇسكەن.
ەلەكتر جەلىسىندەگى اپاتتىڭ سەبەپتەرى انىقتالىپ جاتىر.