مەگاپوليستە ەلىمىزدىڭ كورنەكتى قوس باتىرى، “حالىق قاھارماندارى” – ساعادات نۇرماعامبەتوۆ پەن راحىمجان قوشقاربايەۆتىڭ 100 جىلدىق مەرەيتويىنا ارنالعان اۋقىمدى سپورت فەستيۆالى ءوتىپ جاتىر.
شاھارداعى 28 گۆاردياشى-پانفيلوۆشىلار ساياباعىندا الماتى قالالىق سپورت باسقارماسىنىڭ مۇرىندىق بولۋىمەن ۇيىمداستىرىلعان ەرەكشە ءىس-شارا ەلىمىزدىڭ تۇكپىر-تۇكپىرىنەن كەلگەن ۇزدىك سپورتشىلار مەن سپورت سۇيەر قاۋىمنىڭ باسىن، تىلەگىن، نيەتىن قوسۋدا.
ولار ساياباق تورىندەگى “ماڭگىلىك الاۋعا” گۇل شوقتارىن قويىپ، باتىرلارىمىزعا قۇرمەت كورسەتتى.
فەستيۆال قاتىسۋشىلارى ۇلى دالا حالقىنىڭ ءداستۇرلى ويىنى – اسىق اتۋدان جارىسىپ، بوز كىلەمدە قازاقشا كۇرەستەن ويىن ورنەگىن كورسەتۋدە.
– بۇگىن ساياباق ءىشى ەرەكشە كۇيگە بولەنىپ تۇر. ساعادات نۇرماعامبەتوۆ پەن راحىمجان قوشقاربايەۆ سىندى قوس تۇلعانى جاس ۇرپاققا ۇلگى تۇتىپ، وسىلاي دارىپتەپ جاتقاندارىڭىزعا قۋانىشتىمىن. ساعادات نۇرماعامبەتوۆ جەتكىنشەكتەردىڭ ءبىلىمدى دە بىلەكتى بولعانىن قالايتىن، سول جولدا ەڭبەك ەتتى. وسىنداي پاتريوتتىق-سپورتتىق ءىس-شارالاردىڭ ءاردايىم بەلورتاسىندا ءجۇردى. سوندىقتان بۇگىنگى سۇيكىمدى بالالار مەن بىلەكتى ەرەسەكتەردىڭ قاتار تۇرىپ، فەستيۆالگە اتسالىسىپ جاتقانىن كورسە، ءسوزسىز قۋانار ەدى. سپورت تا ادامداردى جاقىنداستىرادى، شىڭدايدى، سەرگەكتىك سىيلايدى جانە جاڭا جەتىستىكتەرگە شابىتتاندىرادى. مەن دە ەلىمىزدىڭ تاريحىنا التىن ارىپتەرمەن جازىلىپ قالعان قوس باتىرىمىزدىڭ ەسىمىن كەيىنگى ۇرپاق ۇمىتپاسا ەكەن دەيمىن، – دەدى “حالىق قاھارمانى” ساعادات نۇرماعامبەتوۆتىڭ نەمەرەسى ايجان تالعات قىزى.
ال ءىىم مايورى، تۇيەپالۋان تيمۋر سىپاتايەۆ 200-دىك شەگەنى جالاڭ قولىمەن ءيىپ، جۇرەكشە جاساپ، سپورتتى سۇيەتىن ورەندەرگە سىيلادى.
فەستيۆال جەڭىمپازدارى باعالى سىيلىقتارمەن ماراپاتتالادى.
ءبىز سوزگە تارتقان 42 ورتا مەكتەپتىڭ 4-سىنىپ وقۋشىسى ايقىن باقىتجان ۇلىنىڭ كۇرەس ۇيىرمەسىنە بارىپ جۇرگەنىنە ەكى جىلدان اسىپتى. بۇگىنگى فەستيۆالدە جۇلدەلى بولامىن دەپ تاس بەكىنىپ وتىر. ساتتىلىك تىلەيمىز بالدىرعاندارعا!