7 قىركۇيەك كۇنى الماتى قالاسىندا ساياسي قۋعىن-سۇرگىن قۇرباندارىن اقتاۋ جونىندەگى قالالىق كوميسسيانىڭ قاتىسۋىمەن 372 كوتەرىلىستىڭ زەرتتەۋ جۇمىسى اياسىندا اقپارات پەن تاجىريبە الماسۋعا ارنالعان وڭىرلىك سەمينار وتكىزىلدى. ءىس-شارانى رەسپۋبليكالىق جوبالىق كەڭسە مەن الماتى قالاسى اكىمدىگى بىرلەسە ۇيىمداستىردى، دەپ حابارلايدى almaty-akshamy.kz
سەميناردىڭ باستى ماقساتى – ساياسي قۋعىن-سۇرگىن قۇرباندارىن اقتاۋ ۇردىسىمەن بايلانىستى تاجىريبە، ادىس-تاسىلدەر الماسۋ، زەرتتەۋدىڭ سىندارلى باعىتتارىن انىقتاۋ جانە قۋعىن-سۇرگىن قۇرباندارى ەسىمدەرىنىڭ بازاسىن ودان ءارى تولىقتىرۋ ماسەلەلەرىن تالقىلاۋ.
سەميناردى مودەراتور – ساياسي قۋعىن-سۇرگىن قۇرباندارىن اقتاۋ جونىندەگى رەسپۋبليكالىق جوبالىق كەڭسەنىڭ ءتوراعاسى سابىر قاسىموۆ اشىپ، مەملەكەتتىك كوميسسيا جۇمىسىنىڭ قازىرگى ىس-ارەكەتتەرى مەن باسىمدىقتارى تۋرالى ايتىپ بەردى.
الماتى قالاسى اكىمىنىڭ ورىنباسارى ەرجان باباقۇماروۆ ءوز سوزىندە ق ر پرەزيدەنتىنىڭ 2020 جىلعى 24 قاراشاداعى جارلىعىمەن قۇرىلعان كوميسسيا جۇمىسىنىڭ قوعامدىق ماڭىزدىلىعىن اتاپ ءوتتى. كوميسسيانىڭ الدىندا ساياسي قۋعىن-سۇرگىن كەزەڭىندەگى وقيعالارعا ءادىل باعا بەرۋ، رەپرەسسيا قۇرباندارىن اقتاۋ جانە قۋدالاۋعا ۇشىراعان ادامداردىڭ ەسىمدەرىن انىقتاۋ جونىندە ناقتى قۇقىقتىق بازا قالىپتاستىرۋ مىندەتى تۇر. قالالىق كوميسسيا بۇگىندە الماتى قالاسى پوليسيا دەپارتامەنتىنىڭ ارنايى مۇراعاتىندا، الماتى قالاسىنىڭ ورتالىق مەملەكەتتىك مۇراعاتىندا، "قازاقستان رەسپۋبليكاسى پرەزيدەنتىنىڭ مۇراعاتى" مم-دە ساقتالعان مۇراعاتتىق قۇجاتتار مەن تەرگەۋ ىستەرىن زەردەلەۋدە. قازاقستان اۋماعىندا بولعان ءىرى كوتەرىلىستەرگە قاتىسۋشىلار تۋرالى تولىق اقپارات جيناۋ بويىنشا كەشەندى جۇمىستار جۇرگىزىلۋدە.
رەسپۋبليكالىق دەڭگەيدە جۇرگىزىلىپ جاتقان جۇمىستار تۋرالى مەملەكەتتىك كوميسسيا جۇمىس توبىنىڭ جەتەكشىسى، تاريح عىلىمدارىنىڭ دوكتورى، پروفەسسور، ق ر ۇعا قۇرمەتتى اكادەميگى تالاس وماربەكوۆ ايتىپ بەردى. سونداي-اق، سەمينار جۇمىسىنا الماتى، جامبىل، قىزىلوردا، تۇركىستان وبلىستارى مەن شىمكەنت قالاسىنىڭ وڭىرلىك كوميسسيالارىنىڭ وكىلدەرى قاتىسىپ، ەسەپتى كەزەڭدەگى زەرتتەۋ جۇمىستارىمەن ءبولىستى.
سەمينار سوڭىندا قاتىسۋشىلار زەرتتەۋ جۇمىستارىن جاقسارتۋ بويىنشا ءبىرقاتار ۇسىنىستار قابىلدادى.
ق ر ۇلتتىق كىتاپحاناسىندا «372 كوتەرىلىستى باسۋ بارىسىندا سوتسىز جانە تەرگەۋسىز اتىلعان، سونداي-اق وسى نارازىلىقتارعا قاتىسىپ، قولداعانى ءۇشىن سوتتان تىس جانە سوت ورگاندارىمەن قۋعىن-سۇرگىندەرگە ۇشىراعان قۇرباندارى تۋرالى اقپارات پەن جۇمىس تاجىريبەسىمەن الماسۋ تۋرالى» اتتى دوڭگەلەك ۇستەل ءوتتى. وندا الماتى، شىمكەنت قالالارى مەن الماتى، جامبىل، قىزىلوردا مەن تۇركىستان وبلىستارىنىڭ وڭىرلىك كوميسسيا مۇشەلەرى ءسوز سويلەپ، جۇمىس ناتيجەلەرىمەن ءبولىستى. الماتى بويىنشا ساياسي قۋعىن-سۇرگىن قۇرباندارىن اقتاۋ جونىندەگى قالالىق كوميسسيانىڭ ءتوراعاسى ەرجان باباقۇماروۆ الماتىلىق كوميسسيا ءوز دەڭگەيىندە جۇمىس اتقارىپ جاتقانىن، مۇنداي باستامالار قوعامدا قولداۋ تاپقانىن اتاپ ءوتتى.