تاۋەلسىزدىكتىڭ 30 جىلدىعىنا ارنالعان شارالار وقۋ ورىندارىندا باستاۋ الدى
الماتى مەكتەپتەرى مەن جوعارى وقۋ ورىندارىندا تاۋەلسىزدىكتىڭ 30 جىلدىعىنا ارنالعان اشىق ساباقتار وتكىزىلە باستادى، دەپ حابارلايدى Almaty-akshamy.kz قازاقپارات سايتىنا سىلتەمە جاساپ.
ءبىر اي بويى رەسپۋبليكانىڭ بارلىق مەكتەپتەرىندە تاۋەلسىزدىكتىڭ 30 جىلدىعىنا ارنالعان سىنىپ ساعاتتارى مەن اشىق ساباقتار وتكىزىلەدى. ۇرپاق ساناسىنا قاستەرلى تاۋەلسىزدىك جىلدارىنىڭ قاسيەتىن ۇعىندىراتىن جوبا الماتى قالاسىنداعى مەكتەپتەر مەن جوو-دا دا باستاۋ الدى.
بوستاندىق اۋدانىنا قاراستى م.ماقاتايەۆ اتىنداعى №140-مەكتەپ-گيمنازياسىندا «تاۋەلسىزدىك جەتىستىكتەرى» اتتى سىنىپ ساعاتى ءوتتى. اشىق تاربيە ساعاتىنىڭ ماقساتى – ءبىلىم مەن تاربيە بەرۋ، وقۋشىلارعا 30 جىلدا ەلىمىز جەتكەن 30 جەتىستىكتى ناسيحاتتاۋ.
بوستاندىق اۋداندىق ءبىلىم ءبولىمىنىڭ باسشىسى باقىتبەك بوستاندىق ۇلىنىڭ ايتۋىنشا، ەل تاۋەلسىزدىگىنىڭ 30 جىلدىعىنا بايلانىستى مۇنداي ءىس-شارالار قالاداعى ءار مەكتەپ پەن بالاباقشادا وقۋ جىلىنىڭ اياعىنا دەيىن ۇيىمداستىرىلادى.
«جىلدىڭ سوڭىنا دەيىن وتەتىن ءىس-شارانىڭ م.ماقاتايەۆ اتىنداعى مەكتەپ-گيمنازياسىندا باستالۋىنىڭ ءوزى تەگىننەن-تەگىن ەمەس. بيىل اقيىق اقىن م.ماقاتايەۆتىڭ تۋعانىنا 90 جىل تولىپ وتىر ءارى بۇل مەكتەپ – قالاداعى ەڭ ۇزدىك مەكتەپتەردىڭ ءبىرى. سوعان بايلانىستى تاعىلىمدى شارالاردى ءبىز وسى مەكتەپتەن باستاعاندى ءجون كوردىك»، – دەدى باقىتبەك بوستاندىق ۇلى.
جوعارى وقۋ ورىندارى ستۋدەنتتەرىنىڭ اراسىندا دا تاۋەلسىزدىك ۇعىمى ناسيحاتتالىپ، ونىڭ تاريحي العىشارتتارى مەن ساياسي كورىنىسى ءتۇسىندىرىلدى. مىسالى، س.ج.اسفەندياروۆ اتىنداعى قازاق ۇلتتىق مەديسينا ۋنيۆەرسيتەتىنىڭ قابىرعاسىندا «تاۋەلسىزدىك جىلدارىنداعى ەگەمەندى ەلىمىزدىڭ جانە س.ج.اسفەندياروۆ اتىنداعى قازۇمۋ-دىڭ تۇعىرلى جەتىستىكتەرى» اتتى مەرەكەلىك شارا ءوتتى.
«بۇل شارانى تاۋەلسىزدىگىمىزدىڭ 30 جىلدىق مەرەيتويى قارساڭىندا ۇيىمداستىرىپ وتىرمىز. وتىز جىل تاريح كەڭىستىگىندە از با، كوپ پە دەگەن سۇراق تۋىندايدى. مەنىڭ ويىمشا، ماسەلە ۋاقىتتىڭ ۇزاقتىعىندا ەمەس، وسى جىل ىشىندە اتقارىلعان جۇمىستاردىڭ ناتيجەلىلىگىندە. وتىز جىلدا ەلىمىزدە ەلەۋلى تاريحي وزگەرىستەر ورىن الدى. ساياسي ارەنادا بولسىن، ەكونوميكالىق تۇرعىدان بولسىن قازاقستان ءوز اتىن شىعارىپ، ومىرلىك ماڭىزى بار بارلىق سالالاردا دامىدى. سونىڭ ىشىندە ءبىلىم سالاسىندا تالاي رەفورمالار جۇرگىزىلىپ، جوعارى وقۋ ورىندارىندا ءبىلىم بەرۋدىڭ جاڭا جۇيەلەرى ەنگىزىلدى. وعان ءبىزدىڭ ۋنيۆەرسيتەتتەگى وزگەرىستەر دالەل. ءقازىر ءبىز ەلىمىزدەگى مەديسينالىق ۋنيۆەرسيتەتتەر اراسىندا QS رەيتينگىنە ەنگەن جالعىز وقۋ ورنىمىز»، - دەدى س.ج.اسفەندياروۆ اتىنداعى قازۇمۋ پرورەكتورى ۋبايدۋللا ماحامبەت ۇلى.
جالپى، جىل بويى تاۋەلسىزدىكتىڭ 30 جىلدىعى رەسپۋبليكا بويىنشا بارلىق مەكتەپتەر مەن جوعارى وقۋ ورىندارىندا كەڭىنەن اتالىپ وتپەك.