الماتىدا سايلاۋ جوعارى دەڭگەيدە ءوتتى - باقىلاۋشىلار

چەليابى وبلىسىنىڭ باقىلاۋشىلارى: الماتىدا سايلاۋ جوعارى ۇيىمداسقان دەڭگەيدە ءوتتى.

21 قاراشادا الماتىداعى قازاقستان رەسپۋبليكاسى پرەزيدەنتى سايلاۋىنان حابار تاراتۋ جونىندەگى باسپا ءسوز ورتالىعى الاڭىنا رەسەي فەدەراسياسىنان كەلگەن بايقاۋشىلار چەليابى وبلىسى ۇكىمەتىنىڭ ىشكى ساياسات باسقارماسىنىڭ باس مامانى الەكساندر انتروپوۆ، چەليابى وبلىسى ۇكىمەتىنىڭ ىشكى ساياسات باسقارماسىنىڭ اقپاراتتىق-تالداۋمەن قامتاماسىز ەتۋ ءبولىمىنىڭ باس مامانى الەكساندر ۆوروبيەۆ شاقىرىلدى، دەپ حابارلايدى Almaty-akshamy.kz.

 «ءبىز تمد ميسسياسى اياسىندا باقىلاۋ جۇرگىزدىك، قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋى ەلدەگى سايلاۋ زاڭناماسىنا سايكەس ءوتتى. رەسپۋبليكادا حالىقارالىق بايقاۋشىلاردىڭ جۇمىس ىستەۋى ءۇشىن بارلىق قاجەتتى جاعدايلار جاسالعانىن اتاپ وتكىم كەلەدى. سايلاۋ جالپى جوعارى ۇيىمداسقان دەڭگەيدە ءوتتى. كەشە 7 سايلاۋ ۋچاسكەسىندە بولدىق. جالپى، ءبىزدىڭ ەلدەردەگى سايلاۋ ۇيىمداستىرۋ جاعىنان ۇقساس. ەشقانداي ايتارلىقتاي ايىرماشىلىقتار جوق. ءبىز كەلەڭسىز جاعدايلاردى تىركەگەن جوقپىز، ءبىراق جاعىمدى ساتتەر ەستە قالدى، بۇل - سايلاۋ كوميسسيالارى مۇشەلەرىنىڭ دوستىق قارىم-قاتىناسى»، - دەدى الەكساندر ۆوروبيەۆ.

رەسەيدەن كەلگەن باقىلاۋشى قازاقستاندا تەحنولوگيالىق جاڭاشىلدىقتار ەنگىزىلگەنىن، سايلاۋشىلار اراسىندا ماڭىزدى اقپاراتتىق جۇمىس جۇرگىزىلگەنىن اتاپ ءوتتى.

الەكساندر انتروپوۆ سايلاۋ كوميسسيالارى مۇشەلەرىنىڭ كاسىبي دەڭگەيىن، ولاردىڭ دايىندىعىن، قۇجاتتاردى ساۋاتتى تولتىراتىنىن، سايلاۋ ۋچاسكەلەرىنىڭ اقپاراتتىق قۇجاتتامامەن قامتاماسىز ەتىلگەنىن اتاپ ءوتتى.